GünAzTv: Yanvarın 20-də Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş 20 Yanvar hadisələrinin növbəti ildönümü tamam olur.

21 il əvvəlki yanvarda Bakıda və Azərbaycanın digər yerlərində baş verənlər haqda indiyədək çox yazılıb, danışılıb. Lakin bu günədək sovet ordusunun erməni quldur dəstələri ilə birlikdə Azərbaycan xalqına qarşı həyata keçirdiyi bu terror aktına görə məsuliyyət daşıyanlar öz cəzalarını almayıblar. Məlum olduğu kimi, həmin tarixdə Bakıya yeridilən sovet qoşunlarının tərkibində Stavropol, Rostov və Krasnodar vilayətlərindən xüsusi olaraq səfərbər edilən erməni muzdluları, kursantları və zabitləri, o cümlədən çoxlu sayda erməni əsgərləri yer alırdı. 20 Yanvar hadisələrinin canlı şahidləri xatırlayır ki, yanvarın 19-dan 20-nə keçən gecə Bakıya yeridilən qoşun hissələrinin tərkibindəki ermənilərdən ibarət dəstələr xüsusi amansızlıqla dinc əhaliyə divan tuturdular.

Ermənilərdən ibarət dəstələrin bu qoşun birləşmələrinin tərkibinə daxil edilməsi Moskvanın Azərbaycan xalqından qisas almaq üçün qurduğu cinayətkar planın bir hissəsi idi. Bu cinayətkar planı hazırlayanlar Bakıya yeridilən erməni canilərini elə ertəsi gün şəhərdən çıxararaq onları sıravi əsgərlərlə əvəz etmişdi. Buna baxmayaraq, mülki əhaliyə divan tutulması prosesində ermənilərin bilavasitə iştirakına dair çoxsaylı dəlillər mövcuddur.20 Yanvarda Bakıya sovet qoşunlarının yeridilməsində ABŞ-ın (Amerika Birləşmiş Ştatları) da rolu olub. Bu, Ermənistan KİV-lərində (Kütləvi İnformasiya Vasitələri) 21 il bundan əvvəl baş verənlər barədə neçə gündür davam edən təbliğatdan da bəlli olur. Belə ki, o vaxt ABŞ Konqresinin Nümayəndələr Palatasının ermənipərəst üzvləri Mixail Qorbaçova dəfələrlə müraciət ünvanlayaraq onu “Bakıda ermənilərə qarşı davam edən qırğını” dayandırmaq üçün qətiyyət göstərməyə çağırıb. Amerika Konqresindəki erməni nökərləri açıq şəkildə SSRİ (Şorəvi) rəhbərliyini Bakıya qoşun yeritməyə çağırıb. Həmçinin ABŞ Senatının üzvü, sonradan prezidentliyə namizədliyini irəli sürən Con Kerrinin də Qorbaçovu Bakıya qoşun yeritməyə çağıranlardan biri olduğu məlum olur. Ermənistan KİV-ləri indi 1990-cı ilin yanvarında Bakıda baş verənlər barədə Amerika mətbuatında erməni lobbisi tərəfindən təşkil edilən yazıları da yayırlar. Bu yazılardan məlum olur ki, Amerikanın aparıcı qəzetləri erməni təbliğatının əlində alət olub və Bakıda xristian ermənilərə  qarşı “qatı millətçilərin başlatdıqları qırğınlar” barədə yazıb. Məsələn, “New York Times” qəzetində dərc edilmiş belə məqalələrdən birində deyilir ki, Azərbaycanda baş verənləri Baltik ölkələrində başlamış müstəqillik hərəkatı ilə müqayisə etmək olmaz. Qəzet Bakıda küçələrə çıxanların xristianlara qarşı “kütləvi qırğın”a çağıran millətçi, radikal qruplar olduğunu yazır, bildirir ki, ABŞ rəhbərliyi Baltik respublikalarından fərqli olaraq SSRİ rəhbərliyinin Bakıdakı etirazları hərbi yolla yatırmasına qarşı çıxmamalıdır.Qeyd edək ki, indiyədək Dağlıq Qarabağda erməni separatizminin baş qaldırmasının arxasında SSRİ-nin o vaxtkı rəhbərliyinin dayandığı barədə fikirlər var. Lakin bu prosesləri başladanlardan biri də ABŞ-dakı erməni lobbisi, habelə SSRİ-nin dağıdılması planını işə salan Amerika kəşfiyyatı olduğuna dair ciddi mənbələrdə məlumatlar mövcuddur.Təsadüfi deyil ki, Bakıya sovet qoşunlarının yeridilməsi ilə eyni vaxtda ermənilər Dağlıq Qarabağda, Ermənistanın Azərbaycanla sərhədlərində də terror hücumlarını intensivləşdirib. Məsələn, yanvarın 19-da Bakıya sovet qoşunlarının yeridilməsinə bir neçə saat qalmış 3 minə yaxın erməni yaraqlısı Naxçıvan Muxtar Respublikasının Sədərək qəsəbəsinə basqın edib və oradakı şərab zavodunu dağıdıb. Qəsəbədən minlərlə dinc sakin erməni yaraqlılarının hücumundan xilas olmaq üçün İrana qaçmalı olub. Həmçinin Dağlıq Qarabağda azərbaycanlılara qarşı terror hücumları artıb. Bu hadisələrin eyni mərkəzdən idarə olunduğuna heç bir şübhə yeri qalmır. 20 Yanvar qırğınından 21 il keçdiyi bir vaxtda erməni təbliğatı yenə də öz işindədir. Ermənistanda Bakıda 1990-cı ilin yanvarında “ermənilərə qarşı soyqırım”dan bəhs edən filmin yeni versiyası çəkilib. Xəbərlərə görə, bu filmin yaxın günlərdə Rusiya telekanallarında yayılması gözlənilir. Digər film isə 1990-cı ilin yanvarında Dağlıq Qarabağda “ermənilərə qarşı təşkil olunan qırğınlar” barədədir. Bununla belə, erməni təbliğatçıları etiraf edirlər ki, artıq işlər çətinləşib, yəni erməni yalanlarını dünyaya sırımaq indi o qədər də asan deyil. Erməni politoloq Levon Məlik-Şahnazaryan deyir ki, Azərbaycan təbliğat müharibəsində Ermənistanı qabaqlayır. O, etiraf edir ki, Ermənistan son illərdə bu sahədə mövqeləri əldən verib. Ona görə də təbliğatın yeni formalarına üstünlük vermək lazımdır. Yeni musavat