GünAz TV: Soydaşlarımız Xocalı Soyqırımının 19-cü ildönümü ilə bağlı müxtəlif anım mərasimləri, aksiyalar reallaşdırıblar.

Dünyanın müxtəlif ölkələrində Xocalı faciəsi ilə bağlı anım tədbirləri, müxtəlif aksiyalar keçirilib. "Xocalıya ədalət" kampaniyası çərçivəsində Böyük Britaniyanın Lordlar Palatasında Xocalı soyqırımı ilə bağlı konfrans baş tutub.

"Xocalıya ədalət" kampaniyası və Avropa Azərbaycanlılarının Cəmiyyətinin (TEAS) təşkilatçılığı ilə baş tutan tədbirdə Lordlar Palatasının üzvləri, britaniyalı jurnalistlər və ictimai xadimlərin iştirak etdiyi konfransda kanadalı ekspert (karşünas), Xocalı faciəsini tədqiq etmiş Skot Teylor və lord Layard əsas məruzəçilər kimi çıxış ediblər.

Birləşmiş Ərəb Əmirliklərinin (BƏƏ) nüfuzlu "Al-Bayan" qəzetində Xocalı soyqırımına həsr olunan məqalə dərc edilib. "Azərbaycan Xocalı soyqırımı qurbanlarının xatirəsini yad edir" başlıqlı məqalədə Xocalı soyqırımının 19-cu ildönümü münasibəti ilə BƏƏ-dəki Azərbaycan diasporunun Türkiyə, ərəb və digər millətlərin icmalarının iştirakı ilə keçirdiyi simpoziumdan bəhs olunur. Məqalədə ermənilərin rus ordusunun 366-cı alayının (Hənginin) dəstəyi və iştirakı ilə Xocalıda soyqırımı törətdikləri və bunun nəticəsində 613 dinc sakinin qətlə yetirildiyi, 487 nəfərin yaralandığı, 1275 nəfərin isə əsir götürüldüyü qeyd olunur.

Qəzet BƏƏ-dəki Azərbaycan Cəmiyyətinin sədri Samir İmanovun tədbir zamanı Xocalı və erməni işğalı altında olan digər Azərbaycan torpaqlarının sakinlərinin hazırda qaçqın vəziyyətinə düşdükləri və ölkənin 48-ə yaxın müxtəlif şəhər və rayonlarında məskunlaşdıqları barədə söylədiyini yazır. "Qaçqınlar artıq uzun müddətdir gözləyirlər ki, Dağlıq Qarabağ problemi tezliklə və ədalətli həllini tapacaq, Ermənistanın Azərbaycana qarşı təcavüzünə və apardığı müharibəyə son qoyulacaq və Azərbaycan Respublikasının (Cümhuriyyətinin) ərazi bütövlüyü tam bərpa olunacaqdır", - deyə "Al-Bayan" qəzeti yazır.

   Türkiyə Strateji Araşdırmalar Mərkəzinin (TÜRKSAM) və Dünya Azərbaycanlıları Konqresinin (DAK) təşkilatçılığı ilə TÜRKSAM-da Xocalı Soyqırımının 19-cu ildönümü münasibətilə geniş tərkibli anım tədbiri həyata keçirilib. Tədbirdə, Xocalı soyqırımı ilə əlaqədar çoxsaylı tədbirlərdə iştirak etmək məqsədilə Türkiyədə səfərdə olan DAK nümayəndələri, Türkiyənin millət vəkilləri, səfirliyimizin nümayəndələri, Türkiyənin müxtəlif fikir quruluşlarının nümayəndələri, diaspor fəalları da iştirak ediblər.

   Azərbaycan-Amerika Şurasının (Azerbaijani-American Council) və Toronto Universitetinin Azərbaycanlı Tələbələr Assosiasiyasının (Azerbaijani Student Association at the University of Toronto) birgə təşkilatçılığı ilə tədbir keçirilib. Tədbirdə çıxış edən Azərbaycan-Amerika Şurasının baş direktoru Cavid Hüseynov (Javid Huseynov) tədbir iştirakçılarına Xocalı soyqırımının dəhşətləri barədə məlumat vermiş və bu faciəni digər kütləvi qırğınlarla müqayisə etmişdir. Tədbirin sonunda millət vəkili Qənirə Paşayevanın təşəbbüsü ilə çəkilmiş "Soyqırım" filmi nümayiş olunub.

   İslam Konfransı Gənclər Forumunun, Ukrayna Azərbaycanlı Gənclər Birliyinin və Ukrayna Azərbaycanlıları Konqresinin birgə təşəbbüsü və Azərbaycan səfirliyinin dəstəyi ilə Kiyev ART Qalereya sərgi salonunda Ukrayna rəssamlar ittifaqının üzvü Rasim Seydimovun əsərlərindən ibarət "Xocalı harayı" adlı rəsm sərgisinin açılışı olub. Tədbirdə çıxış edən Ukrayna Azərbaycanlı Gənclər Birliyinin mədəniyyət və informasiya departamentinin rəhbəri İlhamə Allahverdiyeva erməni vandalızminin dünya ictimaiyyətinə çatdırılmasında sərgilərin nümayiş etdirilməsinin müstəsna əhəmiyyətindən danışıb. Ukrayna Azərbaycanlıları Konqresi adından beynəlxalq təşkilatları və dünya birliyini Xocalı soyqırımına hüquqi siyasi qiymət verməyə səsləyən diaspora rəhbərlərindən İlqar Abbasov və Akif Gülməmmədov Ermənistan dövlətinin Xocalı soyqırımına görə tarix qarşısında cavab vermələrinin vacibliyini vurğulayıblar.

   Milli Məclisin deputatı (millət vəkili) Musa Qasımlı çıxışında bildirib ki, ermənilərin Azərbaycan xalqına qarşı həyata keçirdikləri işğalçılıq və soyqırım siyasətinə beynəlxalq ictimaiyyət biganə yanaşmamalıdır. "Azərbaycanlılara qarşı həyata keçirilən soyqırım siyasətində Ermənistan prezidenti Serj Sarkisyan da iştirak edib. Təəssüf ki, beynəlxalq təşkilatlar bu fakta göz yumurlar və ikili siyasət yürüdürlər", deputat deyib.

   Stokholmda isə keçiriləcək Xocalı soyqırımı ilə bağlı aksiyaya hər bir soydaşlarımız Azərbaycanın bayrağı və təmsil etdiyi təşkilatın simvolu ilə getməyəcək. İsveçdə yaşayan Azərbaycanlıların Kordinasiya (əlaqələndirmə) Şurasının Qarabağ Komitəsindən "Həftə içi"nə verilən məlumata görə bunlar yasaqlanıb: "Bütün bunlar yasaqdır. Unutmayaq ki, bizim bir hədəfimiz var, o da, Qarabağ, Xocalı. Biz burada yalnız birliyimizi nişan verməliyik".