GünAzTv: “Press TV” bildirir ki, Azərbaycan İsrailin “sionist rejimi” ilə sıx əlaqə qurması İslam ölkələrinin qəzəbinə səbəb olub.

Azərbaycan prezidenti İlham Əliyevin Yeni illə bağlı yayımlanan çıxışına İrandan qəzəbli reaksiyalar gəlməkdədir. Xəbər verildiyi kimi, İ.Əliyevin Azərbaycan dövlətinin dünyanın harasında yaşamasından asılı olmayaraq bütün azərbaycanlıların arxasında olduğunu bəyan etməsi on milyonlarla azərbaycanlının yaşadığı İranda bəzi çevrələri narahat edib. İran KİV-ləri bu çıxış barədə xəbərlər yayaraq Azərbaycan prezidentinin özünü bütün dünya azərbaycanlılarının lideri elan etdiyini bildiriblər.

Məsələyə İran XİN-in rəsmi nümayəndəsi Ramin Mehmanpərəst reaksiya verib və deyib ki, KİV-lər Azərbaycan prezidentinin çıxışını təhrif ediblər. Buna baxmayaraq, İran parlamentinin müdafiə və təhlükəsizlik komitəsinin rəhbəri Ələddin Brucerdi “Mehr” agentliyinə açıqlamasında Azərbaycan prezidentinin çıxışının narahatlıq doğurduğunu deyib və bildirib ki, o İranda yaşayan milyonlarla azərbaycanlının lideri ola bilməz. Çünki İran azərbaycanlıları bu ölkənin rəhbərlərini özlərinə lider hesab edirlər. Brucerdi Azərbaycan rəhbərlərinin “reallıq hisslərindən uzaqlaşdıqlarını” da deyib.Rəsmi Tehran, daha doğrusu XİN Azərbaycan prezidentinin çıxışının təhrif edildiyini bəyan etsə də, İran KİV-lərində hələ də İlham Əliyevin çıxışı ilə bağlı qəzəbli şərhlər verilir. Azərbaycan prezidenti “sionist rejim”lə müttəfiqlikdə, dindar müsəlmanları sıxışdırmaqda ittiham olunur. İnqilab Keşikçiləri Korpusuna bağlı ingilisdilli “Press TV” kanalının saytında da Azərbaycan prezidentinin siyasətini tənqid edən məqalə yer alıb. Orada deyilir ki, əhalisinin 93 faizi müsəlman olan ölkənin hakimiyyəti məktəblərdə baş örtüsünü qadağan edib və dindarların etirazını zorakılıqla yatırıb. “Bu mübahisəli qərar bir sıra Avropa ölkələrinin qəbul etdikləri antiislam qərarlarını xatırladır və onların islamafobiya siyasətlərinə uyğundur. Azərbaycanın despotik hakimiyyəti bu mübahisəli qərarı verməklə Qərb dövlətlərinin diqqətini özünə cəlb etmək və onların istəkləri qarşısında boyun əymək niyyətini nümayiş etdirir. Bu qərar həm də Azərbaycanın öz sıralarında bir dənə də müsəlman ölkəsi olmayan Avropa İttifaqına qoşulmaq maraqları ilə bağlı ola bilər” deyə, məqalədə bildirilir.“Press TV” bildirir ki, Azərbaycan İsrailin “sionist rejimi” ilə sıx əlaqələr quraraq bir çox islam ölkələrinin qəzəbinə səbəb olub. Belə ki, Azərbaycan müstəqilliyini elan etdikdən cəmi bir ay sonra İsraillə diplomatik münasibətlər qurub və sonradan münasibətlər inkişaf edib. Məqalədə İsrailin xarici işlər naziri, İrana qarşı sərt mövqeyə sahib Aviqdor Libermanın Bakıya səfəri, İranın və Bakıdakı müsəlmanların etirazlarına baxmayaraq, onun yüksək səviyyədə qəbul edilməsi də xatırladılır. “Azərbaycan müsəlman dünyası ilə münasibətlərini zədələyən sonuncu addımı dekabrın 31-də atıb, ölkə prezidenti televiziya ilə çıxış edərək özünü bütün dünya azərbaycanlılarının lideri adlandırıb. Statistikaya görə, azərbaycanlılar İranda əhalinin 24 faizini təşkil edir və ölkənin ictimai, siyasi həyatında, elm və texnologiya sahəsində mühüm rol oynayırlar. Lakin onlar heç vaxt xarici ölkənin liderini özlərinə lider saymazlar. Bu cür təxribatçı çağırışlar İrandakı etnik qruplar daxilində ziddiyyətlər yaratmağa hesablanıb, lakin onların heç bir effekti ola bilməz” deyə, məqalədə bildirilir.Qeyd edək ki, Dünya Azərbaycanlılarının Həmrəylik günü münasibətilə etdiyi çıxışda Azərbaycan prezidenti bunları deyib: “Mən dünyada yaşayan bütün soydaşlarımızı bu bayram münasibətilə ürəkdən təbrik etmək istəyirəm. Onlar bilməlidirlər və bilirlər ki, onların arxasında güclü, qüdrətli, müasir, azad Azərbaycan dövləti dayanır. Azərbaycan onların dayağıdır, onların arxasıdır. Onlar da yaşadıqları ölkələrdə Azərbaycanı təmsil edirlər və ölkəmizin maraqlarının təmin edilməsinə gündəlik fəaliyyətləri ilə öz töhfələrini verirlər. Dünyada yaşayan bütün azərbaycanlılar bilirlər ki, Azərbaycan dövləti daim onlarla bərabərdir, onların fəaliyyətini izləyir, onların qayğıları ilə yaşayır. Dünyada mövcud olan Azərbaycan diaspor təşkilatları da öz səmərəli fəaliyyətləri ilə bizim gücümüzü artırırlar”. Müşahidəçilərin fikrincə, bu sözlər Azərbaycan prezidentinin ölkəsinin o cümlədən İranda yaşayan azərbaycanlıların da arxasında durmasını nəzərdə tutması qənaətinə gəlməyə əsas verə bilərdi. İrandan bu çıxışla bağlı səngimək bilməyən qəzəbli reaksiyaların səbəbi isə belə görünür ki, həmin çıxışdan daha çox dünya azərbaycanlılarının həmrəyliyi gününün qeyd olunmasında və ideyanın özündədir. Bu bayram vaxtilə İranla Azərbaycan arasında sərhədlərin dağıdılmasının və Arazın ayırdığı soydaşlarımızın uzun həsrətdən sonra görüşmək imkanı qazanmasının ildönümü kimi qeyd olunur. İran çevrələri Qərbin bu ölkədə rejimi dəyişdirmək üçün etnik amildən, xüsusən azərbaycanlılardan istifadə edə biləcəyindən narahatdır. İranın şimalında azərbaycanlıların müstəqil dövlətinin mövcudluğu faktını da qonşu ölkədə həzm edə bilmirlər. Yeni musavat