İranda yüksək rütbəli məsul şəxslərdən biri həbs edilib

SON XƏBƏRLƏR

İranda yüksək rütbəli məsul şəxslərdən biri həbs edilib

2021.10.20, 07:36

Gunaz.tv

GünAz TV: Bir neçə gün əvvəl İranın kəşfiyyat naziri (ETTELAAT-ın rəhbəri) vəzifəsinə gətiriləcəyi deyilən, İran prezidenti Mahmud Əhmədinejad hökumətinin mədəniyyət komissiyasının rəhbəri Abbas Əmirifər həbs olunub.

GünAz TV mətbuat mərkəzinin “Media forum”-a istinadən yaydığı məlumata görə, ETTELAAT əməkdaşları mayın 1-də axşam saatlarında Abbas Əmirifəri mənzilindən aparıblar.

Abbas Əmirifər İranın Prezident Administrasiyasının (nəhade riyasətə cümhuri) rəhbəri İsfəndiyar Rəhim Məşayinin ən yaxın adamlarından biri kimi tanınır.

Abbas Əmirifərin niyə tutulduğu haqda məlumat yoxdur. Mahmud Əhmədinejadın onu ETTELAAT-ın rəhbəri təyin etmək istədiyi xəbərini bir neçə gün əvvəl bəzi İran saytları yaymışdı.

ETTELAAT-ın rəhbəri Heydər Moslehi aprelin 17-də istefa versə də, İranın dini rəhbəri ayətullah Əli Xamneyinin göstərişi ilə o, dərhal postuna qaytarılıb.

Moslehinin istefa xəbərini ilk dəfə hökumətə yaxın “İRNA” agentliyi yayıb. Həmin agentliyin yaydığı digər xəbərdə bildirilib ki, İran prezidenti Mahmud Əhmədinejad Moslehinin istefasını qəbul edərək onu təhlükəsizlik işləri üzrə müşaviri postuna gətirib.

ETTELAAT rəhbərinin istefası xəbəri yayıldıqdan az sonra İranın dini liderinin prezident Əhmədinejada tapşırığı ilə Moslehi postuna qaytarılıb.

Moslehinin qəflətən istefa verməsinin səbəbi barədə məlumat yayılmayıb.

Aprelin 19-da ayətullah Əli Xamneyi Heydər Moslehiyə məktub yazaraq ona dəstək verib.

Bundan sonra 10 gün ərzində Mahmud Əhmədinejad işə çıxmayıb. Aprelin 30-da o, hökumətin iclasını keçirib. ETTELAAT rəhbəri Heydər Moslehi iclasa qatılmayıb

İclasda çıxış edən Əhmədinejad onunla dini lider arasında ixtilaf yaranması ilə bağlı xəbər yayanları “riyakar və hiyləgər” adlandırıb: “Bir neçə gün evdə oturmağımın müəyyən səbəbləri var ki, bunu öz ürəyimdə saxlayacağam. Çünki bir çox sözlər insanın ürəyində qalmalıdır. İş yerimdə olmadığım bir neçə gündə xaricdə bir qrup riyakar və hiyləgər, ölkə daxilində isə bir qrup cahil və qərəzli şəxs toy-bayram etməyə çalışdılar. Mənim onlara cavab vermək fikrim yoxdur. Son 5 il yarımda prezident postunda olduğum müddətdə gecə-gündüz eşq və imanla xalqa xidmət göstərmiş, bütün vücudumla “Vilayət-i fəqih”in (ayətullah Xamneyinin) istiqamətində hərəkət etmişəm”.

GUNAZ.TV

SON XƏBƏRLƏR