GünAz TV: Suriyada etirazlar böyüyür. Kütləvi həbslərə və qətllərə baxmayaraq yeni-yeni şəhərlər nümayişlərə qoşulurlar.

Dünən gecə saatlarında Suriyanın yüzlərlə hərbçisi hökumət əleyhinə etirazların mərkəzlərindən biri olan Dəməşq ətrafında yerləşən qəsəbəyə basqın ediblər. Şahidlərin sözlərinə görə, hərbçilər zorla evlərə soxulublar, həbslər həyata keçiriblər.

«Frans Press» agentliyinin yaydığı xəbərə görə, ən azı 300 nəfər həbs edilib. Amma bütün təzyiqlərə və zorakı repressiyalara (sərkublara)  baxmayaraq, ölkə boyunca hökumət əleyhinə nümayişlər hələ də davam edir. Suriyaya xarici jurnalistlər buraxılmadığına görə ölkədə baş verənlərlə bağlı informasiyaları yoxlayıb dəqiqləşdirmək çətindir. Amma şahidlərin sözlərinə görə, Dəməşq ətrafında keçirilən reyd zamanı Suriya hərbçilərini tam təchiz edilmiş tanklar müşayiət ediblər. Ağır texnikanın müşayiəti ilə əməliyyatların keçirilməsinə dair informasiyalar başqa şəhərlərdən də daxil olur. Dünən gecə saatlarında internetdə çıxan videoyazıda Dəməşq yaxınlığında yerləşən Xama şəhərində keçirilmiş etiraz aksiyası (yürüş) əksini tapıb. Videoyazıda nümaiyşçilər küçə boyunca hərəkət edərək «Rədd olsun korrupsiyalaşmış (fəsade maliyə bulaşmış) rejim» şüarını səsləndirirlər.  Paytaxtdan şimalda yerləşən Xums şəhərində də analoji aksiya keçirilib. Dünən səhər saatlarında bəlli olub ki, Bəşər Əsəd rejimi etiraz fəallığının yüksək olduğu bir sıra şəhərlərə, o cümlədən Xums şəhəri yaxınlığında yerləşən Rastan şəhərinə qoşun və ağır texnika göndərib. «BBC»-nin Beyrutdakı müxbiri Cim Myuit xəbər verir ki, Suriya rejimi bu yolla bu gün üçün planlaşdırılan etiraz aksiyalarının böyük miqyas qazanmasını önləməyə çalışır. Etirazlar başlayandan bu yana ən kütləvi aksiyalar məhz ötən cümə günü axşam namazının ardından baş tutub. Bu gün də ölkə boyunca «İtaətsizlik Günü»nün təşkil olunacağı gözlənilir. Bu arada Suriya Dövlət Televiziyası xəbər verib ki, həftələrdir mühasirədə saxlanan Deraa şəhərindən qoşunların çıxarılmasına başlanıb. Televiziya bu addımı şəhərdə «terrorçuların həbsi və asayişin bərpası» ilə bağlı missiyanın tamamlanması ilə izah edib. Amma Suriya müxalifətindən mənbələr xarici mediaya bildiriblər ki, Əsəd rejimi artıq etirazlara qoşulan bütün şəhərlər üzərinədə ordunun nəzarətini təmin edə bilmir, qüvvə çatışmazlığı hiss edir və ona görə də Deraa şəhərindən qoşunların bir hissəsi başqa şəhərlərə göndərilir. Bununla belə, şəhər sakinləri qoşunların nəinki getmədiyini, əksinə şəhər ətrafında əlavə tankların mövqe aldığını bildirirlər.

Dünən Romada birgə keçirilən mətbuat konfransında ABŞ-ın (Amerika Birləşmiş Ştatlarının) dövlət katibi Hillari Klinton və İtaliyanın xarici işlər naziri Franko Frattini Bəşər Əsədi müxalifətlə danışıqlara getməyə çağırıblar. Maraqlıdır ki, bəzi məlumatlara görə, Bəşər Əsəd danışıqlara hazır olsa da, müxalifət bu təklifi rədd edir və qəti tələb olaraq diktatorun istefasını irəli sürür. Qeyd edək ki, son həftələr ərzində ümumilikdə 2800 adam həbs edilib, etirazlar başlayandan bu yana təxminən 580 adam Bəşər Əsəd qüvvələri tərəfindən qətlə yetirilib. Bütün bunlara baxmayaraq, bu gün də irimiqyaslı etirazlar gözlənilir. Bizim yol