GünAz TV Mətbuat mərkəzinin növbəti müsahibi, Danimarkada fəaliyyət göstərən Güney Azərbaycan İnsan Hüquqları Təşkilatının başqanı, tanınmış hüquq müdafiəcisi Şahin Ostacludur.

 -Şahin  bəy, İranın Azərbaycana qarşı apardığı antitəbliğat Danimarkada yaşayan soydaşlarımız tərəfindən necə qarşılanıb?

- Son günlər İran rejiminin Azərbaycana qarşı apardığı antiazərbaycan siyasətini diqqətlə izləyirik və sərt şəkildə bunu pisləyirik. Bu proseslərin arxasında birmənalı olaraq deməliyik ki, İran Azərbaycanın bölgədə güclənməsindən və onun söz sahibinə çevrilməsindən narahatdır. İran təkcə Azərbaycan üçün deyil, Qafqaz, Yaxın və orta şərq ölkələri üçün də potensial təklükə yaradır. İran burada radikal qüvvələrin yaranmasında maraqlıdır və onların vasitəsilə Azərbaycana təsir etmək istəyir. Biz eyni siyasəti Livanda, Fələstində, İraqda yarandığını görürük. Yəni, İran bu bölgələrdə demokratik ideyaların oturuşmasında və inkişaf etməsinə mane olur. Nəticədə də vəziyyət qarışır. Normal dövlət quruculuğu prosesinə zərbə dəyir.

Amma, İranın Azərbaycanla bağlı planın reallaşması mümkün deyil. Daha doğrusu desək, Azərbaycan cəmiyyətində müasir, demokratik, dünyəvi dəyərlər güclüdür. Azərbaycan xalqı dinə hörmətini qoruyub saxlamaqla, ayrıca dini siyasətdən ayrı görür. Bunun əsası XX əsrin əvvəllərində formalaşmağa başlayıb. İranda isə insan hüquqları pozulur, xüsusilə qeyri-türklərin öz ana dillərində yazıb, oxumaq haqqı tanınmır. İndi İran hansı haqla Azərbaycan daxili işinə müdaxilə edir?! Buna sərt şəkildə etirazımızı bildirəcəyik. Artıq, dünyanın əksər ölkələrində etiraz aksiyaları keçirilir. Azərbaycan kifayyət qədər güclü dövlətdir. Öz müstəqilliyini qoruyub saxlamağı bacarır. Burada İranın əsas narahatçılıqlarından biri də İranda yaşayan milyonlarla türkün milli məfkürəsinin formalaşmasında Azərbaycanın böyük təsir etməsidir. Və İran buna görə, Azərbaycanı cəzalandırmağa çalışır. Bu da mümkün deyil.

- Sizcə, son vaxtlar ərəb coğrafiyasındakı siyasi dəyişiklər İran rejimi üçün nələr vəd edir?

- Şübhəsiz ki, ərəb bölgəsində ciddi siyasi dəyişiklər İrana təsir edəcək. Tunis və Misir olayları İrana dəyişiklər gətirmək uğrunda mübarizə aparan insanlara güc verib. Dünyada baş verən dəyişikliklər internet, televiziyalar vasitəsilə xalqların ictimai-siyasi şüuruna təsir edir. Artıq müxalifət ayağa qalxıb və hadisələr hələ bundan sonra da şiddətlənəcək. Gec-tez İranı inqilab dalğası vuracaq.

Amma yenə də deyirəm ki, bizim soydaşlarımızın milli haqları bərpa olunmalıdır, İranda Azərbaycan türklərinin haqları təmin olunmasa, İranda baş verə biləcək hər hansı bir dəyişikliyin elə də əhəmiyyəti olmayacaq. Tarix boyu millətimiz İranda baş verən dəyişiklərdə detenator rolunu oynasada təəssüf ki, proseslərdən kənarlaşdırılıb və əzilən, hüququ tapdalan topluma çevrilib. Bu dəfə belə olmayacaq və 35 milyon azərbaycan türkünün haqqı bərpa olunacaq.

- Təşkilatınız bu yöndə hansısa tədbilər keçirməyi planlaşdırırmı?

- İran rejiminin Azərbaycan əleyhinə apardığı antitəbliğat, iran-ermənistan əlaqələrinin cavab olaraq, Danimarkada İran səfirliyi önündə aksiya keçiriləcək. Mart ayının 5-də baş tutacaq aksiyaya ciddi şəkildə hazırlaşırıq. Çünki Ermənistan dövləti insanlığa qarşı cinayət törətmiş bir dövlətdir və Azərbaycanın iyirmi faiz torpaqlarını işğal edib. İndi də İran Azərbaycana qarşı olaraq, Ermənistana qaz-neft, enerji ilə təmin edir. Amma bir dəfə olsun Azərbaycanın torpaqlarının işğal altında qalmasına etirazını bildirmir. Ermənistanın sosial-iqtisadi vəziyyətdən çıxması üçün Tehranda və İrəvanda planlar hazırlanır. İranlı işadamlarını Ermənistana yatırım qoymağa məcbur edirlər.

İranın Azərbaycana qarşı apardığı antitəbliğat bütün avropa ictimaiyyətinə, avropalı parlamentarilərin diqqətinə çatdırlacaq. Heç bir zaman razı ola bilmərik ki, İran Azərbaycan təhlükəsizliyinə, dövlətçilyinə təhlükə yaratsın. Azərbaycan dövlətçiliyini qorumaq və onu müdafiə etmək bizim milli şərəf borcumuzdur. Bundan sonra da Azərbaycan haqları uğrunda mübarizəmiz davam edəcək və İranın içüzünün ifşa olunması qədər mübarizəmiz davam edəcək.

Söhbətləşdi: Elnur Eltürk