GünAzTv: Heç kimə sirr deyil ki, Azərbaycan Respublikasının mövcudluğu İranın fars-şovinist hakimiyyətini narahat edir. Ümumiyyətlə, fars rejimi Azərbaycanda sabitlik və inkişafını qəbul edə bilmir. Ona görə də çeşidli bəhanələrlə Azərbaycan Respublikasının daxili işlərinə müdaxilə edir. Azərbaycanın üstünə yermək üçün İrandakı ayətullahların əlinə son zamanlar giravə düşüb. Həmin din xadimləri məsələnin mahiyyətinə ciddi şəkildə varmadan əsassız, qərəzli bəyanatlar səsləndirirlər. İran ruhanilərindən biri, (İranda "şəkərli ayətullah" kimi tanınır) ayətulla Nasir Məkarim Şirazi dekabrın 27-də Azərbaycandakı orta məktəblərdə məktəbli geyiminin geyilməsi tələbinə qarşıdurma xarakteri daşıyan fətva ilə cavab verdi. Onu da bildirək ki, şəkər mafiyası ilə əlbir olduğuna görə İranın özündə müsbət qarşılanmayan bu şəxs iki il öncə də Azərbaycanda məscidlərin sökülməsinə etiraz edərək fətva vermişdi. O demişdi ki, əgər rəsmi Bakı bu niyyətindən əl çəkməsə, tərəfdarlarına müdafiə olunmaq əmri verəcək və bu zaman ölənlərin də şəhid olacağı barədə fitva çıxaracaq. Belə bir bəyanat ilk deyildi və ondan əvvəl də Gülpeyqani adında başqa ayətullah buna bənzər fikirlər səsləndirmişdi. Tehran nəzarətindəki "iranpərəst" qrupların əliylə bəzi vaxtlar təxribatlar törətməkdən də çəkinməyib. Digər tərəfdən, "Ettelaat"ın ölkəmizdəki təxribatlarını da diqqətdən qaçırmaq olmaz. Digər tərəfdən, beynəlxalq terrorizmin himayəçisi olan İran hakimiyyətinin nəzarəti altında olan terror təşkilatlarının da varlığını inkar etmək mümkün deyil. "Hizbullah" və "Həmas" kimi terrorçu təşkilatların törətdiklərini xatırlatmaq kifayətdir. "Hizbullah"ın ölkəmizdə bir sıra işlər gördüyü çoxdan məlumdur. Dəfələrlə ölkədə terror aktları törətmək cəhdlərinin qarşısı alınıb. Son belə olay isə Səid Dadaşovun dəstəsinin zərərsizləşdirilməsilə üzə çıxıb ki, həmin vaxt da İrandan dəstək alan bu terrorçular özləri üçün "İmam Zamanın Şimal Ordusu"nu qurmağa çalışırmışlar. Azərbaycan İslam Partiyasının sədri Mövsüm Səmədovun həbsi İranın təxribatlarının üstünü bir daha açdı və rəsmi Tehranın Bakıya qarşı ittihamları intensiv xarakter aldı. İranın himayəsi altında olan "irançılar" zaman-zaman ittihamlar səsləndirirlər. Belə bir ittihamlardan birini də İslam Partiyasının təmsilçisi Natiq Kərimov edib. O, bir sıra mətləblərə aydınlıq gətirməklə tərəfdarlarının q İrandan idarə olunduğunu təsdiqləyib: "Azərbaycan müsəlmanlarının dini baxımdan İrandakı müctəhidlərə tabe olmasını mən demirəm, bunu hamı bilir. Əgər həmin müctəhidlər fətva versələr, mən o fətvanı öz həyatımda tətbiq etməliyəm". Natiq Kərimov şəriət hökmlərində şeyxülislam statusunu də qəbul etmədiyini deyib. Onun fikrincə, "Qazilər Şurasının dini bayramlarda verdiyi fətvaların 80 faizi şəriətə uyğun deyil..". Qafqaz Müsəlmanları İdarəsi (QMİ) fətva