GünAz TV: 2011-ci il fevralın 26-da (isfəndin 7-i) Xocalı faciəsinin ildönümü ilə bağlı İsveçin başkəndi Stokholmun mərkəzində möhtəşəm etiraz aksiyası keçirildi.

Bu etiraz aksiyasında təxminən 200 yüzdən artıq insan iştirak etmiş və onlar bu vasitə ilə də istəmişdirlər ki, Xocalı faciəsi İsveç və beynəlxalq ictimaiyyətin diqqət mərkəzində olsun. Aksiya keçirilən Serqestorg meydanı Xocalı hadisəsini və Qarabağ işğalını özündə əks etdirən ingilis dilində xüsusi plakatlarla

bəzədilmişdi. Və bundan əlavə, Xocalının işğalı zamanı qətlə yetirilənlərin, yaralı və qaçqınların fotolarından ibarət 6 böyük sərgi hazırlanmışdı. İsveç dilində hazırlanmış xüsusi bülleten meydana gəlib-gedən əhali arasında paylanmışdır. Qeyd etməliyik ki, aksiyadan bir neçə gün əvvəl 5 min nüsxədə Xocalı hadisəsi haqqında isveç dilində hazırlanmış xüsisi bülletenlər azərbaycanlılar tərəfindən evlərə paylanmışdır. İsveç dilində hazırlanmış hadisənin mahiyyətini faktlarla (dəlillərlə , sübutlarla) izah edən 3 musiqili kompozisiya Qarabağ şikəstəsi üstə yüksək səsdə meydanda səsləndirildi. Aksiyada müxtəlif dillərdə -- azərbaycan, türk, isveç, ingilis fars dillərində çıxış edənlər, birmənalı şəkildə Qarabağın işğalın pisləyərək, dünya ictimaiyyətini bu vəhşilikdən xəbərdar olmağa səsləmişdirlər. Tədbirdə 3 dildə -- azərbaycan, isveç və ingilis dillərində Qətnamələr oxunmuşdu.

İki saatdan artıq davam edən bu tədbirdə təkcə Stokholmda yaşayan azərbaycanlılar deyil, eyni zamanda Linköpinqdəki dərnəklərdən nümayəndələr, Upsala şəhərində təhsil alan azərbaycanlı və türk tələbələrin nümayəndələri, Vesteros şəhərindən, Malmö və Norveçdən soydaşlarımız aksiyaya qoşulmuşdurlar. Eyni zamanda Doğu Türküstandan uyğur türkləri, Qazaxıstan türkləri, Kərkük türkləri və Stokholmdakı çeçen cəmiyyətindən nümayəndələr öz milli bayarqları ilə bizlə bir yerdə həmrəyliklərini nümayiş etdirdilər.

Aksiyada oxunan Qətnamə:

 Dünya işğal olunmuş Vətənimizi düşmənlərdən azad edəcəyimizə şübhə etməməlidir

  1992 - ci il fevralın 25 - dən 26 - na keçən gecə Ermənistan silahlı qüvvələri rus ordusunun 366 - cı alayının (Hənginin) köməkliyi ilə Azərbaycan şəhəri olan Xocalıya hücum edib, bütün beynəlxalq qayda-qanunlara zidd olaraq, əliyalın sivil əhaliyə qarşı qanlı cinayətlər törətmişdir.Ermənilərin törətdiyi bu cinayət nəticəsində 613 nəfər dinc insanımız öldürüldü ki, onların 63 - ü uşaq, 106 - sı qadın və 70 nəfəri yaşlı adamlardır. 8 ailə tamamilə məhv edildi, 25 uşaq hər iki valideyinindən, 130 uşaq isə valideyinlərinin birindən məhrum oldu, 487 nəfər yaralandı, onların 76 - sı azyaşlı uşaqlardır. Erməni faşistləri 1275 baci-qardaşımızı girov apardi, onlara görünməmiş işgencə verməkdən, bir çoxlarını əzab verərək öldürməkdən çəkinmədi. Düzdür, sonradan beynəlxalq təşkilatların köməyi ilə bu əsirlərin bəziləri Azərbaycana qaytarıldı. Lakin, o gecə itkin düşmüş 150 nəfərdən hələ də xəbər yoxdur.

