Xocalı faciəsinin növbəti ildönümü ilə bağlı tədbirlər Planı hazırlandı

SON XƏBƏRLƏR

Xocalı faciəsinin növbəti ildönümü ilə bağlı tədbirlər Planı hazırlandı

2021.10.20, 07:36

Gunaz.tv

GünAzTv: Azərbaycan Respublikası (Cümhuriyyəti) Prezident Administrasiyası rəhbərinin sərəncamı ilə "Xocalı soyqırımının on doqquzuncu ildönümünün keçirilməsinə dair tədbirlər Planı" təsdiq edilib.

Tədbirlər planında Xətai rayonunda, Naftalan şəhərində Xocalı soyqırımı qurbanlarının xatirəsinə ucaldılmış abidələrin önünə əklil qoyulması, Xocalıdan olan məcburi köçkünlərin dünya dövlətlərinə, xalqlarına və beynəlxalq təşkilatlara müraciətinin yayılması, Azərbaycanın xarici ölkələrdəki səfirliklərində, nümayəndəliklərində və diaspor təşkilatlarında bu dəhşətli hadisə ilə bağlı mətbuat konfranslarının, anma mərasimlərinin və s. keçirilməsi, xarici KİV və teleradio kanallarında Xocalı soyqırımına həsr olunmuş materialların hazırlanması və yayılması nəzərdə tutulur. Sənədə əsasən, idarə və təşkilatlarda, teatr-konsert müəssisələrində, sərgi salonlarında, ali və orta təhsil ocaqlarında xatirə gecələri, foto-rəsm sərgiləri, şahidlərlə görüşlər və s. keçiriləcək, milli azadlıq uğrunda mübarizəyə həsr olunmuş sənədli və bədii filmlər nümayiş etdiriləcək. Rəsmi dövlət strukturları rəhbərlərinin, Milli Məclisin deputatlarının (millət vəkillərinin) və ziyalıların iştirakı ilə xocalılıların müvəqqəti məskunlaşdığı şəhər və rayonlarda (Bakı, Sumqayıt, Gəncə, Mingəçevir, Şəki, Naftalan, Goranboy, Bərdə, Sabirabad, Göyçay, Zaqatala, Oğuz, Balakən) şəhid ailələrinə yardım göstəriləcək.

İldönümü ərəfəsində internet şəbəkəsinə Xocalı soyqırımını əks etdirən məlumatlar daxil ediləcək və müntəzəm yeniləşdiriləcək, ölkə televiziya və radiolarında, kütləvi informasiya vasitələrində bu soyqırımla bağlı materiallar veriləcək. Fevralın 25-də təhsil müəssisələrində ilk dərslər bu faciəyə həsr olunacaq, ayın 26-da saat 17.00-da bütün ölkə ərazisində Xocalı soyqırımı qurbanlarının xatirəsi bir dəqiqəlik sükutla yad ediləcək.

GUNAZ.TV

SON XƏBƏRLƏR