GünAzTv: Ermənistanın və erməni diasporunun Qarabağa dair əsas təbliğat tezislərindən biri əllərindən çıxıb. 

Belə görünür ki, ermənilər artıq Azərbaycan ərazilərinin bir hissəsinin işğal edilməsinə Dağlıq Qarabağdakı erməni əhalisinin “demokratik qaydada öz müqəddəratlarını təyin etməsi” və “demokratik, azad dövlət” qurmaları barədə təbliğatla haqq qazandıra bilməyəcəklər. Dünyada azadlıqların vəziyyətinə dair illik hesabatlar hazırlayan, qərargahı Nyu-Yorkda yerləşən “Freedom House” təşkilatı Dağlıq Qarabağdakı kriminal və hərbi-separatçı rejimi “yarı demokratik” adlandırmaqdan, nəhayət ki, əl çəkib. Təşkilatın builki hesabatında Dağlıq Qarabağ “azadlıqların olmadığı ərazi” olaraq göstərilir.

Qeyd edək ki, “Freedom House” ötən illərdə Azərbaycanı qeyri-azad ölkələrin siyahısına daxil edib, lakin onun ərazilərinin bir hissəsi olan Dağlıq Qarabağı “qismən azad ərazi” adlandırıb. Təşkilatın bu yanaşması Azərbaycanın rəsmi dairələrində və ictimaiyyətində haqlı narazılıqlara səbəb olurdu. “Freedom House”in Azərbaycan ərazilərinin bir hissəsinə ayrıca yanaşaraq orada guya nisbətən demokratik hakimiyyətin mövcud olması barədə rəylə çıxış etməsi erməni lobbisinə imkan yaradırdı ki, demokratiya və azadlıqlar barədə arqumentlər gətirərək Dağlıq Qarabağın yenidən Azərbaycanın tərkibinə daxil edilməsinin qeyri-mümkünlüyü barədə təbliğat aparsınlar. Erməni lobbisi dəfələrlə “Freedom House”in Dağlıq Qarabağı “qismən azad ərazi” adlandırmasından ABŞ Konqresində, Amerika mətbuatında və digər çevrələrdə istifadə ediblər. Həmçinin Ermənistan rəhbərliyi, bu ölkənin xarici siyasətinə məsul olanlar hər fürsətdə “Freedom House”dən sitat gətirərək Dağlıq Qarabağın Azərbaycanın tərkibinə qayıtmasının mümkünlüyünü sübut etməyə çalışırdılar. Lakin təşkilat bu ilki hesabatında göstərir ki, ötən il Dağlıq Qarabağda azadlıqlarla bağlı vəziyyət pisləşib. Nəticədə bu regionda azadlıqların mövcud olduğunu demək qeyri-mümkün olub. “Freedom House”in hesabatı Ermənistanda xeyli çaşqınlıq yaradıb. Hakim Respublika Partiyasının sədr müavini Razmik Zöhrabyan deyib ki, bu qiymətləndirmə Qarabağa dair danışıqlarda erməni tərəfinin güzəştə getməsinə nail olmaq üçün göstərilən təzyiqdir. “Bu, necə ola bilər? Cəmi 6 ay bundan qabaq Qarabağ hətta Ermənistandan daha azad ərazi hesab edilirdi. Bu müddət ərzində heç bir hadisə baş verməyib, həbslər olmayıb, rejim sərtləşməyib, indi birdən onlar durub deyirlər ki, Qarabağ azad olmayan ərazidir. Bu qiymətləndirmə sadəcə olaraq erməni tərəfinə təzyiq etmək cəhdidir ki, Qərb qüvvələri prosesə müəyyən təsir imkanı əldə etsinlər” - deyə R.Zöhrabyan “Azadlıq” radiosunun erməni xidmətinə bildirib. O, diqqəti belə bir məqama cəlb edib ki, münaqişənin nizamlanmasına dair danışıqlarda irəliləyiş yoxdur, Qərb isə münaqişənin tezliklə nizamlanmasını istəyir: “Astana sammitindən sonra status-kvonun saxlanılması situasiyası