şöbəsinin müdiri hacı Mirəziz Seyidzadə bildirdi ki, şeyxülislamlıq - şeyx və islam - islamın şeyxi demədir: "Şeyx sözü lüğəti mənada qocalmış deməkdir, yəni həyatını islami elmə həsr etmiş, bu elmdə qocaltmış deməkdir. Şeyxülislam elə müctəhid statusunda olandır. Müctəhidlər isə elmdə müəyyən dərəcəyə çatdıqdan sonra bu ada layiq görülürlər. Müctəhid islami fikirlərini bildirmək hüququna malikdir. Peyğəmbərin qoyduğu qaydalara zidd çıxmamaq şərtilə, zamana və məkana uyğun fikirlər söyləyə bilərlər. Namazın necə qılınması hamıya məlumdur, müctəhid bu məsələ ilə bağlı nə deyə bilər ki?" İran ayətullahlarının Azərbaycanda məscidlərin bağlanması və yaxud da orta məktəblərdə geyimlərlə bağlı fətvalara da münasibət bildirən Mirəziz Seyidzadə dedi ki, müctəhid yaşadığı və çalışdığı ölkədə fətva verə bilər: "Onun verdiyi fətvanı müsəlmanlar qəbul etməlidirlər. Amma islam ölkənin müctəhidinin qeyri-islam dövlətinin daxili işinə qarışıb fətva verməsi düzgün deyil. Quranda buyrulub ki, özünü öz əlinlə təhlükəyə atma. Yəni sən bu dövlətdə olan islam qaydalarına əməl et. Amma başqa dövlətin işlərinə qarışma. Bilmədiklərimizi islam alimlərindən öyrənmək olar, baxmayaraq ki, o hansı islami dövləti təmsil edir. Bu gün dövlətə qarşı üsyan edən şəxs özü və ailəsini, ətrafını təhlükədə qoyur. Həzrəti Əlinin Zülfüqar qılıncının 25 il dalı da kəsdi, qabağı da. 25 il, ancaq lazım olan suallara cavab verdi, lazım olan məsələlərdə insanlara köməklik göstərdi. İmam Həsən sülh etməsəydi, islam qorunmazdı. İmam Hüseynin Kərbəlası artıq zərurət idi. İmam Hüseyn qanı ilə şəriət ağaclarını suvardı və şəriət dirildi". Mirəziz Seyidzadə bildirdi ki, İrandan verilən fətvaların hökmü Azərbaycan sərhədlərindən bu yana keçmir. Çünki Azərbaycan Respublikasının öz qayda-qanunları var: "Natiq kimiləri Azərbaycanda çoxdur. Birincisi o kimdir, hansı elmin sahibidir ki, belə ittihamlar səsləndirir? Qeydiyyata alınmayan və tanınmayan bir partiyanın rəsmisinin dedikləri də məntiqsizdir". QMİ rəsmisi onu da vurğuladı ki, söhbət yerli müsəlmanları hansı dövlətin müctəhidləri tərəfindən idarə olunmasından yox, ümumilikdə müctəhidlərdən gedir: "Müctəhidin özü bilə-bilə insanları fitvaya verə bilməz. Natiq özü gəlib əvvəlcə savadını, islami biliklərini ortaya qoysun, sonra otuz qaziyə etiraz etsin. Belə çıxışlarla ara qarışdırmaq olmaz. İkincisi, islamın özü elə böyük partiyadır. Partiya içində partiya yaratmaq olar?" Mirəziz Seyidzadənin fikrincə, Azərbaycanda dini sabitlik mövcuddur, cəmiyyət arasında nifaq salmağa xidmət edən qüvvələr isə istədiklərinə nail ola bilməyəcəklər: "Natiq kimi insanlar bildikləri işin qulpundan yapışsınlar, şeyxülislam statusundan, Qazilər Şurasının verdiyi fətvaların nə dərəcədə düzgün olub-olmadığını aydınlaşdırmasın. Bu islam alimlərinin işidir". Xalq cəbhəsi