GünAz TV: Politoloq bildirib ki, İranın Azərbaycanda qarışıqlıq, əhalinin müxtəlif kateqoriyaları (kəsimləri, teyfləri) arasında qarşıdurma yaratmaq cəhdləri var və bu, özünü müxtəlif şəkildə büruzə verir.

ABŞ-ın (Amerika Birləşmiş Ştatları) qlobal analitik (təhlilçi) şirkəti "Stratfor" Azərbaycanın yerləşdiyi regionu (bölgəni) və İran-Azərbaycan-Rusiya münasibətlərini və hazırkı siyasi vəziyyəti, eyni zamanda müxtəlif mövzular ətrafında təhlillər aparıblar.

"Stratfor" ekspertləri (karşünasları) hesab edir ki, İran Azərbaycanda xırda narazılıqlar yaratmaqda davam edəcək. Onların qənaətincə, rəsmi Tehran belə narazılıqların yaradılmasında maraqlıdır və bundan əl çəkmək niyyətində görsənmir: "Əgər İran Azərbaycana qarşı daha sərt addımlar atsa, bu, Rusiyanın müdaxiləsinə səbəb olacaq".

"Stratfor"un ekspertlərinin bu təhlilini şərh edən politoloq (siyasətşi) Qabil Hüseynli "Şərq"in əməkdaşına deyib ki, İranın Azərbaycanda qarışıqlıq, əhalinin müxtəlif kateqoriyaları (kəsimləri, teyfləri) arasında qarşıdurma yaratmaq cəhdləri var və bu, özünü müxtəlif şəkildə büruzə verir: "Məsələn, dindar kəsimlə, xüsusilə daha çox siyasiləşmiş islamın tərəfdarları ilə dinini sevən, dini mərasimlərə əməl etməyə vadar olan və yaxud da ki, ümumiyyətlə, ateist olan şəxslər arasında müəyyən qarşıdurma yaratmağa çalışırlar. O zaman bu məsələdə qadınların baş örtüyü məsələsi xüsusilə qabardıldı. Guya, qadınların hicab geyməsi insan haqları ilə bağlı olan məsələdir. Çünki bu, qadınların inancı ilə əlaqədardır və ona görə də Azərbaycan hökuməti hicab məsələsində bu işlərə qarışmamalıdır. Bu, tamamilə haqsız bir ideyadır. Azərbaycan qadınları çadra və ya siyasiləşmiş islamın uniforması olan hicabı taxmayıblar. Bizim qadınlar əsasən yaylıq, şal və yaxud da ki daha geniş yayılmış kələğayı geyinib. Bu da Azərbaycan qadınının ənənəvi baş börtüyü olub və onun isə dinlə heç bir əlaqəsi yoxdur. İran isə müxtəlif mərasimlərdə bu məsələləri daha da qabartmağa çalışır. Məhərrəmlik dövründə İranın fəaliyyəti daha da güclənir. Çünki həmin dövrdə Azərbaycana gələn ruhani xadimlərin axını da güclənir. Onlar çalışırlar ki, müxtəlif məscidlərdə, hüzr yerlərində İran inqilabının ideyalarını, şiəliyin fundamental (bonyadi) dəyərlərini məruzə etməyə çalışırlar".

   Q.Hüseynli hesab edir ki, "Stratfor"un "Rusiya müdaxilə edər" fikri Azərbaycanın heysiyyatına toxunan ifadədir və məsələdir. Çünki Azərbaycanın kifayət qədər güclü dövlət olduğunu deyən politoloq əlavə edib ki, buna görə də Bakı İranın hər hansı bir müdaxiləsinə cavab verə bilmək qüdrətinə malikdir: "İran da açıq-saçıq formada Azərbaycana hərbi müdaxilə etməyəcək. Əsasən daxildəki 5-ci kalonu işə salmağa çalışacaq. Yəni nəzarətində olan agentura şəbəkəsini (casus şəbəkəsi), dindar təbəqələrini işə salmağa çalışa bilər. Əlbəttə ki, Azərbaycanda "Hizbullah", "Ceysullah" tipli qurumların yaradılmasına da cəhd edə bilər. Amma mən inanmıram ki, bu proses Azərbaycanda populyarlıq qazansın və bu tipli təşkilatlar yaranaraq ölkəmizdə terror hərəkətlərini həyata keçirməyə çalışsınlar. Azərbaycan dövlətinin bunların qarşısını almağa qüdrəti çatar. Rusiyaya gəldikdə isə bildirim ki, hazırda Moskva Bakı ilə müəyyən sahələrdə kəşfiyyat, informasiya məlumatlarını mübadilə edir. Amma Rusiya başqa şəkildə bunun qarşısını almaq üçün hər hansı bir hərəkət etməz. Buna heç Azərbaycan da razı olmaz. Çünki bizim özümüzün bunun qarşısını almağa yetərincə gücümüz var".