GünAz TV mətbuat mərkəzinin növbəti müsahibi, Dünya Azərbaycanlıları Konqresi İdarə Heyətinin üzvü, iqtisad elmləri doktoru, tanınmış diaspor fəalı Asif Qurbanovdır.

- Asif bəy, son günlər İranın Azərbaycana qarşı apardığı antitəbliğat İzmirdə yaşayan soydaşlarımız tərəfindən necə qarşılanır?

- Hazırda İranın Azərbaycana qarşı apardığı təbliğatı yeni olmadığı üçün təəccüblənmirik, əslində burada təəccüblənəsi heç bir şey yoxdur. İran əvvəllər Azərbaycana hansı münasibəti göstərirdisə, bu gün də həmin siyasət davam etməkdədir. Biz həmişə İranın Azərbaycanın inkişaf etməsini, bölgədə söz sahibi çevrilməsini istəmədiyini dəfələrlə keçirdiyimiz tədbirlər, media vasitəsilə öz fikirlərimizi bildirmişik. Bu gün İranın ən böyük qorxusu Qarabağın azad olunmasından sonra proseslərin Güney Azərbaycana təsir edəcəyi amili İranı həmişə narahat edib. Buna görə, İran açıq və ya gizli şəkildə Azərbaycanın daxili işlərinə müdaxilə edib. Hətta üzdə dost kimi görünməyə çalışsa da. İran müsəlman ölkə olduğunu bəyan edir, ancaq yuxarı da qeyd etdiyim amillər görə, Ermənistan yardım edir və onu dəstəkləyir. Güney Azərbaycandakı soydaşlarımızın milli-mədəni haqları bərpa olmalıdır, bunu daima dəstəkləməliyik. Ən azından öz ana dillərində məktəbləri, qəzet və televiziyaları olmalıdır. İran Güney Azərbaycanla bağlı siyasətində dəyişiklik etməsə, onu daima gərginlik, qarşıdurmalar gözləyir.

- Bu məsələ ilə bağlı İzmirdə fəaliyyət göstərən, Azərbaycan Mədəniyyət Mərkəzləri tərəfindən tədbirlərin keçirilməsi planlaşdırılırmı?

- Biz Güney Azərbaycanlıların Milli Mədəni haqlarının bərpa olunması istiqamətində necə illərdir çalışırıq və bundan sonra da bu, istiqamətdə fəaliyyətimizi davam etdirəcəyik. Güneydəki soydaşlarımızın milli haqları gercəkləşsə, o zaman xaricdə hər hansı mitinq keçirməyə ehtiyac olmayacaq. Soydaşlarımız lazımı olan cavabı verəcəklər.

- Aprel ayında İzmirdə Türkiyə Azərbaycanlılarının I Qurulyatı keçiriləcək. Bu qurultaya maraq necədir və qurultaya iştirak edəcəksinizmi? Birdə bu qurultay Türkiyədə yaşayan soydaşlarımızın siyasi-ictimai və mədəni-sosial həyatında hansı rolu oynaya bilər?

- Qurultaya dəvət olunduğum üçün iştirak edəcəm. Qurultayın təşkil edən təşkilat komitəsi hazırlıqların yüksək səviyyədə getdiyini və tədbirə marağın güclü olduğunu bildirib. Qurultay Türkiyədə yaşayan Azərbaycan türklərinin bir arada, onların təmərküzləşməsində böyük rol oynayacaqdır. Bu, şübhəsizdir. Sadəcə təşkilat komitəsindən bir istəyim və xahişim olub: Türkiyədə fəaliyyət göstərən bütün Azərbaycan cəmiyyətlərinin qurultaya gəlməsini təmin etsinlər. Hər kəsin qəbul edəcəyi bir qurultayın olmasını çalışmaq, ayrı-seçkiliyin deyil, hətta diaspor komitəsi ilə işbirliyində olan və ya olmayan bütün cəmiyyətlərin bu qurultaya yer alması Türkiyədə Azərbaycan cəmiyyətləri arasında əlaqələri daha gücləndirəcək. Bu gün diaspor fəaliyyətində iqtidar və müxalifətçilik olmamalıdır. Və, hədəfimiz milli maraqlar istiqamətində getməlidir.  Söhbətləşdi: Elnur Eltürk