GünAzTv: Yanvarın 24-də Rusiya paytaxtının "Domodedovo" hava limanında  (frudqah = aeroport) partlayış baş verib. RİA "Novosti" agentliyinin xəbərinə görə, partlayış aeroportun beynəlxalq terminalında Moskva vaxtı ilə saat 16:32-də baş verib.    Rusiya Səhiyyə və Sosial İnkişaf Nazirliyinin yaydığı ilkin məlumata görə, partlayış nəticəsində 31 nəfər həlak olub, 130 nəfər yaralanıb. 20 yaralının vəziyyəti ağır olaraq qiymətləndirilir.    Şahidlərsə partlayış nəticəsində onlarla insanın zaldan çıxarılıb birinci çıxışın qarşısında torpağın üstünə yerləşdirildiyini bildiriblər: "Hava limanının hər yerini duman bürüyüb. Bir çoxları əl-ayaqlarını itirib..." Hüquq-mühafizə orqanlarındakı mənbə bildirib ki, hadisə yerindəki güclü tüstü ilk dəqiqələrdə meyitləri saymağa imkan verməyib.    Ölənlərin sayı barədə RF Səhiyyə Nazirliyinin məlumatı digər mənbələrin xəbəri ilə üst-üstə düşmür. Məsələn, istintaq "30-dan artıq", "İnterfaks"ın mənbəsi isə 35 nəfərin həlak olduğunu deyir. Aeroportun mətbuat katibi Yelena Qalanovanın bildirdiyinə görə də, hadisə nəticəsində 35 adam həlak olub.    Olaylara daha operativ reaksiya verən "Twitter"də isə şahidlər ölənlərin sayının 70 nəfərə çatdığını bildirirlər.    Partlayışı araşdıran İstintaq Qrupundan Tatyana Morozova "İnterfaks"a bildirib ki, partlayış beynəlxalq uçuşlarla Moskvaya gələn sərnişinlərin yüklərini aldıqları salonda (baqaj bölməsində) baş verib. Rusiya Federasiyasının İstintaq Komitəsinin rəsmi nümayəndəsi Vladimir Markin isə jurnalistlərə deyib ki, istintaq baş vermiş partlayışı terror aktı kimi qiymətləndirib.    İlkin məlumatlara görə, partlayışı terrorçu-kamikadze (intihari) həyata keçirib. O, hava limanına gələnləri qarşılayanlar arasında olub. Partlayıcı qurğu terrorçunun bədəninə quraşdırılıb.    Güc strukturlarındakı bir mənbə "İnterfaks"a bildirib ki, Moskva aeroportundakı partlayışı Şimali Qafqazdakı qanunsuz silahlı birləşmələrin üzvlərinin həyata keçirdiyi güman edilir. Mənbə qeyd edib ki, partlayışı həyata keçirən terrorçu-kamikadze xarici görünüşünə görə Şimali Qafqaz regionunda yaşayan xalqların nümayəndəsinə bənzəyir.    "Domodedovo" aeroportunda terror aktında əli olduğu güman edilən 3 nəfər barəsində axtarış elan edilib. Mənbə deyib ki, həmin şəxslər bir müddət Moskvada yaşayıblar. Rusiya Federasiyası Prokurorluğunun İstintaq Komitəsinin rəsmi nümayəndəsi Vladimir Markin bildirib ki, partlayışla bağlı Rusiya Cinayət Məcəlləsinin 205-ci (terror aktı) maddəsi ilə cinayət işi qaldırılıb. Partlayışın 7 kilo trotil gücündə olduğu bildirilir ("İnterfaks").    Medvedyev Davosa getmədi    Rusiya prezidenti Dmitri Medvedyev hadisədən dərhal sonra Kremldə keçirilən iclas zamanı daxili işlər naziri Rəşid Nurqaliyev və nəqliyyat naziri İqor Levitindən ölkənin bütün hava limanlarında və nəqliyyat qovşaqlarında xüsusi təhlükəsizlik rejimi tətbiq etməyi tələb edib.    