GünAz TV mətbuat mərkəzinin növbəti müsahibi, “Odlar Yurdu” Diaspor Təşkilatının sədri Murad Camalzadədir.

- “Odlar Yurdu” Diaspor Təşkilatı nə zaman yaranıb və xüsusilə, fəaliyyətində əsasən hansı prinsipləri əsas götürüb?

- “Odlar Yurdu” Diaspor Təşkilatı 2008-ci ildə Böyük Britaniyada yaradılıb. Təşkilat Londonda təhsil alan İlham Nağıyevin təşəbbüsü ilə bir qrup azərbaycanlı tələbələr tərəfindən təsis olunub. Təşkilatın yaradılmasının əsasında Azərbaycan Respulikasının (Cümhuriyyətinin) diaspora quruculuğunda iştirak etmək, bu sahədə dövlətimizin həyata keçirdiyi siyasətə dəstək olmaq ideyası dayanırdı. Yarandıqdan dərhal sonra təşkil olunan tədbirlər, həyata keçirilən layihələr təşkilatın öz ideyasına sadiqliyini sübüt etdi. Təşkilatın əsas fəaliyyət prinsiplərindən (ilkələrindən, əsllərindən) biri Azərbaycanla bağlı həqiqətlərin dünya ictimaiyyətinə düzgün və dolğun çatdırılması, beynəlxalq tədbirlərdə Azərbaycanı layiqincə təmsil etmək funksiyası (görəvi) idi. Elə bu məqsədlə də 2008-ci ildə fevral ayında Xocalı soyqırımının il dönümü günü İngiltərə Parlamenti qarşısında keçirilən etiraz aksiyasının (yürüşünün) əsas təşkilatçılarından biri də məhz “Odlar Yurdu” Diaspor Təşkilatı oldu. Daha sonra həmin ilin mart ayının 16-da Londonda keçirilən Lobanovski adına Futbol Turnirində iştirak edə bilmək üçün təşkilatımız tərəfindən “Baku United” adlı futbol komandası yaradıldı və bu turnirdə ölkəmiz də təmsil edildi. Azərbaycanın təmsil olunması sahəsində həyata keçirilən ən mühüm layihələrdən biri də “Azerbaijan – Past, Present and Future” adlı sərginin təşkil olunması idi. Londonun nüfuzlu “Şərq və Afrika Tədqiqatları İnstitutunda” (SOAS) 1 ay ərzində davam edən bu sərgi azərbaycan mədəniyyəti, tarixi və müasir həyatı barədə əcnəbi vətəndaşların məlumatlandırılması baxımından əlamətdar hadisə idi. “Odlar Yurdu” Diaspor Təşkilatının digər bir fəaliyyət prinsipi isə xaricdə yaşayan soydaşlarımızın bir araya gətirilməsi, onlar arasında əlaqələrin və birliyin gücləndirilməsi üçün işlərin görülməsidir. Bu istiqamətdə də təşkilatımız bir sıra layihələrə imza atmışdır. Belə ki, 2008-ci ildə mart ayının 19-da Londonda təhsil alan Azərbaycanlı qızlar arasında “Miss Azerbaijan London” adlı gözəllik müsabiqəsi təşkil olundu. Həmçinin Novruz bayramı münasibətilə “Novruz” və “Baku Nights” adlı partilər də keçirilmişdir. Çexiyada fəaliyyət göstərən nümayəndəliyimiz tərəfindən hər həftə sonları Praqadakı tələbələrimiz arasında Mafia oyunları təşkil olunur. Bütün bu tədbirlər soydaşlarımız arasında qarşılıqlı əlaqələrin genişlənməsinə və birliyin gücləndirilməsinə xidmət edir. Təşkilatın əsas fəaliyyət prinsiplərindən biri də digər ölkələrdə yaşayan və təhsil alan tələbələrimizin bu sahədəki fəaliyyətinə dəstək olmaqdır. Belə ki, 2011-ci ilin fevral ayında Litvanın Kaunas şəhərində təhsil alan tələbələrimiz tərəfindən Xocalı soyqırımı ilə bağlı tədbir keçirilməsində, mart ayında Novruz bayramı münasibətilə parti təşkil olunmasında təşkilatımız maddi və mənəvi dəstək göstərmişdir. Həmçinin 2011-ci ilin fevral ayının 11-13-də Latviyada keçirilən beynəlxalq turizm sərgisində Litvada təhsil alan gənclərimizin də iştirakı təşkil olundu. - Təşkilat fəaliyyətində Güney Azərbaycan məsələsinə önəm verirmi? Əsas orada baş verən hadisələr sayt və dərgilərinizdə işıqlandırılırmı?

