GünAzTv: Son dövrlərin diqqət mərkəzində olan məsələlərindən biri də İrandan olan bəzi din xadimlərinin Azərbaycan prezidentinə müraciətləridir.

Qeyd edək ki, bu müraciətlərdə Azərbaycan orta məktəblərində vahid məktəbli formasına keçidlə əlaqədar olaraq hicabla dərsə gəlməyin qadağan edilməsinə etiraz edilir.    Onlar, hətta silah-sursat saxlamaqda ittiham olunaraq həbs edilən İslam Partiyasının sədri və bir neçə üzvünün də guya haqsız yerə tutulduğunu iddia edir. Məsələn, bu günlərdə Azərbaycan dövlət başçısına ünvanladığı müraciətdə İran əsilli azərbaycanlı din xadimi, ayətullah Cəfər Sübhani məktəblərdəki hicab qadağasını ləğv etməyə səsləyib. Xarici vətəndaşların hər hansı bir dövlətin başçısına müraciət ünvanlaması normal haldır. Amma məktubda səslənən fikirlərdən aydın görünür ki, iranlı mollaların prezidentə yazdığı müraciət Azərbaycanın daxili işlərinə müdaxilə cəhdidir.    Belə olmasaydı, onlar hicabla bağlı qərarın ləğvini və guya Allah yolunda mübariz olanların azadlığa çıxarılmasını istəməzdi. Azərbaycan müstəqil dövlətdir. Müstəqil olduğundan da öz yolunu özü seçir.    Bu yolda xarici maneələr isə yolverilməzdir. Buna gedən əcnəbi (xarici) qüvvələrin qarşısı vaxtında alınmalıdır ki, onlar bir daha ölkənin daxili işlərinə qarışmaq kimi hərəkətlərdə bulunmasın. İran mollalarının belə əməllərinə son qoymaq üçün qabaqlayıcı addımların atılmasına ehtiyac var.    Bu tip qabaqlayıcı addımların atılmasına azərbaycanlı din xadimləri də öz töhfələrini verə bilər və verməlidir. Məsələn, onlar İran prezidentinə müraciət edərək, qonşuluq xatirinə ondan mollaların sözügedən hərəkətlərdən daşınmasını istəyə bilər.    Amma nədənsə, biz tərəfdən hələlik bu yoxdur. Şərqşünas Seyid Camal Əzimbəyli belə bir müraciətin azərbaycanlı din xadimləri tərəfindən edilməsini vacib saydı: "İranda fəaliyyət göstərən İslam hakimiyyətinin gerçəkdə yürütdüyü siyasət birmənalı olaraq islami prinsiplərə uyğun deyil.    Çünki müsəlman ölkəsi olan Azərbaycanın torpaqlarını işğal edən düşmən dövlətlə Tehranın hərtərəfli müqavilələri var. İran dini liderlərinin Azərbaycan prezidentinə müraciət ünvanlayaraq, guya bizdə dini basqıların olması, hicab problemi barədə çağırışlarını birmənalı olaraq Tehranın ölkəmizin daxili işlərinə qarışma kimi qəbul edirəm.    Bu, hətta Azərbaycana qarşı bir təhdiddir. Çünki Azərbaycan vətəndaşları öz dövlətinin qanunlarına tabedir, biz dünyəvi dövlətik. Burada din dövlətdən ayrı olsa da, dövlət-din münasibətlərində böyük dözümlülük var. Azərbaycanda olan milli-dini tolerantlıq (xoş görülük) özünü İslam təəssübkeşi edən İranda olduğundan müqayisəolunmaz dərəcədə yüksəkdir.    Tehranlı dindarların çağırış etməsinə cavaba gəldikdə, başqalarını deyə bilmərəm, özüm isə bir neçə ay öncə təmsil etdiyim 16 müqəddəs seyid ocağı adından İranın ali dini liderinə, bütün müctəhidlərə sərt şəkildə bəyanat ünvanladım. O zaman İranın bəzi şəhərlərində Azərbaycan bayrağını yandırmağa cəhdlər olmuşdu. Burada onlardan israrla tələb etdim ki, Azərbaycanın daxili işlərinə qarışmasınlar, din təəssübkeşliyi adı altında dövlətimiz əleyhinə yönəlik çağırışlardan əl çəksinlər. Burada şiə bacı-qardaşların məzarları erməni girovluğunda qalıb.    İran isə Ermənistanla sıx əlaqələr qurur. Amma İranlı şiə mollaları buna susaraq bir söz demir, prezidentlərinə buna son qoymaqla bağlı müraciət etmirlər. Ona müraciət etməyə-etməyə Azərbaycan prezidentinə müraciət etməyə özlərində cəsarət tapırlar.    O zaman etdiyim müraciətə, təklif etsəm də, çoxları imza atmadı. Amma lazım olduqda Vətən, dövlət heysiyyətindən bolluca-bolluca nağıl danışırlar.    İstərdim ki, dövlətçiliyə hizmət göstərən adamlarla bir araya gəlib, belə bir bəyanatı İran prezidentinə də biz ünvanlayaq. Ölkəmizdə bu gün hicabla bağlı hər hansı bir insanın rahatsızlığı varsa, problem Azərbaycan dövləti, hakimiyyətlə aydınların qarşılıqlı fikir mübadiləsi yolu ilə çözülür. Bakı xəbər