GünAzTv: 2010-cu ilin ən mühüm hadisələrindən biri də Türkiyənin Azərbaycan siyasətini dəqiqləşdirməsi idi. Rəsmi Ankara Azərbaycanla bağlı konkret mövqeyini ortaya qoydu. Son bir neçə ildə baş verən umu-küsülərin fonunda Ərdoğan hökuməti qətiyyətli addım ataraq Azərbaycanla bağlı mövqeyini ortaya qoydu.

İlin sonlarında Türkiyə xarici işlər naziri Əhməd Davudoğlu Türkiyə-Ermənistan münasibətlərinin normallaşmasının Qarabağ münaqişəsinin həllində irəliləyişin əldə olunmasından asılı olduğunu bir daha bəyan etdi. Azərbaycan-Türkiyə münasibətlərində daha bir ciddi addım 2010-cu il, avqustun 16-da iki ölkə arasında strateji tərəfdaşlıq və qarşılıqlı yardım haqqında müqavilənin imzalanması idi. Artıq müqavilənin reallaşması ilə bağlı ilk addımlar da atılıb. Azərbaycan və Türkiyə həbi sənayesi birgə silah-sursat istehsalı imkanlarını reallaşdırmaq haqda razılığa gəlib. Bu ilin birinci yarısında Türkiyə baş nazirinin Bakıya səfəri planlaşdırılır. Gözlənilir ki, səfər zamanı münasibətlərin inkişafı istiqamətində daha ciddi addımlar atılacaq. Bəs bu səfər münasibətlərdə yeni mərhələni başlayacaqmı? Sualı cavablandıran siyasi şərhçi Natiq Miri Türkiyə-Azərbaycan münasibətlərinin yüksələn xətt üzrə inkişafının davam edəcəyini düşünür. Ekspertin qənaətinə görə, yeni dünyanın şərtləri Türkiyə və Azərbaycan rəhbərliyinin münasibətlərinin dostluq-qardaşlıq çərçivəsindən strateji əməkdaşlıq səviyyəsinə yüksəltməyi tələb edir: “Yəni bu münasibətlər artıq strateji yöndə inkişaf etməkdədir. Bir qədər əvvəl iki ölkə arasında müqavilə imzalandı. Orada qarşılıqlı hərbi yardım haqqında müddəa var, sənəd artıq Azərbaycan parlamentində təsdiqlənib, 2011-ci ilin ilk ayında Türkiyə Böyük Millət Məclisində də ratifikasiya olunması gözlənilir. Bu, artıq prosesin geriyə dönməz hal alması deməkdir. Bu prosesin yüksələn xətt üzrə inkişaf edəcəyi şübhəsizdir. Baş verənlər göstərdi ki, iki ölkə arasında münasibətlər dövlət maraqlarına hesablanmayıb, əsl qardaşlıq əlaqələridir”. Ekspertin fikrincə, Türkiyənin Azərbaycanla, ümumən, bütöv region ölkələri ilə bağlı siyasətində yeni çalarlar üzə çıxıb və qardaş ölkə yeni oyun qaydaları üzərində xarici siyasətini aparır. N.Miri hesab edir ki, Türkiyənin bölgədə apardığı aktiv xarici siyasət Qarabağ münaqişəsinin həllini sürətləndirə bilər. O, bir qədər əvvəl İstanbulda Türkiyə, İran və Azərbaycan XİN rəhbərləri arasında bağlanmış sazişin bu istiqamətdə böyük əhəmiyyət daşıdığını düşünür: “Diqqət edirsinizsə, Türkiyə artıq Qarabağ münaqişəsinin həlli prosesində ciddi surətdə rol almaqdadır. ATƏT-in Minsk Qrupunun fəaliyyətsizliyi fonunda Türkiyə yeni formatda Qarabağ münaqişəsinin həlli istiqamətində fəal diplomatiya aparır. Bu, yeni formatdır, problemin region dövlətlərinin iştirakı ilə həll olunmasına üstünlük verilir. İqtisadi Əməkdaşlıq Təşkilatının İstanbul toplantısı zamanı yeni regional üçbucaq yaradılması istiqamətində addım atıldı. Türkiyə, İran və Azərbaycan problemlərin həlli yönündə birgə çalışmaq barədə razılıq əldə etdilər. Bu, ciddi bir saziş idi və haradasa Minsk Qrupuna bir alternativdir. Fikrimcə, bu sazişin inkişaf etdirilməsi istiqamətində işlər aparılarsa, gələcəkdə uğur əldə etmək mümkündür. Çünki İranın Ermənistana təzyiq rıçaqları böyükdür. Bu gün Ermənistanın İrandan başqa heç bir müttəfiq ölkə ilə quru sərhədləri yoxdur. Bu gün İran Ermənistan üçün əsas ”oksigen nəfəsliyi" rolunu oynayır. İran səmimi olsa, gələcəkdə bu “üçbucaq” vasitəsilə Ermənistanı yola gətirmək mümkün olacaq. Hətta bu olmasa da hərbi əməliyyatlar başlayacağı təqdirdə belə ən azından İran bir dövlət olaraq Ermənistana birmənalı kömək etməyəcək. Bu mənada inanıram ki, Azərbaycan-Türkiyə münasibətləri gələcəkdə də inkişaf edəcək və biz bunun bəhrəsini görəcəyik". Yeni musavat