Federal Təhlükəsizlik Xidmətinin isə terrorçu-kamikadze barəsində informasiyası olub. Hüquq-mühafizə orqanlarındakı mənbənin sözlərinə görə, terrorçunu "Domodedovo" hava limanında deyil, Zelenoqradda axtarırlarmış...    "Reuters" xəbər verir ki, prezident ölənlərin ailələrinə başsağlığı verib və vəd edib ki, terror aktının arxasında duranlar tutulacaq və cəzalandırılacaq.    Qeyd edək ki, Medvedyevin yanvarın 26-27-də Davosda keçiriləcək Dünya İqtisadi Forumunda iştirakı planlaşdırılmışdı. Lakin prezidentin mətbuat katibi Natalya Timakova bildirib ki, prezident Davos səfərini təxirə salıb.    Əliyev Medvedyevə başsağlığı verib    Prezident İlham Əliyev rusyalı həmkarı Dmitri Medvedyevə "Domodedovo" hava limanında baş verən partlayışla əlaqədar başsağlığı verib. "Hörmətli Dmitri Anatolyeviç! "Domodedovo" aeroportunda törədilmiş terror aktı nəticəsində çoxlu insan tələfatı haqqında xəbər məni dərindən sarsıdıb. Biz terrorizmin bütün forma və təzahürlərini qətiyyətlə pisləyirik. Azərbaycan xalqı adından və şəxsən öz adımdan Sizə, həlak olanların doğmalarına və yaxınlarına, bütün Rusiya xalqına dərin hüznlə başsağlığı verirəm. Zərər çəkənlərin tezliklə sağalmasını arzulayıram",- deyə prezidentin məktubunda qeyd edilib (AzərTAc).    Zərərçəkənlər arasında azərbaycanlılar yoxdur    Dünən Bakı-Moskva aviareysi 10:40-da, Moskva-Bakı aviareysi isə 14:40-da həyata keçirilib. "Azərbaycan Hava Yolları" (AZAL) QSC-nin axşam 20:05-də Moskvaya olan aviareysi isə 1 saatdan artıq yubanma ilə uçub.    "Kommersant FM" radiosu bildirir ki, partlayışla bağlı təyyarələrin "Domodedovo"ya enişi ləngidilsə də, aeroport adi iş rejimində fəaliyyətini davam etdirib, uçuşlara registrasiya dayandırılmayıb.    AZAL-ın Moskvadakı federal nümayəndəsi Mahir Yaqubov AzərTAc-ın müxbirinə bildirib ki, zərərçəkənlər arasında həmvətənlərimiz yoxdur. Onun sözlərinə görə, AZAL partlayışdan yarım saat əvvəl Bakıya öz reysini yola salıb": Azərbaycana uçan təyyarə Moskva vaxtı ilə saat 14:48-də havaya qalxıb. Azərbaycan aviaşirkətinin bütün əməkdaşları evə buraxılıb. Onlar Bakı-Moskva reysini Moskva vaxtı ilə saat 21:00-da qəbul etmək və növbəti reysi 23:15-də Bakıya yola salmaq üçün işə dönəcəklər. Reyslərin qəbulu və yola salınmasında ləngimələrə dair hələlik heç bir göstəriş olmayıb".    "Trend"in xəbərinə görə, dünən saat 20:05-ə olan AZAL-ın J2 854 saylı aviareysi saat 21:20-də Bakı aeroportundan "Domodedovo" aeroportu istiqamətində uçub...    Z.Ziya    P.S. Son məlumatlara görə, partlayış yerində görkəmindən ərəbə oxşayan bir nəfərin başı tapılıb: istisna edilmir ki, bombanı o, hərəkətə gətirib...    RF FHN-nin saytında yerləşdirdiyi məlumata görə, 170 nəfər yaralanıb və onlardan 74-ü xəstəxanaya yerləşdirilib. Qeyri- rəsmi məlumata görə, terror aktının 35 qurbanı olub,    Partlayış nəticəsində ölənlər arasında Böyük Britaniyanın iki vətəndaşı var.