GünAz TV: Belə getsə beynəlxalq ictimaiyyət Azərbaycan hakimiyyətini də İrana qarşı BMT (Birləşmiş Millətlər Təşkilatı) Təhlükəsizlik Şurasının  sanksiyalarına (təhrimlərinə) qoşulmağa məcbur edəcək.

Yaxud Tehran hakimiyyəti Azərbaycan Respublikasının (Cümhuriyyətinin) daxili işinə qarışmağı dayandırmazsa, Ermənistana yardımlarını azaltmazsa, o halda bu addımı atmağa rəsmi Bakı məcbur olacaq.

Xəbərlərə görə, yaxın günlərdə BMT Təhlükəsizlik Şurasının İrana qarşı sanksiyalar üzrə rəsmi nümayəndə heyəti Azərbaycana gələcək. Bu haqda müsahibə verən, komitənin başçısı Salome Zurabişvili deyib.

Gürcüstanın keçmiş xarici işlər naziri, müxalif Gürcüstan Yolu Partiyasının lideri Salome Zurabişvili BMT Təhlükəsizlik Şurasının yaratdığı İran üzrə qrupa ötən ilin sonunda  rəhbər təyin edilib.

Yeri gəlmişkən, ğtən ilin  noyabrında  Salome Zurabişvili jurnalistlərə açlqlamasında Gürcüstandakı siyasi fəaliyyəti ilə bağlı məsələyə toxunaraq,  demişdi ki, o, Gürcüstanı və müxalifəti müvəqqəti tərk edir, amma ölkədə əlverişli şərait yetişəndə hökmən qayıdacaq: “İndi mən Gürcüstana nə zaman qayıdacağımı deyə bilmərəm. Amma ölkənin həyatında fəal iştirak etmək üçün hökmən qayıdacağam. Bu gün Gürcüstanda müxalifətin tam fəaliyyəti üçün əsl demokratiya yoxdur. Belə şəraitdə müxalifət olmaq hakimiyyətin illüziyasında iştirak etmək deməkdir”.

Salome Zurabişvili 1952-ci ildə Fransada gürcü ailəsində doğulub. 2004-cü ildən 2005-ci ilin oktyabrına qədər Gürcüstanın xarici işlər naziri işləyib.

İranın Azərbaycan Respublikasındakı səfirliyinin mətbuat  katibi Abbas İsgəndəri bildirib ki, bu il martın 7-8-də Azərbaycan Respublikasının xarici işlər naziri Elmar Məmmədyarov İrana səfər edəcək.

Onun sözlərinə görə, səfər zamanı nazirin hökumətlərarası iqtisadi əməkdaşlıq  komisiyanın 8-ci iclasına qatılacağı gözlənilir. E.Məmmədyarov Azərbaycan tərəfdən, Əliəkbər Salehi isə İrandan bu qurumun həmsədridirlər.

Komisiyaının sonuncu iclası 2008-ci ilin martında Bakıda keçirilib. A. İsgəndəri bildirib ki, 2010-cu ildə Azərbaycanla İran arasında xarici ticarət dövriyyəsi 243,219 milyon dollar təşkil edib. Bunun 124,98 milyon dolları ixrac əməliyyatının, 118,24 milyon dolları isə idxalatın payına düşür.

Onun sözlərinə görə, bu günlərdə iclasın gündəliyini hazırlamaq üçün mütəxəsislərin görüşü keçiriləcək.

Xatırladaq ki, keçən ilin payızında Bakıya səfəri zamanı İranın ticarət naziri Mehdi Qəzənfəri  bildirmişdi ki, 2009-cuildə iki ölkə arasındakı ticarət dövriyyəsi 550 milyon dollar təşkil edib. «Bir sıra maneələri aradan qaldırsaq, o zaman bu göstəricini bir milyard dollara qaldıra bilərik»-deyə nazir bildimişdi.

Nazirin bir neçə ay öncə verdiyi  bu müsahibədən və səfirliyin mətbuat katibinin dediklərindən göründüyü kimi Azərbaycanla İran arasındakı ticarət dövriyyəsinə BMT Təhlükəsizlik Şurasının tətbiq etdiyi sanksiya təsirsiz ötüşməyib. Belə ki üçüncü sankisyadan sonrakı  bir il ərzində ticarət dövriyyəsi iki dəfə azalıb.

Bu baxımdan hökumətlərarası komissiyanın iclasında İrana qarşı sanksiyalar və iki dövltə arasında ticarət dövriyyəsinin durumunun da müzakirə ediləcəyini ehtimal etmək olar.  Sədrəddin Soltan