GünAzTv mətbuat mərkəzinə növbəti müsahibi Təhlükəsizlik Araşdırmaları Mərkəzinin rəhbəri, MTN sabiq əməkdaşı, politoloq İlham İsmayıldır.

 - İlham müəllim, sizin bu günlərdə mediaforum saytında “Açıq separatizmin məxfi tərəfləri” adlı məqalənizdən sonra Azərbaycanda fəaliyyət göstərən İmam Xomeyni İmdad Komitəsi Beynəlxalq Humanitar Təşkilatı etiraz bəyanatı yaydı. Sizə elə gəlmir ki, İran Azərbaycanda humanitar iş adı altında öz siyasi maraqlarını realiziya etməklə məşğuldur?

   - Mən hələ Milli Təhlükəsizlik Nazirliyində işlədiyim vaxtlarda İran İslam Respublikasının islam bayrağı altında Azərbaycan Respublikası ərazisində ideoloji-təxribat xarakterli siyasət apardığı məlum idi. Ölkədə fəaliyyət göstərən mədrəsələrdə pulsuz dərs vermək, Azərbaycan vətəndaşlarının İranda pulsuz dini təhsil almasi kimi "humanist" addımların arxasında siyasi maraqların dayandığı dövlətə məlum idi və buna qarşı da lazımı tədbirlər görülürdü. İmdad imam Xomeyni komitəsinin də humanitar yardımları barədə informasiyalar zaman- zaman mətbuatdan bəlli olur və Azərbaycanın maraqlarına xidmət edən hər bir xeyirxah əməli alqışlayırıq. Təəssüf ki, bəzi dövlətlərin humanitar əməlləri arxasında vətənimizin maraqlarına əks olan təxribatlar da yer alır. Hansı ölkə tərəfindən olursa olsun, xeyirxahlıq nə qədər nəcib aksiya olsa belə, onun arxasında məkr varsa qarşısı alınmalıdır.

  Ümumiyyətlə, Azərbaycan Respublikasının müstəqilliyi İİR tərəfindən ilk gündən xoş qarşılanmayıb. Diqqətinizə bir məsələni catdırım. Azərbaycanın xüsusi xidmət orqanları tərəfindən bu günədək ifşa olunmuş casusların 90 faizinin İranla bağlılığı sübut olunmuşdur. Bu isə o deməkdir ki, xoş olmayan münasibət davam edir və ifşa olunmayan şəbəkələr də mövcuddur.

-Bu gün xaricdən Azərbaycana qarşı separtçılığı, bölücülüyü təbliğ edən və bunu dəstəkləyən qüvvələr nə vaxtsa ölkəmiz üçün ciddi təhlükə yarada bilərlərmi?

-Separatçılıq istənilən ölkənin, o cümlədən Azərbaycan Respublikasının təhlükəsizliyini təhdid edən amildir. Separatçı meyllər xaricdən dəstək qazananda, təşkilatlandırılanda və təzyiq vasitəsi kimi istifadə olunanda xüsusilə təhlükəli olur. Etnik mənsubiyyətinə görə bəzi Azərbaycan vətəndaşlarının ölkənin bütövlüyünə qarşı yönəlmiş fəaliyyəti xarici ölkədə dəstək tapmayanda xüsusi təhlükəli deyil, onu zərərsizləşdirmək, neytrallaşdırmaq, profilaktik tədbirlərlə qarşısını almaq problem olmur. Təəssüf ki, şimal və cənub qonşularımız Azərbaycana təzyiq vasitəsi kimi separatçıları hər zaman dəstəkləyir, öz ərazilərində onlar üçün uyğun şərait yaradırlar. Hesab edirəm ki, ölkənin müvafiq qurumları bu istiqamətdə baş verənləri nəzarətində saxlayır və gərəkən tədbirləri görürlər. Ancaq analiz göstərir ki, qarşı tərəfin aktivliyi fonunda, ona əks tədbirlər kompleks şəkildə deyil, sistemsiz bir formadadı, təkmilləşməsinə ehtiyac var.

-Son vaxtlar ölkənin gündəməni zəbt edən hicab məsələsinin həllini necə görürsünüz?

- Hicab məsələsi zaman-zaman gündəmə gətirilsə də son günlər mütəşəkkil formada meydana çıxıb və təcrübədən məlumdur ki, belə məsələlər bir mərkəzdən idarə olunur və xüsusi göstəriş olmasa hərəkət edilmir. Respublikada ictimai-siyasi durum, insanların əhval ruhiyyəsi, ölkədə və dünyada baş verən hadisələrlə əlaqədar heç də yaxşı deyil. Azərbaycan cəmiyyəti ədalətsizlik, haqsızlıq, maddi çətinlik kimi faktoların içində boğulur, ciddi problemlər yaşanır. Belə vəziyyətdən yararlanmaq istəyən xarici və daxili var. Din isə belə məqamlarda ən hassas nöqtədir. Baxın, hicab bu gün ədalətimi bərpa edəcək, maddi vəziyyətimi düzəldəcək, məmur özbaşınalığının, monopoliyanın, rüşvətinmi, qabağını alacaq?Yox. İnsanlar dediyim hallardan əzab çəkir, hicab qadağasından deyil. Amma, bu bir bəhanə ola bilər. Cəmiyyət digər problemləri həll etmək üçün dini əllərində bayraq edə bilər, başqa problemlərdən nə qədər danışsalar da kütləvi etiraza yalnız din amili ilə nail olmağın mümkünlüyünü təşkılatçılar da bilirlər. Problem isə, qanun necə tələb edirsə elə də həll olunmalıdı, yəni məktəbə məktəbli formasıyla gəlmək məcburidi. Bu hicab qadağası deyil, bəlli bir qaydadı. Məscidə ayaqqablı girmək olmaz. Bu ayaqqabını qadağa etmək deyil ki? Konkret məkanda o məkanın tələbinə uyğun davranılmalıdı. Bu işdə bir məsələ gün kimi aydındı: hicab bəhanədi, arxada siyasət dayanır, Azərbaycanın marağına əks olan siyasət.

-Vəziyyət belə davam edərsə, ölkəmizi istəməyən qüvvələr bu narazılıqdan istifadə edib və ölkədə vəziyyəti qarışdıra bilərlərmi?

- Bəli qarışdıra bilər. Ölkədə narazılıq yüksəkdi. Ciddi islahatlara ehtiyac var. Kataklizmlərin yaşanmayacağı islahatlar aparılmalıdı, bütün sferalarda. O zaman insanların dini hissləri, duyğuları ilə də oynanılmaz, bəhanələrin perspektivi olmaz. Söhbətləşdi: Elnur Eltürk