Beynəlxalq İnsan Haqları Təşkilatı ( Human Rights Watch) Qarabağ konfiliktində Xocalı faciəsini ən böyük kütləvi qırğın adlandırmışdır. Moskvada yerləşən İnsan Haqlarını Müdafiə Təşkilatı yaydığı bildirişdə qeyd etmişdir ki, Ermənistanın silahlı qüvvələri kütləvi şəkildə silahsız dinc əhalini öldürmüşdür. Bu əməl təbii ki, beynəlxalq insan haqlarının təməl prinsiplərinə tamamilə ziddir. Bundan əlavə, Xocalıda baş verən faciə dünya mətbuatında əksini tapmışdır, belə ki, bu qətliam barədə kifayət qədər film, şəkil, sənəd və digər sübutlar ortadadır. Amma çox təəssüf ki, bu gün erməni təcavüzün məruz qalmış bir millət olaraq coxsaylı suallar qarşısındayıq…

Görəsən niyə ermənilərin Xocalıda millətimizə qarşı törətdiyi bu soyqırım indiyədək beynəlxalq miqyasda nə siyasi, nə də hüquqi qiymətini almayıb? Xocalı faciəsi ilə bağlı bu qədər sübut və fakt olduğu halda, nə üçün indiyədək bu qırğına rəhbərlik etmiş Köçəryan, Sərkisyan və digərləri hərbi cinayətkar kimi məsuliyyətə cəlb olunaraq məhkəmə qarşısında oturdulmurlar? Məgər Xocalıda baş verənlər keçmiş Yuqoslaviyadakı cinayətlərdən coxmu fərqlənir? Onu da nəzərə alın ki, hələ də Azərbaycanın 20 % ərazisi təcavüzkar, qəsbkar Ermənistanın silahlı qüvvələrinin işğalı altındadır. Baxmayaraq ki, BMT 4 dəfə Ermənistana qarşı qətnamə qəbul edib və ondan tələb edib ki, Azərbaycanın qəsb olunmuş ərazisini tərk etsinlər. Ermənistan isə bu qətnamələrə məhəl qoymayıb və bu gün Azərbaycanda 1 milyondan artıq müharibə qaçqını ağır şəraitdə yaşamaqdadır.

Biz, aksiya iştirakçılari rəngindən, dinindən, əqidəsindən asılı olmayaraq bütün insanlara müraciət edərək onlardan bizimlə həmrəy olmalarını xahiş edir, ABŞ və Avropa Birliyinin üzvü olan dövlətlərdən, eləcə də BMT - dən tələb edirik:

1.Biz inanırıq ki, cinayətə göz yummaq, cinayətin təkrarına zəmin yaratmaqdır. Elə bu səbəbə görə, Cenevrə konvensiyasının əsas müddəalarını pozaraq Azərbaycan ərazisində dəhşətli soyqırım törətmiş bütün erməni hərbi cinayətkarları təxirəsalmadan beynəlxalq məhkəmədə mühakimə olunsunlar.

2. Ermənistanın işğalçı silahlı qüvvələri dərhal və qeyd-şərtsiz Azərbaycan ərazisini tərk etsin.

3. Ermənistan Qarabağ müharibəsində itkin düşən azərbaycanlıların taleyi ilə bağlı beynəlxalq təşkilatlarla əməkdaşlıq etsin.

4. Ermənistan işğal nəticəsində Azərbaycana vurduğu maddi ziyana görə təzminat ödəsin.

5.Əgər Ermənistan Azərbaycan ərazilərini dərhal tərk etməsə və Azərbaycan xalqına qarşı cinayət törətmiş şəxslərin cəzalandırılmasına mane olsa, onda dünya birliyi tərəfindən bu dövlətə qarşı en sərt siyasi və iqtisadi sanksiyalar tətbiq olunsun.

6.Biz İsveçdə yaşayan Azərbaycanlılar bu ölkənin hökumətindən və parlamentindən Qarabaq probleminin həlli prosesində yaxından iştirak etməyi, bu zaman haqq və ədalətin müdafiəsində durmağı tələb edirik.

Sonda onu da xatırlatmaq istəyirik ki, Azərbaycanın əzəli torpağı olan Qarabağ qeyd-şərtsiz olaraq erməni işğalından azad edilməsə, təbii ki, müharibə qacılmaz olacaq. Mitinq iştirakçıları olaraq bəyan edirik ki, Azərbaycan ordusunun bu missiyanın öhdəsindən layiqincə gələcəyinə inanırıq və bu müharibə zamanı xalqımız və Vətənimizlə bir yerdə olacağıq. Dünya birliyi biz Azərbaycan türklərinin öz torpağını hər zaman azad etmək qüdrətində olduğumuza və bunu həyata keçirəcəyimizə zərrə qədər də şübhə etməməlidir!

İSVEÇDƏ YAŞAYAN AZƏRBAYCANLILARIN KOORDİNASIYA ŞURASININ QARABAĞ KOMİTƏSİ

2011.02.26

Azad tribun