GünAzTv mətbuat mərkəzi tanınmış hüquq müdafiəçisi Saleh bəy Kamraninin “Milli.Az”-a verdiyi müsahibəsini olduğu kimi təqdim edir:  

Güney Azərbaycanlı ekspert hesab edir ki, İran Ermənistanın Azərbaycan qarşısında davam gətirə bilməsi üçün onu ayaqda saxlamağa çalışır.

Bu gün İran-Ermənistan əlaqələri sürətlə inkişaf edir. Müsəlman ölkə ilə, işğalçı və üstəlik onminlərlə müsəlmanı qətlə yetirən dövləti hansı ortaq maraqlar birləşdirir?  Milli.Az xəbər portalının bu haqda suallarını Güney Azərbaycanın tanınmış hüquq müdafiəcəsi, hazırda İsveçdə yaşayan ekspert Saleh Kamrani cavablandırıb:

Ekspert deyir ki, İranın xarici siyasətində Ermənistan önəmli rol oynayır və İrəvana siyasi-iqtisadi, hərbi cəhətdən dəstək verir. Çünki İran, Ermənistanı Azərbaycan qarşısında davam gətirməsi üçün var gücü ilə ayaqda saxlayır.

"Azərbaycanla Ermənistanın münasibətlərinin normallaşması İrana sərf etmir"

"İran siyasətçiləri Ermənistanın tarixən Azərbaycan və türk dünyasına qarşı düşmənçilik siyasətindən yararlanırlar. Çünki İran Ermənistan vasitəsilə Güney və Quzey Azərbaycana, Türkiyə və Qafqazdakı vəziyyətə təsir edir. Bu gün İranda belə bir təbliğat aparılır ki, ermənilər və farslar bir kökdəndirlər, yəni, hər iki xalqı ariyaçılıq nəzəriyyəsi bağlayır. Əlaqələrin strateji səviyyədə qurulmasına səbəb olan amillərdən biri də hazırda İranın nüvə enerji siyasətindən geri çəkilməməsi, buna cavab olaraq dünya dövlətləri tərəfindən ona qarşı iqtisadi sanksiyalar tətbiq edilməsi və üstəlikdə dünya iqtisadi böhran ölkənin sosial-iqtisadi infrastruktura zərbə vurub. Çünki Rusiya və Çindən dəstəyini itirən İran, Ermənistan kimi dövlətləri yanına çəkmək istəyir. Amma buna baxmayaraq, İran-Rusiya münasibətlərində problemlərin ortaya çıxması, Qərbin Ermənistanı özünə doğru çəkmək planı və Türkiyənin Qafqaz siyasətində aktivləşməsi İranın bölgədə təklənməsinə səbəb olub”,-  deyə Saleh Kamrani bildirdi.

Bəs İranın “Səhər2” kanalı və ölkənin media oqranlarının Azərbaycana qarşı apardıqları ideoloji-informasiya təxribatının arxasında hansı səbəblər dura bilər -  sualını Saleh Kamrani belə cavablandırdı: “İran Quzey Azərbaycanın güclənməsindən narahatdır. İranın daxili və xarici siyasətinin təməlində iki ana ideologiya dayanır. Birincisi, şiə islamçılığ təbliğ etmək. İkincisi, farsçılıq və ariyaçılıq ideologiyasını rəsmi dövlət siyasətinə gətirməkdir. Amma ölkənin Konstitusiyasında (Ana yasa = Qanune əsasi) yazılıb ki, İranın xarici siyasəti islam və müsəlman ölkələrinin maraqlarını nəzərə alaraq qurulmalıdır. Ancaq həqiqətdə isə, başqa siyasət yürüdülməkdədir. Əslində məqsəd, fars hakimiyyətini qoruyub saxlamaq və onu gücləndirməkdir. Xüsusilə, Mahmud Əhmədinejad hakimiyyətə gələndən sonra bu siyasət güclənməyə doğru istiqamətlənib" - deyə politoloq qeyd etdi.

İran “Səhər2” kanalının fəaliyyətini niyə gücləndirib?

İranın tanınmış siyasi xadimlərindən olan İsfəndiyar Rəhim Meşayinin çıxışlarından sonra Azərbaycan türklərinə qarşı təzyiqlər artmağa başlayıb. ekspert deyir ki, bu ölkədə islam inqilabı sadəcə bir görüntüdür. Bütün bu təbliğatların fonunda İranın bu aldadıcı siyasəti iflasa uğramaqdadır: "İran Azərbaycanla bağlı taktiki-strateji addımlar ataraq, Azərbaycanın ictimai rəyini çaşdırmaq üçün din xadimlərindən istifadə etməyə çalışır. Çünki İran siyasətçiləri yaxşı bilirlər ki, onun Ermənistanla əlaqələri Quzeydə hiddət doğurmaqla yanaşı, Güney Azərbaycanda da hiddət yaradır. İran “Səhər2” kanalının fəaliyyətini gücləndirib. Qumda fəaliyyət göstərən dini təlimat mərkəzləri Quzey Azərbaycana müxtəlif dini kitabların göndərilməsini təşkil edirlər, gizli və ya açıq şəkildə missonerlər göndərilir, özlərinə islam partiyaları səviyyəsində sosial baza yaradırlar. Yenə də qeyd etmək istərdim ki, İranın əsas məqsədi şiəçilik adı altında Güney və Quzey Azərbaycanda farslaşdırma siyasətini aparmaqdır. Azərbaycanı "Şimali İran" adlandırır. Məqsədi, Azərbaycanda "Hizbullah" kimi terrorçu təşkilatlar yaradıb, bununla da Quzey Azərbaycanı Livanın vəziyyətinə salmaqdır”, - S.Kamranı söylədi.

"Azərbaycanın siyasi-iqtisadi və hərbi cəhətdən güclənməsi Güney Azərbaycanda milli proseslərə böyük təsir edir"

Qeyd edək ki, İran dövlətinin Qarabağ münaqişəsinin həlli ilə bağlı vasitəçilik təşəbbüsləri də ara-sıra səsələnir. S.Kamrani isə hesab edir ki, bu gün Azərbaycanla Ermənistan arasında münasibətlərin normal məcraya qayıtması İrana sərf etmir.

"Bölgədə sabitlik və demokratikləşmə prosesi sürətlənərsə, bu, İranın özünə təsir edəcək, bütün iqtisadi layihələrdən kənarda qalacaq və Avropanın qaz bazarından məhrum olacaq. Eyni zamanda münaqişə həll olunarsa, Azərbaycanın mövqeləri güclənəcək və bu, nə Ermənistana, nə də İrana sərf edir. Əksinə, hər ikisinin maraqlarına ziddir. Azərbaycanın siyasi-iqtisadi və hərbi cəhətdən güclənməsi, Güney Azərbaycanda gedən milli proseslərə böyük təsir edir”, - deyə Saleh Kamrani qeyd etdi. Elnur Eltürk

Milli.Az