GünAzTv: Azərbaycan, Dağlıq Qarabağ münaqişəsi danışıqlar yolu ilə çözülməyəcəyi təqdirdə, güc variantından istifadənin qaçılmaz olduğunu dəfələrlə bəyan edib.

Bu fonda isə Dağlıq Qarabağ münaqişəsinin artıq hərbi müstəviyə keçmə ehtimalının kifayət qədər yüksəlməsinə dair yerli və beynəlxalq ekspertlər tərəfindən verilən proqnozların sayı artmaqdadır. Məsələ ilə bağlı Rusiyanın "Nezavisimaya Qazeta" mətbu orqanı diqqəti ilk olaraq Azərbaycan, Ermənistan və Rusiya xarici işlər nazirlərinin bu günlərdə Moskvada keçirilmiş görüşünə çəkir.

Qəzet xatırladır ki, Moskvanın təşəbbüsü ilə yanvarın 24-də Azərbaycan xarici işlər naziri Elmar Məmmədyarov, Ermənistan xarici siyasət idarəsinin rəhbəri Edvard Nalbandyan və onların rusiyalı həmkarı Sergey Lavrov bir araya gəlib. Lakin tərəflərin münaqişənin həlli istiqamətində hansı razılaşmalar əldə etdiyi və ya ümumiyyətlə hansısa razılıq əldə etmələri haqda heç bir məlumat verilmir: "Sülh danışıqlarının davam etməsinə baxmayaraq, tərəflər bu mövzuda inkişaf olmayacağını düşünür. Bu səbəbdəndir ki, Azərbaycan və Ermənistan dövlət başçıları son dövrdə müharibə ssenarilərini gündəmə daşıyır. Rus ekspertlər Azərbaycan hərbi büdcəsinin 2011-ci ildə yüzdə 90 nisbətində artaraq 2.5 milyard manat (3.1 milyard dollar) olmasına diqqət çəkir. Bundan başqa, hərbi sənayenin inkişaf etdirilməsi üçün də 1 milyard 87 milyon manat (1.36 milyard dollar) vəsait ayrılması gözlənir. Azərbaycanın bu il müdafiə məqsədilə cəmi 4.46 milyard dollar maliyyə ayıracağı gözlənir. Hərbi mütəxəssislər bu xərcləri döyüş hazırlığı kimi qiymətləndirərək, dövlət başçısı İlham Əliyevin Nazirlər Kabinetinin iclasında söylədiyi fikirlərə diqqət çəkir. Azərbaycan prezidenti torpaqların işğal altından qurtarılması üçün hərbi əməliyyatlara başlaya biləcəklərini açıq bir dillə ifadə edib.

Ermənistan hərbi büdcəsinin 387 milyon dollar olduğuna diqqət çəkən mütəxəssislər, buna baxmayaraq, həmin dövlətin Azərbaycana qarşı təhdidlər səsləndirdiyini bildirir. Rusiya isə hər iki tərəflə əlaqələrini davam etdirməyə çalışır. Ermənistanla hərbi müttəfiqliyinə baxmayaraq, Azərbaycan ilə də yaxınlığı artırmaq istəyir. Son günlərdə Rusiya Prezident Administrasiyasının başçısı Sergey Narışkin Azərbaycanı ziyarət etdi və dövlət başçısı İlham Əliyev ilə bir araya gəldi. Bununla yanaşı, Rusiya müdafiə naziri Serdyukov ilə azərbaycanlı həmkarı Səfər Əbiyev də bir görüş keçirdi. Rusiya rəsmiləri Azərbaycana hərbi texnologiyanın modernizasiya işlərində yardımçı olacaqlarını bəyan etdi".

Qəzet Rusiya Hərbi Strateji Araşdırmalar Mərkəzinin ekspertlərinə istinadən Azərbaycanın döyüş hazırlıqlarının bu il başa çatacağını və 2012-ci ilin yaz aylarına qədər hərbi əməliyyatların başlaya biləcəyini bildirir. Mərkəz ekspertləri isə onu da bildirir ki, yeni Qarabağ döyüşünə paralel olaraq ABŞ (Amerika Birləşmiş Ştatları) və müttəfiqlərinin İran hücumu da reallaşa bilər. Bu vəziyyətdə isə Rusiyanın bölgə döyüşlərinə müdaxilə etmə ehtimalının olmayacağını vurğulayan hərbi ekspertlər Kreml sarayının geosiyasi təsirini itirəcəyini iddia edir.

Bir daha qeyd edək ki, ümumiyyətlə, son dövrlər digər ekspertlər də Qarabağ münaqişəsinin tezliklə başlanma ehtimalını yüksək qiymətləndirir. Əsasən də rusiyalı ekspertlər belə mövqedən çıxış edir. Əslində müharibə ilə bağlı Qərb düşərgəsindən də müəyyən xəbərlər gəlir. Məsələn, Azərbaycana səfər etməsi gözlənən Avropa Şurasının baş katibi Torbörn Yaqland müsahibəsində bildirib ki, Ermənistan-Azərbaycan münaqişəsi zonasında vəziyyət nəzarətdən çıxa bilər. Avropalı rəsmi bu fikrini son vaxtlar cəbhə bəlgəsində insident və atəşkəsin pozulması hallarının artması ilə izah edib: "Son aylar qoşunların təmas xəttində insan tələfatı ilə nəticələnmiş insidentlər daha pis vəziyyətə aparıb çıxara bilər. Münaqişə tam həllini tapmayanadək bölgədə müharibənin bərpası risqi qalacaq. Həm Azərbaycan, həm də Ermənistan Avropa Şurasına üzv olan zaman problemin sülh yolu ilə həllinə dair öhdəlik götürüb. Ümid edirəm ki, vəziyyət bu qədər gərginləşməyəcək".

O bildirib ki, indi danışıqlar prosesi ATƏT-in (Şuraye əmniyyət və həmkariye orupa) Minsk Qrupu çərçivəsində aparılır və Avropa Şurasının səlahiyyətləri daxilində deyil: "Lakin biz hər hansı bir formada Minsk prosesinə nə isə bir töhfə verə biləriksə, bunu çox böyük məmnuniyyətlə edəcəyik. Sülhün əldə edilməsi, bərpası istiqamətindəki bütün səyləri artırmaq üçün qanunun aliliyini də təmin etmək olduqca vacibdir. Bu tək Dağlıq Qarabağ münaqişəsi üçün deyil, bütün "dondurulmuş" münaqişələr üçün çox vacibdir".

Azərbaycan rəsmiləri isə, qeyd edildiyi kimi, dəfələrlə müharibə ehtimalını yüksək olduğunu bəyan edib. Bakı xəbər