GünAzTv: İraqda 9 ay çəkən qeyri-müəyyənlikdən sonra, nəhayət, yeni hökumət formalaşıb. Baş nazir Nuri əl-Maliki təyin olunmuş nazirlərin adlarını elan edib.

Millət vəkilləri baş nazir Nuri əl-Malikinin təqdim etdiyi nazirlərə bir-bir səs verərək vəzifələrinə təsdiqləyiblər. Yeni hökuməti Milli Birlik hökuməti kimi də təqdim edirlər. Lakin müxtəlif təriqət və etnik qruplardan olan nazirlərin birgə işləyə biləcəyinə dair şübhələr qalmaqdadır. Daxili işlər, Müdafiə və Milli Təhlükəsizlik nazirlikləri isə birləşdirilmiş şəkildə fəaliyyət göstərmələrinə davam edirlər. Belə ki, onların rəhbərlərinə dair razılıq əldə edilməyib. Özü şiə olan Maliki noyabr ayında ikinci müddətə baş nazir seçilmişdi. O, 42 nəfərdən ibarət kabinetini bazar ertəsi açıqlamalı idi. Lakin son dəqiqələrdə rəqib qruplaşmalar arasında mübahisələr buna imkan vermədi. Yeni hökumətdə antiamerika ruhlu şiə dini xadim Müqtəda əs-Sədrin xeyli sayda tərəfdarı var. Müqtəda əs-Sədrin baş nazir Nuri əl-Malikiyə dəstək verməsi sonuncu üçün hakimiyyətdə qalmağa xeyli kömək edib. Hər iki tərəf aralarında sövdələşmənin olduğunu inkar edir. Lakin son aylar ərzində Müqtəda əs-Sədrin xof yaradan Mehdi Ordusunun həbsdə saxlanılan üzvləri azadlığa buraxılmışdılar. Yayılan məlumata görə, Mehdi Ordusunun üzvləri yenidən Bağdad küçələrində görünməkdədirlər. «Bunu hamı deyir. Çoxları bunu radio üçün deməyə qorxur. Lakin Alaa Abbas qorxmur. O, Bağdadın mərkəzinə yaxın buraxılış-yoxlama məntəqəsinə başçılıq edir. Onun sözlərinə görə, o, Bağdad küçələrində vaxtilə həbs edilən Mehdi Ordusu üzvlərini öz gözləriylə görüb» - deyə Bağdadda olan Qərb jurnalistlərindən biri bildirib. Mehdi Ordusu 2005-2007-ci illərdə amerikalılara qarşı vuruşub. Eləcə də təriqət zəminində zorakılıq dövründə şiə silahlı qrupu kimi fəaliyyət göstərib. 2008-ci ildə İraq hökuməti Müqtədə əs-Sədrin ordusuna qarşı tədbirlər görməyə başlayıb. Bir neçə ay çəkən döyüşlərdən sonra Mehdi Ordusuna Müqtəda əs-Sədr tərəfindən silahı yerə qoymaq əmri verilib. Müqtədə əs-Sədrin istehkamı sayılan Sədr Sitidə din xadimlərin gücünün artdığını aydın görmək olur. Cümə namazı günü məscidləri Müqtədə əs-Sədrin şəkilləri bürüyür. Müqtəda əs-Sədr özü İrandadır, lakin imam öz tərəfdarlarına moizə oxuyaraq onları spirtli içkilər satan dükanları və gecə klublarını bağlamağa çağırır. Bu arada İraqda vəziyyət yenidən gərginləşə bilər. Buna səbəb 2006-cı ildə 14 yaşlı iraqlı qızı zorlayan, sonra onu və ailəsini öldürən amerikalı əsgərin özünü müdafiə etmək üçün söylədiyi fikirlər olub. «Bu insanlara nə qədər nifrət etdiyimi ifadə etməyə söz tapa bilmirəm. O vaxtlar iraqlıların insan olduğunu belə qəbul etmirdim” - deyə 2009-cu ildə mühakimə olunan və 5 dəfə ömürlük həbsə məhkum olunan, hal-hazırda Arizonadakı “Tukson” federal həbsxanasında olan Stiven Qrin bildirib. O, Şimali İraqdakı Mahmudiyyə qəsəbəsində hərbi əməliyyat vaxtı 14 yaşlı Abir Qasım əl-Cənabini zorlamış, daha sonra qızı, atasını, anasını və bacısını güllələyərək öldürmüşdü. ABŞ-ın 101-ci Havadan müdafiə diviziyasının desantı olan Stiven Qrin İngiltərənin “Daily Mail” qəzeti ilə telefonda danışaraq İraq müharibəsinin ən qəddar hadisəsi kimi qəbul olunan cinayətləri “müharibə şəraiti”ndə törətdiyini deyib: “Əgər əsgər olmasaydım və İraqa getməsəydim, belə insan olmazdım. Mənə 5 dəfə ömürlük həbs cəzası verərək həyatım boyu məni bayıra çıxarmaq fikirləri olmadıqlarını göstərdilər. Mən artıq sadəcə, Tanrının ədalətini gözləyirəm”.