GünAz TV: ABŞ (Amerika Birləşmiş Ştatları) Konqresinin Azərbaycan üzrə İşçi Qrupunun bir neçə üzvü Xocalı faciəsinin ildönümü ərəfəsində fəaliyyətini gücləndirib.

APA-nın Vaşinqton müxbirinin məlumatına görə, Texasdan olan Konqres üzvü Eddi Bernis Conson (Eddie Bernice Johnson) fevralın 18-də həmkarlarına müraciət edərək, 1992-ci il fevralın 26-da Azərbaycanın Dağlıq Qarabağ bölgəsinin Xocalı şəhərində dinc insanların işgəncəyə məruz qalması və öldürülməsi faktını anmağa çağırıb: "Çoxumuz bilirik ki, Şərqi Avropada və Mərkəzi Asiyada baş verən postsovet münaqişələri qanlı etnik təmizləmələrə gətirib çıxarıb, amma erməni silahlıları tərəfindən qətlə yetirilmiş Xocalı əhalisi haqqında az adam eşidib. Xocalıda etnik təmizləmə həyata keçirilib və şəhər yerlə-yeksan edilib. Faciə barədə mediada geniş məlumat verilməsinə baxmayaraq, bir çoxları bu hadisələri unudub. Ümid edirəm ki, biz hər il bu faciənin qurbanları üçün dua edə biləcəyik". E.B.Conson ümid etdiyini bildirib ki, Azərbaycan və Ermənistan Dağlıq Qarabağ münaqişəsini dinc yolla həll edə biləcək: "Ümid edirəm ki, indi əzab çəkən insanlar tezliklə etnik təmizləmənin sona çatdığını görəcək. Xocalı qadınlarının, kişilərinin və uşaqlarının xatirəsi bizi bu cür hadisələri pisləməyə yönəltməlidir". Pensilvaniyadan olan konqresmen, Azərbaycan üzrə İşçi Qrupun həmsədri Bill Şuster (Bill Shuster) də diqqəti Xocalı faciəsinə yönəldib: "Təəssüf ki, bu gün Azərbaycandan kənarda Xocalının ağrısını görən və anlayan çox azdır. Seçilmiş rəsmilər olaraq bizim ən böyük gücümüz ondadır ki, çox az adamın bildiyi həqiqəti üzə çıxaraq. Azərbaycanın dostu kimi həmkarlarıma xatırlatmaqdan qürur duyuram ki, biz Xocalıda baş verən faciəni heç vaxt unutmamalıyıq. Azərbaycan ABŞ-ın güclü strateji tərəfdaşı və dostudur. Xocalı faciəsi bəşəriyyət əleyhinə cinayətdir və mən həmkarlarımı azərbaycanlılarla birlikdə bu faciəni anmağa çağırıram". Konqresmen Stiv Koen Tennessi (Steve Cohen Tennessee) isə bəyan edib ki, Xocalıda qadınlara, uşaqlara və yaşlı insanlara qarşı ağlasığmaz vəhşilik törədilib: "Həmkarlarımı mənə və bizim azərbaycanlı dostlarımıza qoşularaq Xocalıda baş vermiş faciəni anmağa səsləyirəm". Konqresin Şimali Karolinadan olan üzvü Virciniya Foks (Virginia Foxx) qeyd edib ki, "Human Rights Watch", "Memorial" İnsan Haqları Mərkəzi və digər beynəlxalq müşahidəçilərin sözlərinə görə, Xocalı faciəsi erməni silahlı qüvvələri tərəfindən Rusiyanın 366-cı motoatıcı alayının köməyilə törədilib. O xatırladıb ki, "Human Rights Watch" Xocalı hadisəsini Dağlıq Qarabağ münaqişəsində ən böyük qətliam adlandırmışdı: "Bu qətliam dünya ictimaiyyəti tərəfindən pislənib. 2001-ci ildə Avropa Şurası Parlament Assambleyasının 30 üzvü 324 saylı yazılı bəyanat yayaraq bildirib ki, ermənilər Xocalı əhalisinə qarşı qətliam törədərək şəhəri yerlə-yeksan edib".