GünAzTv: Politoloq hesab edir ki, İranı idarə edənlərin mənəvi aşınmaları görməməsi və ya özlərinin bu mənəvi aşınmalara şərait yaratması nəticəsində İran İslam Respublikasının cəmiyyəti indiki vəziyyətə düşüb.

"Dünya cəmiyyətlərinə xas olan nöqsanlar İran cəmiyyətinə də yad deyil. Əxlaqsızlıq, şəraba və narkotikə  (məvadde moxədder)  meyllilik İran cəmiyyətində də mövcuddur. Hətta Avropaya xas olan qeyri-ənənəvi cinsi təmayüllülər də özünü İran cəmiyyətinə göstərir.

Bu cəmiyyətdə əksərən yalan həqiqət əvəzinə işlədilir, mənəvi aşınma getdikcə güclənir". Bu sözləri APA-ya açıqlamasında Siyasi Texnologiyalar və İnnovasiyalar Mərkəzinin rəhbəri, politoloq Mübariz Əhmədoğlu deyib.

Politoloqun sözlərinə görə, ölkə daxilinə və xaricinə İsraili, yəhudiləri düşmən kimi təqdim edən İranın dini liderləri İsrail məhsullarının və ya yəhudi lisenziyalı (mücəvviz) malların İrana daxil olmasına sanksiya tətbiq etməyib: "Yüksək statuslu din xadimlərinin özlərinin bu məhsullardan istifadə etməsilə bağlı məlumatlar da yayılır. Mənəviyyatın ən böyük aşınması da elə buradan başlayır. Hədsiz ambisiyalı dini liderlər gənc ailələrin şəriət qaydalarına uyğun, əxlaq qaydalarının gözləməklə, ibadət əmrlərini icra etmələrinə şərait yaratmayıb. Valideynlərilə birlikdə yaşamalı olan gənc ailələr əksərən ibadətləri yerinə yetirə bilmir. Mənəvi aşınmanın ən böyük dərəcəsi ondadır ki, İran İslam Respublikasının din xadimləri İslam dinini fars millətçiliyinin maraqlarına xidmət etməyə məcbur edib. Hətta iş o yerə çatıb ki, bütün dünyada "Ərəb körfəzi" kimi tanınan məşhur ərazini İran "Fars körfəzi" adlandırır. Quranı-Kərim ərəb dilində nazil olunub. İranın "ərəb" sözündən xoşu gəlmirsə, bu körfəzi "Ərəb körfəzi" yox, "İslam körfəzi" adlandırsın. "Fars" kəlməsi çox zəruridirsə, İran öz adının dəyişib rəsmən "Farsistan" (Persia) qoya bilər".

M.Əhmədoğlu İranda Azərbaycan dilində təhsilin olmamasına da toxunub: "Bu, ikili standartdan xəbər verir. İranın dini liderləri Azərbaycan Respublikasında (Cümhuriyyət) bir neçə qız uşağının "təhsil hüququnun pozulmasını" Azərbaycana qarşı təzyiqə çevirdikləri halda, İranda Azərbaycan dilində məktəb açılmasını qadağan ediblər. Qurani-Kərimdə Allah-Təalanın özünün insanları müxtəlif dillərdə danışan kimi yaratması barədə ayə var. Bu məntiqdə Azərbaycan dili ilə fars dili dinimizin qabağında eyni güclü və eyni hüquqludur. Onda nəyə görə Azərbaycan dilində təhsil qadağan edilir? İranda şiəlik Şah İsmayıl Xətai tərəfindən yayılıb və qorunub saxlanıb. Şah İsmayıl Xətainin danışdığı dildə təhsilə qadağa qoymaq mənəviyyata ziyandır. İranın indiki dini lideri Seyid Əli Xameneyi 13-cü imam kimi qəbul edilir. İranın əksər dindarları üçün belə müqəddəs şəxsi dünyaya bəxş edən ananın danışdığı dildə, bu ananın xatirinə Tehranda 10 məktəb açmaq savab əməl olardı".

Politoloq hesab edir ki, İranı idarə edənlərin mənəvi aşınmaları görməməsi və ya özlərinin bu mənəvi aşınmalara şərait yaratması nəticəsində İran İslam Respublikasının cəmiyyəti indiki vəziyyətə düşüb: "Kimdənsə nəyisə gizlətmək mümkündür, lakin Allah hər şeyi görür. Azərbaycan Respublikasında 30-40 nəfər xanımın tədrisdən qalması problemdir, 30-40 milyonun öz dilində təhsil almaması isə faciədir. Allahın belə faciəyə rəvac verənləri cəzalandıracağı şəksizdir". Bakı xəbər