GünAzTv: Türkiyədə hakim Ədalət və İnkişaf Partiyası (AKP) tərəfindən həyata keçirilən "kürd açılımı" siyasətindən doğan mənfi nəticələrin miqyası getdikcə genişlənir.

Söhbət kürdlərin Türkiyə hakimiyyəti qarşısında yeni tələblər qoymasından və bunların yerinə yetirilməsində israrlı olmalarından gedir. Düzdür, Türkiyədə kürdlər üçün demokratik muxtariyyat statusunun tələb edilməsi Ankarada böyük narazılıqla qarşılanıb.    Türkiyə parlamentinin sədri Məmməd Əli Şahinlə Kürd yönümlü Barış və Demokratiya Partiyasının sədri Səlahəddin Dəmirtaş qarşılıqlı olaraq sərt bəyanatlarla çıxış edib. Dekabrın 21-də isə onlar arasında 35 dəqiqə davam edən qapalı görüş keçirilib.    Görüşdən sonra mətbuat nümayəndələrinə açıqlama verən Səlahəddin Dəmirtaş mətbuat üzərindən edilən şərhlərin səhv başa düşülmələrə yol aça biləcəyi üçün belə bir görüş tələb etdiklərini ifadə edib: "Cənab spiker parlamentin başçısı və bütün iradəni təmsil edən bir şəxsiyyət olaraq həll yerinin parlament olduğunu təsdiq etdi. Müzakirələr şiddət, irqçilik kimi məsələləri özündə ehtiva etmədikcə azad buraxılmalıdır".    Xatırladaq ki, bu günlərdə kürd məsələsinin həlli üçün təkliflər hazırlamaq məqsədilə Diyarbəkirdə toplantı keçirilib. Lakin keçirilən toplantının nəticələri Türkiyədə bu problemlə bağlı gərginliyi yenidən artırıb. Belə ki, Demokratik Cəmiyyət Konqresi adlı qurumun təşkil etdiyi tədbirin yekun sənədində Kürdüstan demokratik muxtariyyətinin yaradılması, qurumun öz bayrağı və digər atributları, həmçinin müdafiə qüvvələri və müstəqil iqtisadiyyata malik olmasının zəruriliyi vurğulanıb. Cənub və şərq bölgələrində məktəb və ali təhsil müəssisələrində tədris prosesinin kürd dilində aparılması tələb edilib.    Bütün bunlar Ankaranın kəskin reaksiyasına səbəb olub. Türkiyə prezidenti Abdulla Gül, hökümət və silahlı qüvvələr komandanlığı tərəfindən yayılan bəyanatlarda, muxtariyyət və kürd dililə bağlı təkliflər pislənib. Parlament sədri Məmməd Əli Şahin bu cür mövqedən çıxış edən siyasi partiyalara bağlanma təhlükəsilə qarşı-qarşıya qala biləcəklərinə dair xəbərdarlıq edib.    Əsasən kürd mənşəli əhali tərəfindən dəstəklənən Barış və Demokratiya Partiyasının sədri Səlahəddin Dəmirtaş, öz növbəsində, irəli sürülən təkliflərin Türkiyənin bölünməsi mənasına gəlmədiyini bildirib. Məmməd Əli Şahinlə görüşdən sonra Səlahəddin Dəmirtaş kürdlərlə bağlı bir problem olduğunu və bunu dilə gətirmək istədiklərini söyləyib. O, Diyarbəkirdə hazırlanan mətnin hər yönü ilə müzakirə edilməli olduğunu bildirərək qeyd edib: "Mətnin düzəldilməsinə ehtiyac olan bəzi nöqtələri var. Yerində rəhbərlik, yəni muxtariyyət mövzusunda israrlıyıq. Bu bizim vədimizdir. Siyasi həll axtararkən bunu başqa yerlərə çəkmənin lüzumu yoxdur. Kürd xalqı var. Kürd dilinin işlənməsi bu xalqın ən təbii haqqıdır. Bütün yazılanları, deyilənləri diqqətlə izləyirik. Bu işin birbaşa həmsöhbətləri xalqdır".    Təkrar parlamentdə kürdcə danışmaq üçün müzakirələrdən bəhs edən Səlahəddin Dəmirtaş daha sonra qeyd edib: "Ana dilində bir neçə söz söyləməklə qiyamət qopmaz. Parlament tribunasından hansı küfrlər edildiyi hamıya məlumdur. Bəziləri sərxoş çıxışlar edir. Amma milyonlarla adamın danışdığı dildə bir millət vəkili dərdini demək istədikdə az qala ordu zərbə endirəcəkdi".    Yeri gəlmişkən qeyd edək ki, Türkiyə Silahlı Qüvvələri Baş Qərargahı kürd tərəfdarı siyasətçilərin ölkənin cənub-şərq diyarlarında iki dildə danışmaq istiqamətindəki təkliflərini "Respublikanın quruluş fəlsəfəsini kökdən dəyişdirəcək" bir nöqtə kimi dəyərləndirib.    Ordunun yaydığı bir məlumatda Türkiyə Silahlı Qüvvələri "xalq dövlət, unitar dövlət və dünyəvi dövləti hər zaman qorumuş və qorumağa davam edəcək" ifadəsini işlədib.    Kürdlərin mədəni hüquqlarının genişlənmə mövzusunda keçirilən islahatlara baxmayaraq, azlıq dillərinin istifadəsi Türkiyədə hələ həssas bir mövzudur. AKP-nin kürdlərlə bağlı siyasəti yeni bir vəziyyət yaradıb. Səlahəddin Dəmirtaş kürd dilinin Millət Məclisində deyil, ancaq təhsil, media və ticarət sahələrində sərbəst istifadəsini tələb etdiyini və separatizmi heç bir şəkildə dəstəkləmədiyini bəyan edib.    Onu da xatırladaq ki, bu il oktyabrın 18-də Türkiyənin Diyarbəkir əyalətində əslən kürd olan 150 nəfərlik siyasətçi, ictimai fəal üzərində məhkəmə başlayıb. Onlar arasında kürd yönümlü Barış və Demokratiya Partiyasından seçilmiş bələdiyyə sədrləri də var. Onlar terrorçu Kürdüstan Fəhlə Partiyası - PKK ilə əlaqələrdə ittiham edilir. Bu günlərdə isə Türkiyənin baş naziri Rəcəb Tayyib Ərdoğan ölkənin əsas kürdlər yaşayan Siirt bölgəsinə səfər edib.    Daha sonra kənd meydanına çıxan baş nazir sakinlərlə görüşüb. Türk dilində bilməyən bəzi vətəndaşlar ona kürdcə müraciət etmək istəyib. Baş nazir isə kənd təsərrüfatı naziri Mehdi Ekeri yanına çağıraraq, tərcümədə ondan kömək istəyib. Kəndlilər nazir vasitəsilə problemlərini Ərdoğana çatdırıb. O isə həmin problemlərin həllilə bağlı göstəriş verib. Bakı xəbər