yarandı. Görünür, onlara belə lazım olub ki, danışıqları irəli aparmaq üçün Qarabağ hakimiyyətinə daha çox təzyiq etsinlər, imkan verməsinlər ki, Qarabağ danışıqlarda birbaşa iştirakçı olsun”. Erməni parlamentindəki “İrs” müxalifət fraksiyasının deputatı Armen Martirosyan da Dağlıq Qarabağın “Freedom House”in hesabatında bu cür qiymət almasını “olduqca mənfi hal” adlandırıb. “Mən çox təəssüf edirəm ki, Dağlıq Qarabağ bu il azad olmayan ərazi adlanıb. Bu, danışıqlara müəyyən təsir göstərə bilər” - deyə A.Martirosyan narahatlığını ifadə edib. Ermənistan Milli Konqresinin koordinatoru Levon Zurabyan isə deyib ki, Qarabağda azadlıqların mövcud olmadığı barədə qiymətləndirmə erməni diplomatiyasını münaqişənin nizamlanması prosesindəki mühüm qələbədən məhrum edir: “Beynəlxalq ictimaiyyət inanırdı ki, Qarabağ demokratiya məsələsində daha yuxarı səviyyədə olduğu üçün Azərbaycanın tərkibinə qayıda bilməz. Bu, çox mühüm qələbə idi. Bu gün həmin qələbə əldən verilib”. L.Zurabyan məğlubiyyətə görə Ermənistan hakimiyyətinin günahkar olduğunu deyib. Müxalifət təmsilçisi bildirib ki, Ermənistan hakimiyyətinin son illərdə yeritdiyi siyasət ona aparıb çıxarıb ki, Qarabağdakı hakimiyyət İrəvanda mövcud klan rejimin əlavəsinə çevrilib. “Qarabağ artıq müstəqil səsə malik deyil, orada seçkilər Ermənistandakı ssenari ilə keçirilir” - deyə L.Zurabyan bildirib. Hakim koalisiyaya daxil olan Firavan Ermənistan Partiyasının katibi Aram Səfəryan isə deyib ki, “Freedom House”in qiymətləndirməsi ədalətli deyil. Çünki ötən ilin mayında bölgədə keçirilən parlament seçkiləri “azad və ədalətli” keçib: “Bu seçkilər Ermənistan üçün də nümunə ola bilərdi. Ona görə də mən bu qiymətləndirməni qəbul etmirəm”. A.Səfəryanın sözlərinə görə, “Freedom House”in hesabatı danışıqlara təsir etməyəcək. Belə görünür ki, Azərbaycan diplomatiyası və lobbisi ləngimədən “Freedom House”in Dağlıq Qarabağdakı rejimə verdiyi qiymətdən faydalanmalıdır. Onsuz da Azərbaycan bu bölgədə kriminal, beynəlxalq terror qruplaşmaları ilə əlaqəli və çoxsaylı hərbi cinayətlərə görə məsuliyyət daşıyan rejimin mövcud olduğu barədə təbliğat aparıb. Erməni tərəfi isə bu təbliğata bölgədə guya “demokratik hakimiyyət”in mövcud olması barədə tezislərlə cavab verib. İndi Ermənistanda etiraf olunduğu kimi bu mühüm arqument erməni lobbisinin və diplomatiyasının əlindən çıxıb. Deməli, bu fürsətdən ən çevik formada istifadə etmək lazımdır. Lakin bu zaman Azərbaycanda siyasi azadlıqlar və insan haqları sahəsində “Freedom House” qeyri-hökumət təşkilatıdır, lakin kifayət qədər mötəbərdir və onun rəhbərliyində ABŞ administrasiyasında yüksək postlar tutmuş şəxslər daxildir. Təşkilatın indiki icraçı direktoru dövlət katibinin keçmiş müavini Devid Kremerdir. Təsadüfi deyil ki, rəsmi Bakı təşkilatın ötən illərdə separatçı bölgəyə verdiyi qiymətlə bağlı ABŞ administrasiyasına qarşı etirazları təşkil etmişdi.  Yeni musavat