GünAz TV: Dünyanın müxtəlif ölkələrində Xocalı faciəsinin 19-cu ildönümü ilə əlaqədar anım mərasimləri keçirilib və yeni mərasimlərin keçirilməsidə gözlənilir.

Xocalı faciəsinin 19-cu ildönümü ilə əlaqədar, Azərbaycan-Amerika Şurasının (Azerbaijani-American Council) və Toronto Universitetinin Azərbaycanlı Tələbələr Assosiasiyasının (Azerbaijani Student Association at the University of Toronto) birgə təşkilatçılığı ilə tədbir keçirilib.

APA-nın verdiyi xəbərə görə, tədbirdə çıxış edən Azərbaycan-Amerika Şurasının baş direktoru Cavid Hüseynov (Javid Huseynov) tədbir iştirakçılarına Xocalı soyqırımının dəhşətləri barədə məlumat vermiş və bu faciəni digər kütləvi qırğınlarla müqayisə edib.

Tədbirin sonunda millət vəkili Qənirə Paşayevanın təşəbbüsü ilə çəkilmiş “Soyqırım” filmi nümayiş olunub.

Meksikada da Xocalı soyqırımına həsr olunan konfrans keçirilib

“Xocalıya Ədalət” beynəlxalq kampaniyası çərçivəsində Meksikada təşkil olunan toplantıda Xocalı soyqırımı, Ermənistanın Azərbaycana qarşı təcavüzü və münaqişənin tarixi kökləri, son iki yüz il ərzində xalqımıza qarşı törədilən etnik təmizləmə və deportasiya siyasəti haqqında məlumat verilib. Xocalıda baş verən hadisələri soyqırım adlandıran Meksika-Azərbaycan Parlamentlərarası Dostluq Qrupunun sədri Markos Peres “Xocalının yer üzündən hər hansı təbii fəlakət nəticəsində deyil, məhz insan əli ilə dünya xəritəsindən silindiyini” bildirib. O, Meksika Konqresinin də sözügedən hadisələrə laqeyd qalmayacağını və Xocalı soyqırımı haqda öz ədalətli mövqeyini bildirəcəyinə inandığını deyib. (İTV)

Küveytdə də Xocalı faciəsi qurbanlarının anım mərasimi keçirilib.

Azərbaycan Respublikasının (Cümhuriyyətinin) Küveyt Dövlətindəki Səfirliyindən daxil omuş məlumata əsasən, 2011-ci il fevral ayınının 21-də AR-nın Küveytdəki Səfirliyində Xocalı faciəsinin qurbanlarının anım mərasimi keçirilib. Xarici İşlər Nazirliyinin mətbuat xidmətindən SİA-ya verilən xəbərə görə, tədbirə Küveytdə yaşayan, çalışan həmvətənlərimiz, habelə, ölkənin tanınmış ictimai-siyasi xadimləri və nüfuzlu kütləvi informasiya vasitələrinin nümayəndələri dəvət olunublar.

Tədbir iştirakçıları Səfirlikdə nümayiş etdirilən “Xocalı qurbanları” fotosərgisi ilə müxtəlif illərdə çap olunan nəşrlərlə tanış olmuş, qanlı faciə barədə çəkilən sənədli filmə baxıblar.

Azərbaycan Respublikasının Küveyt Dövlətindəki Səfirliyinin təşəbbüsü və dəstəyi ilə “Perfect Printing Services” mətbəəsində ərəb dilində çap olunan “26 fevral 1992-ci il –Xocalı faciəsi” adlı kitab, ərəb dilində Xocalı faciəsinə həsr olunan sənədli filmin DVD-si və həmçinin Səfirliyin bəyənatı tədbir iştirakçılarına təqdim olunub. Qeyd edilən kitab və disk şəklində sənədli film Küveytin rəsmi qurumlarına, kitabxanalarına və kütləvi informasiya vasitələrinə də göndərilib.

