GünAzTv: Dünən gecə Livanda Azad Vətənpərvərlər Hərəkatı Xristian Partiyasının qərargahına iki qumbara atılıb.

Sabiq baş nazir Mişel Aunun rəhbərlik etdiyi bu partiya az əvvəl hökumət koalisiyasından çəkilən və bununla da siyasi böhrana yol açan “Hizbullah” Hərəkatı ilə müttəfiqdir. Paytaxt Beyrut yaxınlığındakı Beyt-Şabab qəsəbəsində yerləşən partiyanın qərargahında baş verən partlayış zamanı xəsarət alan olmayıb.  Qeyd edək ki, Livanda hökumət böhranı Livanın sabiq baş naziri Rafik Həririnin öldürülməsi ilə bağlı BMT Tribunalı tərəfindən aparılan araşdırma ilə bağlı yaranıb. Rafik Hərinin oğlu, Livanın hazırkı baş naziri Səəd əl-Həriri hökumətin buraxılması ilə bağlı prezidentə müraciət edib və müraciət qəbul olunub. Yeni hökumət qurulana qədər Səəd Həriri hökuməti fəaliyyətini davam etdirməlidir. Ancaq “Hizbullah”ın hökumət koalisiyasından çıxması ölkədə müharibə təhlükəsini artırıb. Dünən axşam saatlarında Səəd Həririnin Türkiyəyə gəldiyi məlum olub. Livan baş nazirini Türkiyənin dövlət naziri Cövdət Yılmaz qarşılayıb. Səəd Həriri baş nazir Rəcəb Tayyib Ərdoğanla görüşəcək. Türkiyə Səəd Həririnin mövqeyini öyrənəcək və Livandakı böhranın aradan qaldırılması istiqamətində atıla biləcək addımları müəyyənləşdirəcək. Bu arada Livanda “Hizbullah”a yaxın saytlar Səəd Həririnin qorxudan ölkəni tərk etdiyi və geri qayıtmayacağı barədə məlumatlar yayıb. Türkiyənin xarici işlər naziri Əhməd Davudoğlu Avropa Birliyinin beynəlxalq əlaqələr və təhlükəsizlik siyasəti üzrə ali nümayəndəsi Katerin Astonla görüşdən sonra bildirib ki, Livandakı hadisələr son dərəcə mühümdür. Nazirin sözlərinə görə, o, avropalı diplomatla danışarkən, iki dəfə Səəd Həriri ilə telefon əlaqəsi saxlayıb. Nazir qeyd edib ki, Livanda sabitliyin qorunması bölgədəki sabitlik üçün çox mühümdür ki, Türkiyənin siyasətinə cavab verir. Baş nazir Rəcəb Tayyib Ərdoğan siyasi böhranın həlli üçün tərəfləri konsensusa çağırıb. Yerli müşahidəçilər səfəri şərh edərək deyirlər ki, Ankara bölgə məsələlərində öz vasitəçi imkanlarından daha geniş istifadə etməkdədir. Ən maraqlı isə odur ki, hər yerdə olduğu kimi, Livanda da ermənilər təxribatçı əməllərindən qalmır. Ölkədə yaranmış siyasi böhranın dərinləşməsi ehtimalı hər ötən gün artır. Ermənilərin «Qnçakyan» sosial-demokrat partiyasının sədr müavini Aleksan Keoşkeryan faktiki olaraq ölkə rəhbərliyinə ultimatum verib və Livanda toqquşmaların başlaya biləcəyini söyləyib. Keoşkeryan prezident Mişel Süleymanın yaxın vaxtlarda yeni baş nazir təyin etməli olduğunu deməklə yanaşı, bildirib ki, bu postu mütləq Saad Həriri tutmalıdır: «Ondan başqa namizəd yoxdur. Unutmayaq ki, baş nazir sünniləri təmsil etməlidir. Parlamentin spikeri Nabih Berri küçə toqquşmalarından qaçmağın vacib olduğunu bildirir. Amma unutmayaq ki, siyasi zəmində toqquşmaların yenilik olmadığı Livan haqda danışırıq. Bir sözlə, hər şey ola bilər». Yaranmış çətin vəziyyətdə Livanın erməni partiyalarının mövqeyini də açıqlayan Keoşkeryan onların həm çoxluğu, həm də azlığı təmsil etdiklərini bildirib: «Qnçaki» çoxluğu təmsil edir və Həririni dəstəkləyir. «Daşnaksütun» isə «Hizbullah»ın tərəfindədir. Amma istənilən halda erməni diasporu toqquşmaların tərəfdarı deyil». Kaspi