GünAzTv: Türkiyənin Baş naziri Rəcəb Tayyib Ərdoğan “Zaman” qəzetinə göndərdiyi ekskluziv (özəl) mesajda qeyd edib ki, 1990-cı ilin yanvar ayının 19-dan 20-ə keçən gecə Bakıda baş verən faciəni Türkiyə də öz qəlbində daşıyır.

"21 il əvvəl Bakıda baş vermiş üzücü hadisədən Azərbaycan xalqının ürəyi qədər bizim də ürəyimiz yanıb",- deyə mesajda qeyd olunub.

Türkiyənin Baş naziri Rəcəb Tayyib Ərdoğan 20 Yanvar hadisələrinin 21-ci ildönümü münasibətilə “Zaman” qəzetinə ekskluziv mesaj göndərib. Mərhum Prezident Heydər Əliyevin "bir millət, iki dövlət" kəlamını xatırladan Baş nazir 20 Yanvar olaylarının Azərbaycan xalqı qədər Türkiyə xalqının da ürəyini yandırdığını, bu hadisələrdən hər bir türkün məyyus olduğunu bildirib.

"Beynəlxalq münasibətlərdə "qardaşlıq" anlayışı olmasa da, biz Azərbaycanı və Azərbaycan xalqını öz qardaşlarımız kimi görürük və belə görməyə davam edəcəyik. Aramızdakı həmrəylik ruhu şad gündə də, pis gündə də, sülhdə olduğu kimi müharibədə də davam edəcək. Xalqlarımız tarix boyunca birlikdə sevinib, birlikdə üzülüb və lazım gəldiyində birlikdə savaşıb. Azərbaycanın istiqlalı, Azərbaycanın azadlığı, rifahı və rahatlığı bizim öz istiqlalımız, azadlığımız, rifahımız və rahatlığımız qədər önəmlidir. Bizim aramızda sarsılmaz bağlar var. Dilimiz, inanclarımız, adətlərimiz, mədəniyyət təsəvvürümüz birdir",- mesajda qeyd olunub.

Baş nazir xatırladıb ki, 20 Yanvar hadisələri sovet (Şorəvi) ordusu tərəfindən qanlı bir şəkildə törədilib və bu hadisələr nəticəsində yüzlərlə dinc sakin şəhid edilib, yüzlərlə sakin isə yaralanıb: "Ancaq bütün bunlar, Azərbaycanın müstəqillik uğrunda apardığı mübarizənin önünü kəsə bilmədi. Əksinə Azərbaycan xalqının müstəqillik mübarizəsnin daha da güclənməsinə səbəb oldu. Beləliklə, Azərbaycan xalqı 70 illik əsarətdən xilas olaraq 30 sentyabr 1991-ci ildə həsrətində olduğu müstəqilliyini gerçəkləşdirmişdir". Baş nazir Rəcəb Tayyib Ərdoğan Zaman “qəzetinə” göndərdiyi mesajda daha sonra qeyd edir ki, Türkiyə Azərbaycanın müstəqillik əldə etməsini böyük sevinclə qarşılamış və Azərbaycan Respublikasının müstəqilliyini tanıyan ilk dövlət olmuşdur.

"Hər kəs bilməlidir ki, Azərbaycan və Türkiyə arasındakı bu birliyə heç kimin xələl gətirmsinə əsla imkan verməyəcəyik və bundan sonra da verilməyəcək... İnanıram ki, Azərbaycan dəyərli qardaşım İlham Əliyevin liderliyində hər keçən gün daha demokratik, daha güclü, daha xoşbəxt bir ölkə olmaq üçün yolunu davam etdirəcəkdir", - deyə Türkiyənin Baş naziri Rəcəb Tayyib Ərdoğan bildirib. Türkiyənin baş naziri  qanlı "20 yanvar" faciəsinin 21-ci ildönümü münasibətilə bütün Azərbaycan xalqına baş sağlığı verib.

Baş nazir Rəcəb Tayyib Ərdoğan mesajının sonunda “Zaman” qəzetinə də öz minnətdarlığını bildirib: "Qanlı faciənin ildönümünü xüsusi buraxılışla yad edən, azərbaycanlı qardaşlarımızın matəminə şərik olan "Zaman" qəzetinə uğurlar arzulayıram".