- Güney Azərbaycan Bütöv Azərbaycanın ayrılmaz bir tərkib hissəsidir və orada baş verən bütün proseslər bizi də düşündürməkdədir. Təşkilatımızın keçirdiyi tədbirlərdə və layihələrdə cənubdan olan soydaşlarımız da yaxından iştirak edir, diaspora quruculuğu istiqamətində bizimlə birgə addımlayırlar. Təşkilatımız tərəfindən Londonda Azərbaycan dilində çap olunan və dünyanın bir çox ölkəsinə göndərilən “Odlar Yurdu” qəzetində də bu məsələ geniş işıqlandırılır. Qəzetimizdə xüsusi bölmə yaradılmışdır və hər dəfə Güney Azərbaycanda cərəyan edən ictimai-siyasi, mədəni proseslər, mövcud olan problemlər öz əksini tapır. Həmçinin internet saytımızda da (www.oyo.org.uk) bu məsələlərə ciddi fikir verilir.

- Bir gənc olaraq, xalqımızın birləşməsi yolunu necə görürsünüz?

- Bunun üçün ilk növbədə tarixi şərait yetişməlidir. Bu tarixi şəraitin yetişməsini isə xalqımızın öndə olan təmsilçiləri sürətləndirməlidir. Bizim atacağımız addımlar dünyanın bölünmüş bir xalqın taleyinə biganəliyini aradan qaldırmaqdır.

- Digər diaspor qurumları əlaqələriniz hansı səviyyədədir?

- Bu sahədə fəaliyyət göstərən təşkilatlar və qurumlarla əməkdaşlıq təşkilatımız üçün prioritet (öncəlik) məqsədlərdən biridir. Belə ki, istər Böyük Britaniyanın müxtəlif şəhərlərində fəaliyyət göstərən tələbə cəmiyyətləri, istərsə də digər ölkələrdəki diaspor təşkilatları ilə əməkdaşlıq edirik. Kanada, Norveç, Fransa, Almaniya, Rusiya, Ukrayna, Litva, Gürcüstan, Birləşmiş Ərəb Əmirlikləri, Misir, Qazaxıstan, Qırğızıstan, Koreya, Avstraliya və digər ölkələrdəki təşkilatlarla əməkdaşlıq əlaqələrimiz var. Bu gün erməni diasporu öz yalançı həqiqətlərinin yayılması istiqamətində dünya ictimaiyyətini çaşdırmaqla məşğuldur. Nə edə bilərik ki, bu yalançı informasiyalar az inandırıcı xarakter daşısın?Bunun üçün biz ilk növbədə təbliğatda da hücum mövqeyində olmalıyıq. Yəni ermənilərin yalanlarını yayacaqlarını gözləmədən reallıqları çatdırmalıyıq. Son illərdə diasporun bu işdə uğurlarını mütləq qeyd etməliyik. İndi ermənilərin qarşısına mütəşəkkil Azərbaycan diasporu çıxır. Bununla belə, bir reallığı qeyd etməliyik ki, erməni diasporunun yalanlarını yaymaq üçün xərclədiyi maliyyə öz işini görür. Gəlin açıq danışaq, bu gün dünyanın istənilən yerində təbliğat məsələlərində maliyyə faktoru mühüm rol oynayır. Dünya ictimaiyyətinin əlahiddə erməni sevgisində də bunu aydın görmək olar. Erməni diasporunun mühüm üstünlüyü yaşadıqları ölkələrdə seçki kampaniyalarına, media strukturlarına (yapısal, saxtar) pul ayıraraq onları ələ almalarıdır. Yaxın tarixdə ABŞ-da (Amerika Birləşmiş Ştatlarında) sığorta fırıldaqlarında adı hallandırılan ermənilərin cinayət yolu əldə etdikləri pulların bir hissəsini belə bu işlərə yönəltdiyini bütün dünya gördü. Təəssüf ki, dünyanın reallığı budur. Azərbaycan diasporunun da imkanlı üzvləri cəsarətlə təbliğata, xaricdə ölkəmizin maraqlarını qoruyacaq dostlarımızın çoxalmasına vəsait xərcləməlidir. Beynəlxalq ictimaiyyətlə onların xoşladıqları dildə danışmalıyıq.

- Qarşıda Azərbaycanın tanıdılması istiqamətində hansı layihələri həyata keçirməyə planlaşdırırsınız?

- “Odlar Yurdu” Diaspor Təşkilatının qarşısında dayanan və fəaliyyət planında prioritet kimi qeyd olunan əsas məsələlərdən biri bəzi ölkələrdə təşkilatın nümayəndəliklərinin təsis olunması və fəaliyyət coğrafiyasının genişləndirilməsidir. Avropanın bir ölkəsində (hələ ki adını bildirmək istəmirəm) Azərbaycan Evinin yaradılması, orada yaşayan Azərbaycan ailələrinin uşaqları üçün Azərbaycan dili kurslarının keçirilməsi kimi məqsədlər var.

Həmçinin qeyd etmək istəyirəm ki, aprelin 30-da Çexiyanın Paytaxtı Praqa şəhərində “Heydər Əliyev kuboku” adlı futbol turniri start götürəcək. Mayın 7-nə qədər davam edəcək turnirdə 12 ölkədən olan komandalar iştirak edəcək.

Söhbətləşdi: Elnur Eltürk