GünAzTv mətbuat mərkəzi Azərbaycan Milli Məclisinin üzvü Zahid Orucun APA-ya verdiyi müsahibəni olduğu kimi təqdim edir:

- Azərbaycan prezidentinin Yeni il və Dünya Azərbaycanlılarının Həmrəylik Günü münasibətilə etdiyi müraciət İranda bəzi şərhçilərdə, deputatlarda narahatlıq yaradıb... - Əvvəla, prezidentlərin Yeni İl mesajları artıq bütün dünyada ənənəyə çevrilib. Bu mesajlarda geridə qalan ilin qiymətləndirilməsi və gələcək illərlə bağlı arzular ifadə olunur. Azərbaycanda il keçidi həm də bir başqa tarixi günlə, Dünya Azərbaycanlılarının Həmrəylik Günü ilə də əlamətdardır. Prezident İlham Əliyevin builki müraciəti ölkə həyatının əsas aparıcı tendensiyalarını dolğun əks etdirməklə bərabər, əvvəlki illərdə olduğu kimi dünyada yaşayan bütün azərbaycanlıları vahid Azərbaycan dövləti ətrafında birləşməyə çağırırdı. Prezident öz müraciətində Azərbaycan dövlətinin dünyadakı soydaşlarımızı müdafiə edəcəyini bildirərək onları yaşadıqları ölkələrin ictimai-siyasi həyatında daha fəal olmağa və geniş yer tutmağa səslədi. Heç şübhəsiz ki, bu, səfərbəredici bir mövqedir. Bütün resursların Azərbaycanın mənafeyi naminə birləşdirilməsi nəinki normal bir istək, həm də dövlət başçısının konstitusion səlahiyyətidir. Lakin çox təəccüblüdür ki, İranın ayrı-ayrı dairələri bu çıxışa münasibətdə qıcıq doğuran reaksiyalar nümayiş etdirirlər. - Sizcə, İrandakı bəzi politoloqlar, şərhçilər nədən narahat olublar?- Azərbaycan prezidentinin müraciətinin tezislərini təhrif etməyə çalışanlar əslində bu təhriflə nədən ehtiyatlandıqlarını nümayiş etdirdilər. İranın eks-qubernatorları, ayrı-ayrı televiziya şərhçiləri, həmçinin parlamentin təhlükəsizlik komitəsinin rəhbərinin eyni tezislər əsasında səslənən bəyanatları bu “azad” ölkədə hamının necə də bir dillə danışdığını və “ictimai etirazlar”ın miqyasını göstərdi. Dünya azərbaycanlısı yaxşı gördü ki, sən demə, bir millətin həmrəyliyi başqa bir dövlətin siyasi iflasına səbəb ola bilərmiş. Biz əlbəttə ki, qonşu ölkənin ictimai fikrini formalaşdıran şəxslərin müstəqil qərar vermə imkanlarını araşdırmırıq. Əks halda, dünyada hökm sürən antiİran hərəkatının təmsilçisi olduğumuz barədə qarşı tərəfə yanlış arqumentlər verərdik ki, bu da bizə gərək deyil. Üstəlik, İran prezidentinin yeni il çıxışının bu ölkənin həyatında mühüm hadisəyə çevrilib-çevrilmədiyi və öz xalqının gələcəyini müəyyənləşdirmək baxımından hansı əhəmiyyətə malik olduğunu söyləmək də bizim üçün çətindir. Azərbaycanın dövlət rəhbərinin çıxışında ərazi iddiaları elementi tapmaq üçün verilən təfsirlər və təhlilləri iranlı dostlarımız bir kənara qoymalıdırlar, həm də ona görə ki, İran prezidenti elə bu yaxınlarda Türkiyədə İlham Əliyevin ünvanına təkcə diplomatik səciyyə daşımayan xoş epitetlər söyləmişdi. Ona görə İran vətəndaşlarının bu dövlətin ideologiyası ətrafında birliyini sarsıtmaq məqsədinə xidmət edəcək çıxışların tezisləri başqa arqumentə söykənməli idi. - Sizcə, bu narahatlıqlar hardan qaynaqlanır? - Aydındır ki, bu narahatlığı doğuran səbəblərin həqiqi məqsədi tamam başqadır. İran siyasi elitasının bəlli dairələrinin təlimatı əsasında antiAzərbaycan mövqeyini dilə gətirənlər, Azərbaycanın xarici siyasət kursunda öz ölkəsinə qarşı təhlükə axtaranlar deyəsən axı sadəcə qüdrətli və azad Azərbaycan gerçəkliyindən rahatsızdılar. Məgər “hamımızın bir vətəni var” deyən prezident Avropa azərbaycanlısına onun yaşadığı ölkənin siyasi sistemi əleyhinə istiqamətmi verir, yaxud soydaşlarımızı yaşadıqları dövlətlərin idarəçilik elitası əleyhinə qalxmağamı təşviq edir? Aydındır ki, burada heç bir itaətsizlik elementlərindən söhbət gedə bilməz. Şübhə yoxdur ki, burada səbəb müstəqil Azərbaycanın geosiyasi və geoiqtisadi faktora çevrilməsi gerçəkliyidir. Yüz illər ərzində müstəqil dövlət amalları ilə yaşayan millətimizin gücünü məhz parçalayaraq, onları vahid hədəflərdən yayındırıblar. İndi dünya miqyasında yaşayan böyük bir xalqın təşkilatlanması və toparlanması baş verirsə, narahatlıqların deyilməyən səbəbi məhz budur.