GünAz TV: İranın ali rəhbərliyində təmsil olunan şəxslər, dəqiq olaraq, ali dini lider ayətulla Əli Xameneyi və prezident Mahmud Əhmədinejad arasında ziddiyyətlər kəskin həddə yüksəlib.

Mətbuatın yazdığına görə, iş o yerə çatıb ki, hətta İran parlamentinin bir qrup deputatı (millət vəkili) prezidentə qarşı impiçment (istizah) təşəbbüsünə başlamaq niyyəti ilə çıxış edib. Bunu 2012-ci ildə keçiriləcək parlament seçkiləri ilə bağlayan ekspertlər (karşünaslar) hesab edir ki, bu qarşıdurmada üstünlüyü kim qazanarsa belə, bu, Tehranın xarici siyasətində özünü biruzə verməyəcək. İki lider arasında toqquşmanın kökü isə kadr siyasətinə gedib çıxır.

Aprelin 17-də İranın kütləvi informasiya vasitələri informasiya və kəşfiyyat işləri üzrə nazir Heydər Moslehnin istefaya göndərildiyi barədə xəbər yaydılar. Bu istefanın təşəbbüskarı qismində isə Prezident Administrasiyasının rəhbəri İsfəndiyar Rəhim Maşayinin çıxış etdiyi bildirilir. Bu şəxs isə Əhmədinejadla qudadır. Belə ki, Əhmədinejadın oğlu onun qızını alıb. «Prezident Administasiyasının rəhbəri hesab edir ki, Moslehinin atdığı addımlar ideoloji qaydalar çərçivəsinə uyğun gəlmir» - deyə Müasir İranın öyrənilməsi Mərkəzinin rəhbəri Rəcəb Səfərov «Kommersant»a bildirib. O, nazirin müxalifət nümayəndələrinə və onun nəzarətində olan KİV-lərə (kütləvi informasiya vasitələrə) qarşı münasibətdə yumşaqlıq göstərdiyi qənaətindədir. Bununla bağlı isə o, daim prezidentə məlumat verib. Görünür, hansısa mərhələdə bu fikirləri ilə prezidenti inandıra bilib.

Lakin İranın dini lideri Heydər Moslehinin istefasına müqavimət göstərmək qərarına gəlir. Belə ki, nazirin ali dini liderin yanında böyük etimada sahib olduğu bildirilir. Nəticədə Xameneyi prezidentin bu qərarını dəstəkləmədi. Böyük Britaniyanın «The Guardian» qəzeti iddia edir ki, Əhmədinejad artıq ikinci dəfədir ki, nümayişkaranə şəkildə hökumətin iclaslarına qatılmır. Həftənin əvəlində isə İranın dini mərkəzi hesab edilən Qum şəhərinə getməkdən belə imtina edib. Kadr siyasəti İranın iki liderini ilk dəfədir ki, toqquşdurur. Ötən ilin dekabrında prezident İranın XİN (xarici işlər naziriliyinin) rəhbəri Mənuçöhr Mottakini istefaya göndərib. Özü də nazir həmin vaxtda xarici ölkələrdən birində rəsmi səfərdə idi. Onun yerinə isə prezident öz adamını, nüvə məsələlərinə cavabdeh olan Əli Əkbər Salehini təyin etdi. Bu, dini liderə xoş gəlməsə də, Xameneyi nəyisə dəyişmək istəmədi. Rusiya Elmlər Akademiyasının Yaxın və Orta Şərq İntisttununun baş elmi işçisi Vladimir Sotnikov bildirir ki, prezident bir sıra aparıcı nazirliklərə namizədləri irəli sürsə də, bunlar çox vaxt dini lider tərəfindən qəbul edilmir. Qarşıdurma var və bu, daim genişlənir. Ali lider Əhmədinejadın daxili siyasətdə yürütldüyü bir sıra metodları o qədər də bölüşmür. Eyni zamanda o, prezidentin xarici siyasətlə bağlı səsləndirdiyi qalmaqallı bəyanatlarından da məsafə saxlayır.

Ekspertlərin qənaətincə, dini liderlə İran prezidenti arasında qarşıdurmanın səbəbi sonuncunun daim artan nüfuzu ilə bağlıdır. İlk növbədə o, aktiv (fəal) şəkildə qarşıdan gələn parlament seçkilərinə hazırlaşır. Prezident açıq şəkildə bildirirdi ki, öz yerinə İsfəndiyar Rəhim Maşayini hazırlayır. Görünür, ayətullahın səbri tükəndiyiyndən, o, parlamentdə 12 deputatın əli ilə prezidentə qarşı impiçmentin qaldırılmasını ortaya atıb. Bütün bunlara baxmayaraq, yuxarıda qeyd etdiyimiz kimi, bu qarşıdurmadan köklü hansısa bir dəyişiklik gözləmək yersiz olardı. kaspi