GünAzTv: İranın Qum şəhərində yaşayan şiə alimi, ayətullah Cəfər Sübhani bu günlərdə Azərbaycan dövlət başçısı İlham Əliyevə müraciət ünvanlayıb.

Müraciətində o, Azərbaycanın orta məktəblərində qoyulan hicab qadağasına toxunaraq, onu ləğv etməyə çağırıb.    İddia edib ki, məktəbə hicabla girişin qadağası ilahi hökm və insan haqları ilə ziddiyyət təşkil edir. Öz düşüncəsinə haqq qazandırmaq üçün C.Sübhani hətta, yeri gəldi-gəlmədi, təhsil və təlim-tərbiyə barəsində beynəlxalq hüquqi bildirişin 26 maddəsinin 2-ci bəndini əsas gətirib: "Təlim-tərbiyə güzəştlə anlaşmaq, müxalif etiqadlara hörmətlə yanaşmaq, bütün xalqlar, etnik və məzhəb cəmiyyətləri arasında dostluq yaratmaqdan ibarətdir. Azərbaycanın da imzaladığı belə bir prinsipi nəzərə aldıqda, görəsən iffəti qorumaq və Allahın qanununa riayət etməyə görə cəmiyyətin yarısının təhsildən məhrum olması, ilahi qanunu görməzliyə vurması və vicdan həbsinin təzyiqinə məruz qalması düzgündürmü? Müraciət müəllifinin iddiasına görə, hicab qadınlar üçün ilahi vacib əməldir: "Bu dəyərli gövhər onları həvəsbazların fitnəsindən qoruyur. Sizin ölkədəki problemlər öz qızlarının namusunun qorunmasına görə bir qrup inanclının həbsinə deyil, vəhdət və milli birlik sayəsində həll olunur". Bu açıqlamadan aydın sezilir ki, ölkəmiz əleyhinə yönələn belə fikirlərin heç bir əsası yoxdur. Azərbaycan unitar, demokratik bir dövlətdir. Burada Konstitusiyada nəzərdə tutulan vicdan azadlığına da ən geniş mənada riayət olunur. Bizdə dövlət dindən ayrıdır. Təhsil müəssisəsi isə dövlətin sərəncamı altındadır. Ona görə də burada hər hansı bir qanun və ya qərar vermək onun müstəsna səlahiyyəti çərçivəsindədir. Təhsil sistemi də dünyəvi xarakter daşıyır. Bu mənada da ora hicabla gəlməyin qadağan edilməsi normal bir haldır. Bu heç də insanların dini inancı ilə oynamaq deyil. Əksinə, Azərbaycanda hər bir dini inanca hörmətlə yanaşılır. Bunun nəticəsidir ki, ölkəmizdə istənilən dindən olan insanlar mehriban şəraitdə yaşayır. Dərinə getdikdə görərik ki, İranın özündə dini tolerantlıqdan əsər-əlamət yoxdur. Burada digər dinlərə və millətlərə mənsub insanlar tez-tez müxtəlif səpkili təzyiqlərlə üzləşir. Azərbaycan məktəblərində isə, milli-dini fərqlilikdən asılı olmayaraq, əsl mehribançılıq, tolerantlıq hökm sürür. Burada hamı bir-birinə dözümlüdür. Maraqlıdır, qadının namusunu qorumaq yalnız hicab taxmaqla ölçülürmü? Onda belə çıxır ki, hicab taxmayan dünya qadınlarının əksəriyyəti namussuzdur? Məgər İranın özündə, hicab taxmalarına baxmayaraq, əxlaqsız hərəkətlərlə məşğul olan zərif cins nümayəndələri azdırmı? Bütün bunlar onu göstərir ki, İranlı şiə aliminin müraciətdə səsləndirdiyi fikirlər tam əsassızdır və heç bir hüquqa, insan azadlığına, habelə mənəvi-əxlaqi dəyərlərə sığmır. Bu, sadəcə olaraq, Azərbaycanda bəzi radikal dini qrupların öz mövqelərini itirə biləcəyi qorxusundan irəli gələn bir təşvişdir ki, onlar belə hay-küy qaldırır.    