- İranın bəzi dairələrinin bu cür bəyanatlar səsləndirmələrinə Ermənistanla bu ölkə arasındakı yaxın münasibətlərin nə qədər aidiyyəti var? - Bilirsinizmi, çox hörmətli Mahmud Əhmədinejat dünya və İran azərbaycanlılarına müraciət edib öz ölkəsini onların güvənc yerinə çevrildiyini qeyd etsə, bu bizi rahatsız etməzdi. Təki İran rəhbərliyi bunun üçün gərəkən tədbirləri həyata keçirsin, Şər dediyi dünya işğalçısına - deməli, həm də Ermənistana qarşı müharibədə dünya azərbaycanlısı ilə həmrəylik göstərsin. Ona görə də “Azərbaycan bayrağı Şuşa və Xankəndində dalğalanacaqdır” deyən prezident İlham Əliyevin bəyanatına Ermənistan və İranın ekspertlərinin vahid antihəmrəy mövqeyi belə bir ritorik suala əsas yaradır: siz kiminlə həmrəysiniz, cənab Ələddin Brucerdi? Siz ki, İran parlamentində təhlükəsizlik məsələlərinə cavabdehlik daşıyırsınız. Bəlkə İranın regional və beynəlxalq izolyasiya səbəbləri fonunda həm də bunu görəsiniz ki, Azərbaycanın düşmənləri İranın yaxın dostlarıdır!- İranda bəzi deputatları narahat edən məsələ həm də Azərbaycan prezidentinin dünya azərbaycanlılarının lideri kimi qəbul olunması və türk dünyasında, regionda güclü mövqeyə malik olmasıdır. Onlar bunu çıxışlarında da açıq-aydın bildiriblər...- Azərbaycan prezidentinin dünya azərbaycanlılarının lideri kimi qəbul olunmasına bir mənəvi-siyasi liderlikdir. Hər bir dövlət dünyadakı və regiondakı əsas tendensiyaları və çağırışları dəyərləndirir və bu, çox normaldır. Dövlətlər məhz bunun üzərində öz gələcək fəaliyyətlərini qurur, öz xalqlarını səfərbər edirlər. Əslində İranın məlum dairələri bu məsələ ətrafında dəyərləndirmə apararkən Azərbaycanın ötən müddət ərzində daim qonşu ölkənin daxili həyatına müdaxilədən özünü tamamilə kənar saxlamasını qiymətləndirməli idilər. İranın nüvə problemi ilə bağlı məsələyə Azərbaycanın reaksiyası da ortadadır. İranın rəsmi dairələri bunu iki ölkə arasında münasibətlərin gələcəyi üçün mühüm nailiyyət kimi dəyərləndiriblər. Bütün bunlar nəzərə alınarsa, İranın narahatlığına heç bir əsas yox idi. Azərbaycan prezidentinin dünya azərbaycanlılarına müraciəti kimisə narahat etməməlidir. Azərbaycanın tarixi torpaqlarında yaradılan Ermənistanın siyasi şərhçiləri ilə İran ekspertlərinin «birliyinin» gələcəyini görmək istəməzdik. Diqqət yetirsək, dini bayramlar zamanı da Azərbaycan prezidenti dünya müsəlmanlarına müraciət edir. Belə çıxır ki, bundan da narahat olmaq lazımdır? Yetər ki, İranın özünü Fələstinin və dünyada yaşayan digər müsəlmanların qoruyucusu kimi təqdim etməsini misal göstərək. Bu cür reaksiyalar İranın gələcək siyasəti üçün problemlər yarada bilər. Azərbaycan indiyədək İranın «Səhər» kanalının təlimatlar əsasında antiazərbaycan siyasətinə çox dözümlü münasibət göstərib. Bu gün «Səhər» kanalı Azərbaycan müxalifətinin tribunasına çevrilib. Bu kanal sanki ölkədaxili həyatda bir tərəf kimi iştirak etməkdədir. Amma Azərbaycan hökuməti indiyədək bir dəfə də olsun rəsmi şəkildə İranın qarşısında bununla bağlı hansısa tələblə çıxış etməyib. Belə olan halda İranın ayrı-ayrı dairələrinin Azərbaycan prezidentinin çıxışı ilə bağlı tutduğu mövqe yanlışdır. Azərbaycan prezidentinin dünyada yaşayan bütün azərbaycanlıların lideri olması mənəvi və siyasi keyfiyyətdir. Söhbətin hansısa rəsmi statusdan gedəcəyini gələcək müəyyənləşdirəcək. Başqalarının da bu mənəvi və siyasi statusa sahiblənmək şansları var. Amma bu bir faktdır ki, Azərbaycan prezidenti ötən müddət ərzində türk dünyasının yaxınlaşmasında, diaspor institutlarımızın strukturlaşmasında, daha geniş arealda siyasi maraqlarımızın müdafiəsində tarixi fəaliyyət göstərir, lazımi təşkilati mexanizmlər yaradır. Bu işi İranın liderləri də edə bilərmi?