GünAz TV: Qəddafi bir günə 100-ə yaxın müxalifətçini öldürdü; Bəhreyn kralı isə müxalifəti gülləbaran etdirib sonra danışıqlara çağırdı.

Ərəb ölkələrində xalq etirazları ilə üzləşmiş avtoritar (istibdadçı) rejimlər Misir və Tunisdəki həmkarlarının aqibəti ilə üzləşməkdən qorxaraq nümayişçilərə qarşı odlu silah tətbiq edir. Xəbərlərə görə, Liviyada (Libidə) ölkənin hər yerini bürümüş etirazların yatırılması zamanı polis və təhlükəsizlik qüvvələri azı 84 nəfəri öldürüb.

Lakin rəqəmin daha böyük olacağı istisna deyil. “Human Rights Watch” insan haqları təşkilatının əldə etdiyi məlumatlara görə, Benqazi, Əl-Bayda, Acdabiyə, Derna və digər şəhərlərdə nümayişçilərə qarşı avtomat (xodkar) silahlar tətbiq olunub. Təkcə Benqazidə ölənlərin sayı 35-dən çoxdur. Xəstəxana mənbələri cəsədlərin daxil olmaqda davam etdiyini deyiblər.

Liviya rejimi ölkədə interneti kəsdiyindən baş verənlər barədə məlumat almaq çətinləşib, insan haqları müdafiəçiləri nə qədər adamın öldüyü barədə məlumatları telefonla əldə etməyə çalışırlar. Yaralananların sayı barədə heç bir məlumat yoxdur. Liviyada etirazlar tanınmış insan haqları müdafiəçisinin həbsinə etiraz olaraq başlayıb və sürətlə ölkənin hər yerinə yayılıb. 42 ilə yaxındır ölkəni idarə edən Müəmmər Qəddafi etirazları sakitləşdirmək üçün 100-dən çox siyasi məhbusu, o cümlədən həbs edilən insan haqları müdafiəçisini həbs etsə də, nümayişlər davam edib. Rejim nümayişçilərə qarşı zirehli texnika və ordu hissələri də yeridib. Dünyanın ən iri neft ixracatçılarından olan Liviyada bu cür etirazlar görünməmişdi və ekspertlərə görə, liviyalılar Tunis və Misir inqilablarından ruhlanaraq ilk dəfə Qəddafinin rejimini devirmək üçün küçələrə çıxıblar.

Xəbərlərə görə, nümayişçilər Qəddafinin ölkə konstitusiyasını (Anayasasını) əvəz edən “Yaşıl kitab”ının simvolu olan heykəli də yıxıblar. Etirazların paytaxt Tripoliyə (Trablos) də yayıldığı bildirilir.

Bəhreyndə də nümayişçilərə qarşı yenidən silah işlədilib. Fevralın 18-də paytaxt Manamada polisin şəhərin mərkəzi meydanında çadırlar quran nümayişçiləri dağıtması zamanı öldürülənlərin dəfn mərasimi izdihamlı aksiyaya çevrilib və ordu ilə qarşıdurma yaranıb. Ordunun paytaxtın mərkəzi meydanı yaxınlığında nümayişçilərə atəş açması nəticəsində onlarla adamın yaralandığı xəbər verilir. Meydana tanklar yeridilsə də nümayişçilərin qarşısını almaq mümkün olmayıb. “Amerikanın səsi”nin Bəhreyndəki müxbiri bir çox qurbanları xəstəxanada gördüyünü təsdiq edib və onun sözlərinə görə, onlarla yaralanan var. Xəstəxananın qarşısında toplaşan böyük izdiham “Rədd olsun Xəlifə!” deyə hayqırıb. ABŞ-ın (Amerika Birləşmiş Ştatları) 5-ci donanmasının qərargahının yerləşdiyi Bəhreyndə etirazları hakimiyyətə nəzarət edən sünni azlıq tərəfindən hüquqları pozulan şiələr başladıb, lakin sonradan sünnilər də onlara qoşulub. İndiyədək nümayişlərin dağıdılması zamanı azı 5 nəfərin öldüyü bildirilir. Ordunun nümayişçilərə qarşı atəş açmasından sonra Bəhreyn kralı öz varisini-şeyx Salman bin Hamid əl-Xəlifəni ölkənin siyasi qüvvələri ilə danışıqlara başlamaq tapşırığı verib. Lakin Bəhreynin əsas müxalif qüvvəsi sayılan şiə partiyası dialoq çağırışını rədd edib. Parlamentdən istefa verən müxalifət liderlərindən İbrahim Mattar deyib ki, hakimiyyətin küçələrə ordu çıxardığı bir vaxtda dialoqdan danışmaq mənasızdır.

Etirazlar isə bir-birinin ardınca digər ərəb ölkələrini də əhatə etməkdədir. Dünən Omanda siyasi, iqtisadi və təhsil islahatlarının aparılması tələbi ilə dinc nümayiş keçirilib. Nümayişçilər sultan Kabusu dəstəkləyən şüarlar səsləndirsələr də islahatlar və demokratik azadlıqlar tələb ediblər. Polis aksiyaya müdaxilə etməyib.

Etirazların baş qaldırdığı daha bir ölkə isə Cibutidir. BBC-nin xəbərinə görə, bu ölkədə minlərlə adam 33 ildən çoxdur ölkəni idarə edən prezident İsmayıl Ömər Gellenin istefası tələbi ilə küçələrə çıxıblar.

Əlcəzair, Yəmən və İordaniyada da etirazların davam etdiyi haqda xəbərlər gəlir.

Digər xəbərə görə, İsveçrə hakimiyyəti Misirin devrilmiş prezidenti Hüsnü Mübarəkin yaxınlarının bu ölkə banklarındakı bir neçə hesabını aşkar edib və oradakı vəsaitləri dondurub. Söhbət on milyonlarla İsveçrə frankından gedir, pulların konkret (Açıq) kimə aid olduğu məlum deyil. Yeni musavat