GünAzTv: Misir prezidenti Hüsnü Mübarək televiziya ilə xalqa müraciət edib. O bildirib ki, həmişə ölkə əhalisinin əsas təbəqəsinin - yoxsul insanların tərəfində olub:

“Biz işsizilklə mübarizəni davam etdirəcəyik. Biz hazırkı vəziyyətin - talançılıq və yanğın törədilməsinin öhdəsindən gələcəyik. Mən misirliləri ölkənin ümumi maraqlarına xidmət etməyə, hökumət binalarını yandırmamağa çağırıram”.

Misir prezidenti həmvətənlərini əmin edib ki, iqtisadi və siyasi islahatları davam etdirəcək. “Bu (baş verən hadisələr), Misirə qarşı sövdələşmədir”, - deyən Hüsnü Mübarək insan tələfatına kədərləndiyini bildirib.

Hüsnü Mübarək bəyan edib ki, hökuməti istefaya göndərib. Onun sözlərinə görə, yeni hökumət bu gün elan ediləcək (anspress).

 Dünən nümayişçilərlə polis və təhlükəsizlik qüvvələri arasında baş verən toqquşmalardan sonra bu gün Qahirədə (Misir) sakitlik bərpa olunub.

APA-nın “RİA Novosti”yə istinadən xəbərinə görə, küçələrdə nə yol polislərinə, nə də polis postlarına rast gəlmək mümkündür.

Yollarda zibil topaları və yanmış avtomobillər var. Ordu yalnız strateji obyektləri nəzarət altına alıb - Təhrir meydanını və burada yerləşən Misir muzeyini, Milli Televiziyanın və Xarici İşlər Nazirliyinin binalarını bir neçə ZTR qoruyur.

Hakim Milli-Demokrat Partiyasının qərargahı yanmaqda davam edir. Bütün ölkədə mobil rabitə və internet işləmir. Küçələrin əksəriyyətində hakimiyyət nümayəndələrinə rast gəlinməsə də, nümayişçilərlə güc strukturları (təhlükəsizlik qüvvələri) arasında toqquşmalar müşahidə olunmur.

ABŞ (Amerika Birləşmiş Ştatları) 2011-ci il prezident seçkiləri ərəfəsində Hüsnü Mübarək rejimini devirməyə hazırlaşan Misirin müxalifət qruplarını dəstəkləyir.

APA-nın xəbərinə görə, bu barədə “The Daily Telegraph” qəzetində dərc olunmuş məqalədə bildirilir.

Məqalədə “WikiLeaks” saytının əlinə keçmiş və ABŞ diplomatlarının Qahirədən göndərdiyi hesabatlara istinad olunur. ABŞ-ın Misirdəki səfiri Marqaret Skobi 2008-ci ilin dekabrında Dövlət Departamentinə yazdığı məktubda bildirir ki, bəzi müxalif qüvvələr səylərini birləşdirərək, hakimiyyəti devirmə planı hazırlayıblar. Plan o dərəcədə məxfi hazırlanıb ki, müəlliflər onu hətta kağıza köçürməməyə qərar veriblər. M.Skobi bu planın işləməsinə və hətta mövcudluğuna şübhə etdiyini də yazıb.

Səfirin yazdıqlarından aydın olur ki, Misir müxalifətçilərindən birinin ABŞ Dövlət Departamenti tərəfindən təşkil olunmuş gənc fəalların seminarında iştirakı təmin olunub. ABŞ hökuməti həmin şəxsin kimliyinin gizli qalması üçün hər şeyi edib. Lakin son günlər baş verən hadisələrdə sözügedən müxalifət fəalı həbs olunub.

M.Skobinin məktubunda “6 aprel” hərəkatının adı keçir. Bu hərəkat son günlər baş qaldıran inqilab cəhdinin əsas təşkilatçılarından biridir. “Facebook” sosial şəbəkəsində “6 aprel” qrupunun əsasən gənclərdən ibarət üzvlərinin sayı artıq 70 min nəfəri keçib.