GünAzTv: “The Los Angeles Times” qəzeti Tehranın qatı mühafizəkar çevrələrinin orta məktəblərdə hicab qadağası ilə bağlı hakimiyyətə qəzəbli olduğunu yazır.

Azərbaycanda orta məktəblərdə hicaba qoyulan qadağa və bu məsələ ətrafında davam edən gərginlik Qərb mətbuatının da diqqətini çəkib. “The Los Angeles Times” qəzeti İranın bu qadağa ilə bağlı məsələyə müdaxilə etməsi barədə yazır və bildirir ki, İslam ölkəsindəki qatı mühafizəkar çevrələr Azərbaycan hakimiyyətinə qarşı çox qəzəblidir.

Qəzet İranla Azərbaycan arasında ideoloji müharibənin getdiyi haqda yazır: “Bakıda ötən ilin sonlarında orta məktəblərdə qızların dərsə hicabla gəlməsinə qoyulan qadağadan sonra Azərbaycanla İran arasında ideoloji müharibə başlayıb. Qafqazın bu dünyəvi ölkəsində ənənəvi İslam geyimini qadağan edən vahid məktəbli forması tətbiq olunur. İslam respublikasındakı mühafizəkar dini liderlər dəfələrlə açıq şəkildə bu qərarı pisləyiblər və Azərbaycan hakimiyyətini xəbərdar ediblər ki, məktəblilərə baş örtüsünü qadağan etməklə onlar əhalisinin əksəriyyəti şiə müsəlmanları olan ölkədə təhlükəli yola qədəm qoyurlar. Azərbaycan vətəndaşlarının əksəriyyəti İranla sıx bağlıdır, belə ki, İranda milyonlarla etnik azərbaycanlı yaşayır”. Qəzetin yazdığına görə, İran dövlət televiziyası xəbər verib ki, bu günlərdə azərbaycanlılar yaşayan Ərdəbil şəhərində cümə namazı zamanı Faruki adlı ayətullah Azərbaycanda “yaxınlaşmaqda olan ideoloji inqilab” barədə danışıb. “Azərbaycanda ideoloji inqilab başlayıb, gələcəkdə bu ölkə dini mərkəzlərdən biri olacaq” deyə, ayətullah bildirib. “The Los Angeles Times” qeyd edir ki, İran rəsmiləri dəfələrlə xarici ölkələrdən onun daxili işlərinə qarışmamağı tələb edib. “Lakin belə görünür ki, İranın dini liderlərinin qonşu Azərbaycanın daxili işlərinə qarışmamaq barədə heç bir məhdudiyyətləri yoxdur. Belə ki, nüfuzlu İran ayətullahlarından olan Nasir Makeram Şirazi Azərbaycan hakimiyyətini açıq şəkildə hicab qadağasını götürməyə çağırıb, ölkə əhalisini bu qadağaya qarşı çıxmağa çağıraraq vətəndaş itaətsizliyinə səsləyib. Ayətullah deyib ki, Azərbaycan əhalisi İslama qarşı olan bu qərara qarşı çıxmalıdır, hakimiyyət isə xarici təhriklərə boyun əyməməli və öz vətəndaşlarının səslərini eşitməlidir” deyə, məqalədə bildirilir. Qəzet yazır ki, hicab qadağası ilə bağlı Azərbaycanda bir neçə etiraz mitinqləri olub, təhsil naziri Misir Mərdanov isə bu aksiyaların arxasında xarici qüvvələrin dayandığını deyib. Mərdanov konkret hansı qüvvəni nəzərdə tutduğunu deməyib, lakin WikiLeaks saytı tərəfindən yayılan sənədlərdən məlum olur ki, əvvəllər Azərbaycan rəsmiləri dəfələrlə İranın ölkədə təxribatlar hazırladığı barədə amerikalı diplomatlara xəbərdarlıq ediblər. “The Los Angeles Times” qeyd edir ki, məktəblərdə baş örtüsünün qadağan edilməsi Bakı ilə Tehran arasında onsuz da gərgin olan münasibətlər fonunda baş verir. Bu gərginlik əsasən Azərbaycan hakimiyyətinin İranın İsrail və ABŞ kimi qatı düşmənləri ilə dost əlaqələrinə görə mövcuddur. Hicab qadağası isə prezident İlham Əliyevin dünyəvi hökumətinin ölkədə dindarların sayının getdikcə artması ilə üzləşdiyi bir vaxtda tətbiq edilir. Hansı ki, qatı dindarların artması tendensiyanın arxasında İranın dayandığı barədə şübhələr mövcuddur. Qəzet xatırladır ki, dekabrda Aşura mərasimi zamanı Nardaran kəndində yüzlərlə insan küçələrə çıxıb və “ölərik, ancaq hicabdan əl çəkmərik” şüarları səslənib. Yeni musavat