Milli Qiyama ithaf edilmiş Şeir

SON XƏBƏRLƏR

Milli Qiyama ithaf edilmiş Şeir – İsmail Cəmili

2021.10.20, 07:36

Gunaz.tv

GünAz TV: Milli Qiyamın (Xordad Qiyamının) növbəti İldönümü günlərini yaşamaqdayıq. Dəyərli şairimiz İsmail Cəmilinin Qanlı Qiyama ithaf etmiş şeirləri burdan oxuya bilərsiniz:

OYAN AZƏRBAYCAN

Qalx ayağa göstər yenə qüdrətini Azərbaycan

Alqışlasın qoca tarix qeyrətini Azərbaycan

***

Əlbir olub igidlərin bağırmalı bəsdir talan

Sözbir olub aydınların söyləməli yetər yalan

Varlığını yox sayanlar ihanəti edər əyan

Çırma qolun saxla özün hörmətini Azərbaycan

Qalx ayağa göstər yenə qüdrətini Azərbaycan

***

Sən Özgədən umub-küsmə sən sən olsan sənə yetər

Oğlanların qorxmaz Sattar hər bir qızın qoçaq Həcər

Haqq sənlədir haqqın gücü zalimləri kəsər biçər

Haqq yolunda haqqa tapşır millətini Azərbaycan

Qalx ayağa göstər yenə qüdrətini Azərbaycan

***

Satqın yobaz qulluqçular varlığını saya salmaz

Övladını insan bilməz bilsə dilin bağlı qalmaz

Gündən günə yad əlində cənnət yurdun talan olmaz

Qır zənciri azad elə türbətini Azərbaycan

Qalx ayağa göstər yenə qüdrətini Azərbaycan

***

Sən dözdükcə dili uzun yad üzlənir lap qudurur

Göz önündə haqlarını bir-bir danır qarşı durur

Düz sözünü boğazında boğur haqqı tərsə yorur

Gir meydana geri qaytar izzətini Azərbaycan

Qalx ayağa göstər yenə qüdrətini Azərbaycan

***

Öz dərdinin çarəsin qıl öz qəminin dərdinə yan

Bəsdir özgə ocağında yanıb kül olduğun oyan

Apartaydın yıx zindanın azad elin versin fərman

Dinlə Dədə Qurqudunun söhbətini Azərbaycan

Qalx ayağa göstər yenə qüdrətini Azərbaycan

***

Dili bağlı qolu bağlı türk elimin ocağısan

Sən elimin doğru yolu aydınlığın çırağısan

Babəklərin döyüşdüyü qurtuluşun Bayrağısan

Özün qoru millətini dövlətini Azərbaycan

Qalx ayağa göstər yenə qüdrətini Azərbaycan

İsmail Cəmili

---------------------------------------------------------------------

UNUDULMAZ ŞƏHİDLƏR

Savalan köksündə yanar səhəndin

Günəşə üz tutan qızıl lalələr

Qanlı bayrağıdır hər bir şəhidin

Qurtuluş yolunda ucalıb əsər

***

Qaranlıq gecələr axan ulduzlar

Aydın səhərlərin yolun açırlar

Yanarkən zülmətin döşünü deşib

Vurğun könüllərə işıq saçırlar

***

Şərəfli yaşayıb şərəfli köçən

Vətənin anasın sevən aşiqdir

Yasaq dilin Bayraq edib yürüyən

Azadlıq yolunu gedən aşiqdir

***

Zülmə baş əyməyən haqqın carçısı

Sarsılmayan igidlərə eşq olsun

Azərbaycan ürəyindən silinməz

Unudulmaz şəhidlərə eşq olsun

Cavad Abidini və bütün qurtuluş şəhidlərinə ithaf

İsmail Cəmili

GUNAZ.TV

SON XƏBƏRLƏR