Ukrayna paytaxtı Kiyevdə də “Xocalı harayı” adlı rəsm sərgisinin açılışı olub

İslam Konfransı Gənclər Forumunun ,Ukrayna Azərbaycanlı Gənclər Birliyinin və Ukrayna Azərbaycanlıları konqresinin birgə təşəbbüsü və Azərbaycan səfirliyinin dəstəyi ilə Kiyev ART Qalereya sərgi salonunda Ukrayna rəssamlar ittifaqının üzvü Rasim Seydimovun əsərlərindən ibarət “Xocalı harayı” adlı rəsm sərgisinin açılışı olub.

APA-nın verdiyi xəbərə görə, tədbirdə çıxış edən Ukrayna Azərbaycanlı Gənclər Birliyinin mədəniyyət və informasiya departamentinin rəhbəri İlhamə Allahverdiyeva erməni vandalızminin dünya ictimaiyyətinə çatdırılmasında sərgilərin nümayiş etdirilməsinin müstəsna əhəmiyyətindən danışıb. Ukrayna Azərbaycanlıları Konqresi adından beynəlxalq təşkilatları və dünya birliyini Xocalı soyqırımına hüquqi siyasi qiymət verməyə səsləyən diaspora rəhbərlərindən İlqar Abbasov və Akif Gülməmmədov Ermənistan dövlətinin Xocalı soyqırımına görə tarix qarşısında cavab vermələrinin vacibliyini vurğulayıblar.

Milli Məclisin deputatı Musa Qasımlı çıxışında bildirib ki, ermənilərin Azərbaycan xalqına qarşı həyata keçirtdikləri işğalçılıq və soyqırım siyasətinə beynəlxalq ictimaiyyət biganə yanaşmamalıdır.

“Azərbaycanlılara qarşı həyata keçirilən soyqırım siyasətində Ermənistan prezidenti Serj Sarkisyan da iştirak edib. Təəssüf ki, beynəlxalq təşkilatlar bu fakta göz yumurlar və ikili siyasət yürüdürlər” deputat deyib.

Azərbaycan Milli Elmlər Akademiyasının Fəlsəfə İnstitutun direktoru İlham Məmmədzadə isə çıxışında bildirib ki, Xocalı soyqırımından 19 il ötməsinə baxmayaraq, beynəlxalq təşkilatların və dünya birliyinin hələ də bu faciəyə hüquqi-siyasi qiymət verməməsi tarixi ədalətsizlikdir.

“Xocalı faciəsi təkcə əlli milyonluq azərbaycanlının deyil, bütün dünyanın faciəsidir. Hesab edirəm ki, dünya birliyi ermənilərin belə bir dəhşətli soyqırım siyasətinə göz yummaqla tarix qarşısında bu faciəni törətmək qədər bir məsuliyyəti öz üzərinə götürüb”, Məmmədzadə vurğulayıb.

Ukrayna Azərbaycanlı Gənclər Birliyinin sədri Anar Tahirov isə deyib ki, “Xocalıya ədalət” kampaniyası çərçivəsində Ukraynanın əyalət və şəhərlərində silsilə tədbirlər həyata keçirilib.

“İnanıram ki, Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət” kampaniyası çərçivəsində həyata keçirilən tədbirlərin erməni vandalizminin dünya ictimaiyyətinə çatdırılmasında müstəsna rol oynayacaq. Bu kampaniyada dünyada yaşayan bütün azərbaycanlı gənclər xüsusi fəallıq nümayiş etdirməklə vətəndaşlıq borcunu yerinə yetirməlidir” Tahirov çıxışında bildirib.

Gənc rəssamın Xocalı harayı mövzusunda çəkdiyi 26 rəsm əsərində ermənilərin Xocalıda uşaqlara qadınlara, qocalara və dinc əhaliyə qarşı həyata keçirtdikləri bəşəri cinayət avanqard cizgilərlə düşmənin vəhşilik obrazını özündə əks etdirir. Əsərlərində zülmətdən işığa yol açan rəssam xeyrin şər üzərində qələbə çalacağını bəşəriyyətə fəlsəfi düşüncələrinin dilə çatdırır. “Xocalı harayı” adlı sərgisi mart ayının 2-dək davam edəcək.

Həmçinin başqa Avropa ölkələri, Rusiya və Suriya kimi ölkələrdə də anoloji tədbirlər keçirilib.