GünAzTv: Son günlər İrandakı ayətullahlar bir-birinin ardınca Azərbaycanın dövlət başçısı İlham Əliyevə müraciət ünvanlayırlar. Müraciət müəllifləri ölkə rəhbərindən orta məktəblərdə hicaba qadağanın götürülməsini istəyirlər. 

Növbəti belə bir bəyanat isə İranın Qum şəhərində yaşayan ayətullah Cəfər Sübhanidən gəlib. Onun təfəkkürünə görə, məktəbə hicabla girişin qadağası ilahi hökm və insan haqlarıyla ziddir. Cəfər Sübhani iddia edir ki, hicab qadınlar üçün ilahi vacib əməldir:"Bu dəyərli gövhər onları həvəsbazların fitnəsindən qoruyur. Sizin ölkədəki problemlər öz qızlarının namusunun qorunmasına görə bir qrup inanclının həbsinə deyil, vəhdət və milli birlik sayəsində həll olunur". Əcəbdir, öz gözlərində tiri görməyən İran ayətullahları bizim gözümüzdə tük axtarırlar. Görəsən, hicabı namus və qeyrətin qorunması kimi qələmə verən, bundan bir vasitə olaraq istifadə edərək Azərbaycanda çaxnaşma yaratmağa çalışan Cəfər Sübhanilər erməni əsirliyində olan müsəlman-azərbaycanlı ana və bacılara təcavüzü niyə görməməzlikdən gəlirlər? Nə bilmək olar, bəlkə də həmin ayətullahlar təcavüzkar ermənilərlə dəfələrlə qucaqlaşıb, İran prezidentinin Ermənistan prezidentilə qucaqlaşması kimi, onlarla qardaş olduqlarını bildiriblər. Mən namusdan və qeyrətdən danışan ayətullah Cəfər Sübhaniyə yazıçı-jurnalist David Xerdiyanın "Xaç uğrunda" kitabındakı bəzi məqamları xatırlatmaq istərdim. Qaniçən erməni yazar qeyd edir: "Səhərin soyuğunda biz Daşbulaq yaxınlığındakı bataqlıqdan keçmək üçün ölülərdən körpü düzəltməli olduq. Mən ölülərin üstünə getmək istəmədim. Bunu görən podpolkovnik Seyran Ohanyan (Ermənistanın indiki müdafiə naziri-red.) mənə işarə etdi ki, qorxmayın. Mən ayağımı 9-11 yaşlı qızın meyidinin sinəsinə basıb addımlamağa başladım. Mənim ayaqlarım və şalvarım qan içində idi və beləcə 1200 meyidin üstündən keçdim. Martın 2-də "Qaflan" erməni qrupu (meyitləri yandırmaqla məşğul olurdu) 2000-ə yaxın alçaq monqolun (türklərin) cəsədlərini toplayıb ayrı-ayrı hissələrlə Xocalının 1 kilometrliyində yandırdı. Axırıncı yük maşınında mən başından və qollarından yaralanmış təxminən 10 yaşlı bir qız uşağını gördüm. Diqqətlə baxanda gördüm ki, o yavaş-yavaş nəfəs alır. Soyuq, aclıq və ağır yaralanmasına baxmayaraq, o hələ də sağ idi. Ölümlə mübarizə aparan bu uşağın gözlərini heç vaxt yaddan çıxarmayacam. Sonra Tiqranyan familiyalı bir əsgər onun qulaqlarından tutub artıq üzərinə mazut tökülmüş cəsədlərin içərisinə atdı. Daha sonra onları yandırdılar. Tonqaldan ağlamaq və imdad səsləri gəlirdi". Cənab Cəfər Sübhani, heç olubdurmu ki, siz və sizin kimi düşünənlər azərbaycanlı-müsəlman qadınların, qız uşaqlarının başlarına gətirilən bu və digər dəhşətli faktlarla bağlı erməni prezidentə müraciət edəsiniz? Və deyəsiniz ki, bəsdirin, müsəlman qadınlarının namusuna təcavüz etdiniz? Və yaxud hansısa beynəlxalq təşkilata, heç uzağa getməyək İslam ölkələrinin cəmləşdiyi quruma məktub göndərib, erməni vəhşiliyinə son verilməsini istəyəsiniz? Olmayıb, çünki sizin kimilər azərbaycanlıların bəlalarına nəinki seyirçi qalmısınız, hətta deyərdim ki, bundan ləzzət almısınız. Səbəb də çox sadədir-Azərbaycan dövlətinin güclənməsi, qüdrətli olması sizin maraqlarınıza uyğun deyil. Bir də ki, sizlərdə deyə bilmərəm, bizdə namusu hicabla qorumurlar. Xalq cəbhəsi