GünAz TV: Şərq inqilabları Qafqazın, Yaxın Şərqin, Əfqanıstan və Pakistanın xəritəsində inanılmaz dəyişikliklər yaradacaq.

Dünyanın ən güclü hərbi bloku sayılan NATO-nun Qafqaz və Yaxın Şərq üzrə yeni coğrafi xəritəsi bəlli olub. Bununla bağlı yayılan məlumatlardan belə aydın olur ki, xəritədə bir sıra ölkələrin ərazisi köklü dəyişikliklərə məruz qalıb. Xüsusilə də Yaxın Şərq ölkələri. İlk öncə Qafqaz, Ermənistan və Gürcüstanın mövcud ərazisi olduğu kimi qalır. Azərbaycan əraziləri isə genişlənir.

Dağlıq Qarabağ və tarixi cənub torpaqlarımız geri qaytarılır. Lakin Təbrizi çıxmaq şərtilə. Belə ki, Təbriz şəhəri yeni yaradılan "Azad Kürdüstan" dövlətinin ərazisində yerləşəcək. Kürdistanın ərazisi isə İranın qərb vilayətləri, İraqın şimalı, Türkiyənin şərq, Suriyanın şimal torpaqları hesabına mövcud olacaq. Eyni zamanda, İraq və Ərəbistan dövlətinin torpaqları hesabına üç dövlət yaranacaq. Ərəb Şiə, İraq Sünni və İslam Respublikası  (Cümhuriyyəti). Həmçinin, Ərəbistan torpaqlarının bir hissəsi Yəmən, İordaniya ərazisinə qatılacaq.

"SİA"nın araşdırmasına əsasən, İran da köklü dəyişikliklərə uğrayacaq. İranın şərq torpaqları, Pakistanın qərb əraziləri hesabına isə Əfqanıstan sərhədləri böyüyəcək. Əfqanıstan Pakistan və İran ərziləri hesabına isə "Azad Bəlucistan" dövləti yaranacaq. Ümumi vəziyyəti götürsək, mövcud olan xəritə real vəziyyəti əks etdirir. Çünki ərəb ölkələrində yaranan nümayişlər nəticəsində siyasi dəyişikliklər yaxın Şərqin coğrafiyasının da dəyişməsinə təsir edə bilər. İraq bütünlüklə dəyişməyə hazırdır.

Təbii ki, bu məsələdə daha çox maraq doğuran məqam Azərbaycanla bağlıdır. Xəritədən belə məlum olur ki, Azərbaycan ərazi bütövlüyünü bərpa etdikdən sonra da genişlənməkdə davam edəcək. Bu genişlənmə yenə ölkəmizin tarixi torpaqları hesabına baş verəcək. Hesab olunur ki, nüvə proqramına görə mümkün müharibə İranı parçalayacaq.

İndiki şəraitdə daha çox maraq doğuran və reallığa yaxın olan məqam isə, təbii ki, Qarabağ münaqişəsilə bağlıdır. Qeyd edək ki, NATO özü dəfələrlə bəyan edib ki, Dağlıq Qarabağ münaqişəsinin nizamlanmasında iştirak etməyəcək. Qurumun baş katibinin Cənubi Qafqaz və Mərkəzi Asiya üzrə xüsusi nümayəndəsi Ceyms Appaturay Moskvada keçirilən mətbuat konfransında bildirib ki, NATO bu münaqişənin həllində öz rolunu görmür, amma iki ölkənin hazırkı münasibətləri qurumda narahatlıq doğurur.

Bundan başqa, Appaturay bildirib ki, alyans Cənubi Osetiya və Abxaziya problemlərinin həllində də iştirak etmək niyyətində deyil. Lakin yuxarıdakı xəritədən belə məlum olur ki, Azərbaycan ya danışıqlar, ya da hərb yolu ilə ərazi bütövlüyünü bərpa edəcək. Bunun isə müharibə yolu ilə baş vermə ehtimalı getdikcə daha yüksək dəyərləndirilir. Xatırladaq ki, artıq Azərbaycanın Dağlıq Qarabağa görə Ermənistanla müharibəyə ciddi hazırlaşması barədə dünya mediasında məlumatlar dolaşır. Bu günlərdə Azərbaycanın müdafiə naziri Səfər Əbiyevə istinadla "Frans Press" agentliyi analoji məlumat yayıb.

Nazirliyin mətbuat xidmətinin yaydığı sənəddə yenə də nazirin Minsk Qrupunun həmsədrlərilə danışıqlarına istinadən bildirilir ki, "Azərbaycan öz ərazilərini azad etmək üçün ciddi şəkildə müharibəyə hazırlaşır".

Azərbaycanın ali rəhbərliyi artıq ilk dəfə deyil ki, davakar bəyanatlarla çıxış edir. Həmsədrlərlə görüşündə Səfər Əbiyev bildirib ki, Ermənistan Qarabağdakı işğal siyasətinə son qoymalıdır. Azərbaycanın müdafiə naziri ATƏT-in Minsk Qrupunun həmsədrlərilə söhbətində həmçinin bildirib ki, Bakı münaqişənin dinc yolla çözümünə ümidini itirməyib.

Bu günlərdə isə Beynəlxalq Böhran Qrupu da müharibə risqinin böyük olduğuna dair mövqe sərgiləyib. Politoloq Fikrət Sadıxov "İnterfaks-Azərbaycan" agentliyinə bildirib ki, əslində Beynəlxalq Böhran Qrupu sonuncu hesabatında Ermənistan və Azərbaycan arasında Dağlıq Qarabağ uğrunda müharibənin real olaraq başlanması barədə danışarkən haqlı idi: "Mahiyyətcə bu qrupun ekspertləri (karşünasları) həqiqətə yaxındır. Münaqişə istənilən an başlaya bilər. Yeri gəlmişkən, biz bunu gizlətmirik".

Onun sözlərinə görə, Azərbaycanın müdafiə potensialını və hərbi gücünü artırması barədə bəyanatları sadəcə söz deyil, özlərinə mənsub torpaqları Ermənistanın işğalından azad etmək üçün həqiqətən də əlindən gələni edir: "Yəqin ki, Avropa siyasətçiləri bu reallığı anlamağa başlayıb. Hər halda, Beynəlxalq Böhran Qrupu və başqa təşkilatlar kimi ayrı-ayrı qurumlar hadisələrin bu istiqamətdə inkişafının reallığını və aşkar olduğunu görür. Vəziyyətin inkişafının obyektiv qanunları var. 20 il ərzində problem həllini tapmırsa, deməli Ermənistan zəbt etdiyi torpaqları azad etmək istəmir. Bununla yanaşı, vasitəçi olan aparıcı dövlətlər, hər halda, belə missiyanı üzərinə götürüb, indifferentlik edir və münaqişənin hər iki tərəfini bərabərləşdirməyə çalışır. Təbii ki, belə şəraitdə Azərbaycanın digər çıxış yolu yoxdur və nəticədə istənilən an münaqişə alovlana bilər". Beynəlxalq Böhran Qrupunun sonuncu hesabatında deyilir ki, ön cəbhədə toqquşmaların kəskinləşməsi, artan silahlanma, praktiki olaraq dayandırılmış sülh prosesi Ermənistan və Azərbaycanın yenidən Dağlıq Qarabağ uğrunda müharibəyə qayıtma şansını artırır ki, bu da regionda (bölgədə) məhvedici fəsadlara gətirib çıxaracaq. Bakı xəbər