GünAz TV mətbuat mərkəzinin növbəti müsahibi bu günlərdə Hollandiya və Türkiyə səfərindən qayıdan “Savalan” mistik qrupunun rəhbəri Novruz Novruzludur.

- Hollandiya və Türkiyə səfəri necə keçdi və tədbirlə bağlı  təəssüratlarınız necədir?

- Hollandiya Azərbaycan Türk Mədəniyyət Mərkəzinin sədri, dəyərli soydaşımız İlhan Aşkının dəvət ilə getmişdik. Tədbir çox gözəl hətta deyərdim ki, gözlədiyimizdən maraqlı və zəngin oldu. Tədbirdə türk dünyasının müxtəlif bölgələrdindən gələn musiqi qrupları iştirak edirdi. Amma, konsert daha çox bizim qrupun üzərində qurulmuşdu. Yəqin, bu, bizə olan hörmət və sayğıdan irəli gəlirdi. Öz proqramızdan əlavə xalq və bəstəkar mahnıları da ifa etdik. Onu da bildirim ki, Hollandiya Azərbaycan Türk Mədəniyyət Mərkəzinin sədri İlhan Aşkın Hollandiyada çox yaxşı işlər görür. Xüsusilə, 1992-ci ildə baş verən Xocalı faciəsi ilə bağlı qoyulan abidə onun təşəbbüsü ilə gerçəkləşib. Hər il 26 fevral faciənin anma günü keçirilir. Biz də abidəni ziyarət edib və şəhidlərimizin ruhuna fatihə oxuduq. Hollandiyada səfərindən sonra Türkiyədə fəaliyyət göstərən, Mərmərə Vəqf Qrupunun dəvəti ilə  XIV Avrasiya İqtisadi Zirvəsinin mədəniyyət proqramı çərçivəsində çıxış etdik. Tədbirə Azərbaycanın rəsmi şəxsləri daxil olmaqla, 36 ölkənin rəsmi şəxsləri, iş adamları iştirak edirdi və olduqca böyük tədbir idi. Çıxışımız gözəl qarşılandı və Latviya prezidentinin xanımı Lilita Zatler bizim ifamımızı çox bəyəndi. Xüsusilə, “Giziroğlu Mustafa Bəy“ mahnısı ifa edərkən oynayırdı.

- Deməli, ifanız xanım Lilita Zatler güclü təsir edib?

- Ümumiyyətlə, ifalarımız qonaqlar tərəfindən bütünlüklə maraqla qarşılandı. Latviya (letoni) prezidentinin xanımı musiqi ilə bizimlə ünsiyyətdə idi. Əcnəbi qonaqlar bizim mahnılar çox diqqət ayırırlar. Bizim mahnılar onlara rühən təsir edir. Mən, bunu hələ o zaman Yuğ teatrında Yunus İmrə ilə bağlı keçirilən tədbirdə görürdüm ki, onlar diqqətlə bizim musiqiyə qulaq asırdılar. Deməli, mahnılarımız onların ruhuna yaxındır. Mənə elə gəlir ki, onlar belə musiqiləri çox dəyər verirlər. Bir şeyi qeyd edim ki, insan Azərbaycandan kənara çıxanda öz dəyərini bilir. Bizim cəmiyyətdə insana və insanlığa olan dəyər itib.

- “Savalan” qrupunun gücü nədədir ki, ifaları belə maraqla qarşlanır?

- Mənə elə gəlir ki, dünya texnologiyadan, siyasətdən, mənasız şeylərdən bezib. Yəqin insanlar özünə varmaq, dönmək istəyir. Burada musiqinin hansı dildə ifası əsas deyil. Bu gün dünyada nə qədər dillər var və amma hamısında anlam eynidir. Bizim musiqinin fəlsəfəsində insanlıq, sevgi dayanır. Əvvəllər bizi dini qrupu hesab edirdilər. Biz dini qrup deyilik. Burada əsas insanlıq durur. Tanrı insanı kamil, uca yaradılıb. Düşünürəm ki, insanlara təsir edən o ruhsalıqdır. İfa etdiyimiz zaman özümüz də musiqi ilə saflaşaq. Dünyanın əksər ölkələrində musiqi ilə insan rahatlaşır və mənəvi dünyasını təmizləyir.

- Belə çıxır ki, xaricilərin musiqi duyumu daha güclüdür?

- Bilirsiniz ki, bizdə hüzur yoxdur. Bu söz bizdə işlənməsə də, amma mən bu sözü deməyi xoşlayıram. İnsanlarımız rahat deyillər, insanlarımızda bir narahatçılıq var. Biz, nədənsə rahat şəkildə oturub, musiqiyə qulaq asa bilmirik. Məsələn, Türkiyədə bu vəziyyət çox yaxşıdır. İnsanlar rahatçılıqla musiqiyə qulaq asırlar. Bu, bəlkə də cəmiyyətimizdə yaşanan problemlərlə bağlıdır. Mən, buna biganəlik deməzdim. Avropa, amerika bu yolu çoxdan keçib. Cəmiyyətimizdə yaşayan problemlər insanlarımızın psixoloji durumuna təsir edir.

-Təşəkkür edirik suallarımızı cavablandırdığınıza görə və gələcək işlərinizdə uğurlar arzu edirik.

- Məndə sizin vasitənizlə bizə dəyər verən, və belə tədbirlərdə çıxış etməyimizə şərait yaradan insanlara qrupumuz adından öz təşəkkürümüzü çatdırırıq.

Söhbətləşdi: Elnur Eltürk