GünAz TV: İstanbulda silahlı basqına məruz qalan məşhur türk müğənnisi İbrahim Tatlısəsin sol tərəfi iflic olacaq. Həkimlərin ehtimalları məhz bundan ibarətdir.

Xatırladaq ki, «İmperator» ləqəbli müğənni «Bəyaz TV»-də «İbo Şou» proqramından çıxarkən iki naməlum şəxs tərəfindən odlu silahla basqına məruz qalıb. Basqın zamanı müğənninin mətbuat katibi Buket Çakıcı boğazından, sənətçinin özü isə başından yaralanıb. Özəl Levent Xəstəxanasına aparılan müğənni sonradan Maslak Acıbadem Xəstəxanasına köçürülüb. 5 saat davam edən əməliyyatın ardından Tatlısəs reanimasiya şöbəsinə yerləşdirilib.

Maslak Acıbadem Xəstəxanasının baş həkimi Çağlar Çuhadaroğlu müğənninin həyatına qarşı təhlükənin davam etdiyini bildirməklə yanaşı, xəstəxanaya gətirildiyindən bu yana irəliləyişin də olduğunu dilə gətirib. Tatlısəsin beyin pərdəsində və beynin içində yaralanma üzündən qanaxma baş verib. Çuhadaroğlu əvvəlcə bu qanaxmanı dayandırdıqlarını, daha sonra ümumi cərrahiyyə əməliyyatı həyata keçirdiklərini deyib. Güllə müğənninin başına arxadan girib ön hissədən çıxıb və sağ baş sümüyündə sınıq yaranıb. Çuhadaroğlu sənətçinin sağ qalacağı halda bədəninin bir hissəsinin iflic vəziyyətində qala biləcəyi ehtimalının böyük olduğunu bildirib. Baş həkim Tatlısəsin 24 saat ərzində anesteziya halında yatırdılacağını və vəziyyətinin bu şəkildə qiymətləndiriləcəyini söyləyib. Çuhadaroğlu müğənninin burun nahiyəsində də güllə izlərinin aşkarlandığını qeyd edib.

Tatlısəslə eyni maşında olan mətbuat katibi Buket Çakıcı da əməliyyat olunub. Çuhadaroğlu onun vəziyyətinin Tatlısəslə müqayisədə daha yaxşı olduğunu bildirib. Güllə Çakıcının boğazında çiyinə yaxın nahiyəni yaralayıb.

"Bundan sonra sağalsa da artıq İbrahim Tatlısəsin səhnə həyatı bitdi". Bunu jurnalistlərə açıqlamasında İbrahim Tatlısəsin qardaşı Hüseyn Tatlı bildirib. Onun sözlərinə görə, hər iki əməliyyatda qardaşının yanında olub.

“Mən onun üzünü yaxından gördüm. Mələklər kimi yatırdı. Üzü ağ idi. Bundan sonra sağalsa da artıq Tatlısəsin səhnə həyatı bitdi. Artıq pərəstişkarları onu disklərdən dinləyərlər”, deyə Hüseyn Tatlı qeyd edib.

O buna səbəb kimi qardaşının iflic olma ehtimalının yüksək olduğunu bildirib. Bununla belə o, əlavə edib ki, hər şeyi zaman göstərəcək.

Müğənniyə qarşı sui-qəsdin baş verməsi ilə bağlı 3 versiya səsləndirilir.

I- siyasətə qoşulan İbrahim Tatlısəsin nüfuzu böyük olduğundan siyasi rəqibləri onu aralarında görmək istəmir,

II- PKK izidir, çünki hadisə yerindən tapılan giliz və güllələrin aid olduğu “Kalaşnikov” silahından daha çox PKK-çılar istifadə edir,

III İbonun Şimali İraqda tikinti sektoruna girməsidir. Belə ki, müğənninin ilyarım əvvəl bu ölkədə tikinti sahəsinə böyük məbləğdə vəsait qoyması bəzi tikinti sahibkarlarını narahat edir.

Hazırda polis araşdırmaları davam etdirir. Son məlumatlara görə, hadisəni törədənlər ən azı 2 nəfər olub.

Ölkənin baş naziri Rəcəb Təyyib Ərdoğan xəstəxana rəhbərliyi ilə biribaşa əlaqə saxlayaraq, "İmperator"un səhhəti ilə yaxından maraqlanıb. Xəstəxana rəhbərliyinə 4 dəfə zəng edən baş nazir xəstənin yaxşılaşması üçün lazım olan bütün tədbirlərin görülməsini tapşırıb.

Hadisə şahidləri isə sənətkarın yaralandıqdan sonra dediyi son sözləri açıqlayınlar. Onların sözlərinə görə, qan içində yerdə yatan İbrahim Yatslısəs qırıq-qırıq, amma düzgün tələffüzlə belə deyib: “Olurmu yaaa? Olurmu hiç?”.

Hələlik "İmperator"un bu sözləri nə mənada dediyi bilinmir. Bizim yol