Millət vəkili Fərəc Quliyev hesab edir ki, bu hal əslində İranın ölkəmizə qarşı olan düşmənçilik fəaliyyətinin növbəti təzahürüdür: "Bir başqa ölkə nümayəndəsinin canfəşanlıqla bizim daxili işlərimizə qarışmağı düzgün qəbul etmirəm. Müracət ünvanlayan əslən azərbaycanlı adam belə qeyrətli-namusludursa, İrandakı 30 milyonluq soydaşımızın istismarına gərək göz yummaya. Azərbaycan qadınları İranın zindanlarında hər cür təhqir və təqiblərə məruz qalır, bu adam isə susur. Minlərlə adamı asırlar, susur. Din pərdəsi altında Şeyx Nəsrullahlıq etməyə dəyməz. Azərbaycan tolerant ölkədir, belə geniş tolerantlıq heç bir ölkədə yoxdur. Burada bütün dini məzhəblər sərbəst fəaliyyət göstərir. Heç kim bizdəki dini azadlığa irad tuta bilməz. Yüzlərlə azərbaycanlı qadını erməni əsirliyində olduğu halda, Ermənistan hakimiyyətinə etiraz müraciəti etməyən bu ayətullah birdən-birə bizə, özü də çox tərbiyəsiz şəkildə müraciət edir. İslam Partiyasının üzvü olan insanlar fitva verib Azərbaycan dövlətinə qarşı çıxmağı planlayıbsa, onlara münasibətdə hansı ölçü götürülməlidir? Bu hallar Quzey Azərbaycana qarşı İranın mütəmadi düşmənçilik fəaliyyətinin növbəti təzahürüdür. Müraciət çox tərbiyəsiz müraciətdir. Onu ünvanlayan belə namusludursa, Güney Azərbaycanda minlərlə azərbaycanlı qadının başına gətirilən oyunlara etirazını bildirsin. Onun bu tip Şeyx Nəsrullah oyunu keçməyəcək. Azərbaycan dövləti belə müraciətlərə əhəmiyyət vermədən öz dövdətçiliyini qorumaqda davam etməlidir".    Azərbaycan Təhsil Şurasının sədri Əjdər Ağayev hər bir fəaliyyətin hüquqi əsaslara söykənməli olduğuna diqqət yetirdi: "Azərbaycan məktəblərilə bağlı Təhsil Nazirliyinin qərarı var ki, şagirdlər məktəbə məktəbli formasında gəlməlidir. Belə bir hüquqi qərar varsa, kiminsə onu pozmağa haqqı yoxdur. Belədə, həmin qərarı pozanlar əslində xəta törətmiş olur. Nazirlik məktəbdə təkcə hicabın əleyhinə deyil ki. Məktəbli dərsə normal müəyyənləşdirilən məktəbli geyimində gəlməlidir. Bu gün hicab məsələsi aktuallaşdığından, biz onun adını çəkirik. Digər formalar olsa, onun da adını çəkib, belə olmadığını deyərik. Hər kəsin qeyrəti, vicdanı, namusu onun içində, iradəsindədir. Nə zamandan geyim forması insanın əxlaqını qoruyan vasitəyə çevrilib? Bu tarixən olmayıb, indi də belə deyil. Eksperimentlər göstərir ki, əxlaqın normallığı yalnız insanın özünün vicdanından gələn norma ilə tənzimlənir. Hələ İranın özündə əxlaqi keyfiyyətlərdən uzaq olan hicab və çadralı insanlar olub və var. Ona görə də hicabı ortaya atmaqla bunun guya əxlaqı qoruduğu yanaşması düzgün deyil. Ölkəmizin təhsil sisteminin öz qayda-qanunları var, biz onu qoruyuruq. Kim öz bildiyi kimi hərəkət edəcəksə, onda qanunlar nə üçündür? İnsan huquqlarından istifadəyə gəldikdə, bu dərəbəylik, xaos, qanunsuzluq deyil. Bu hüquqlardan istifadə vəzifə ilə tən gəlməlidir. Bizim məktəblinin vəzifəsi məktəb qanunlarına tabe olmaq və lazımi təhsil, tərbiyə almaqdır. Ona sivil cəmiyyətdə yaşamaq yolları öyrədilir".   Bakı xəbər