GünAzTv: Qardaş ölkədə türkdilli media quruluşlarının birliyinin təməli atılır.

Bu gün Türkiyənin paytaxtı Ankarada Türkcə Danışan Ölkələrin Media Forumu öz işinə başlayıb. Bu barədə musavat.com-a forumun işində iştirak edən "Yeni Müsavat" qəzetinin baş redaktoru Rauf Arifoğlu məlumat verib.

R.Arifoğlunun sözlərinə görə, foruma, demək olar ki, bütün türk cümhuriyyətlərindən, o cümlədən Azərbaycandan, Qazaxıstandan, Özbəkistandan, Qırğızıstandan, Türkmənistandan, Şimali Kipr Türk Respublikasından qatılanlar var.

Forumun açılışı təntənəli olub.  Türkiyə Mətbuat, Yayım və İnformasiya Baş İdarəsinin baş direktoru Murad Karakaya, Xarici İşlər Nazirliyi Strateji Araşdırmalar Mərkəzinin sədri Bülənt Aras açılış mərasimində çıxış ediblər. Onlar türkcə danışan ölkələrin media quruluşlarının işbirliyinin vacib olmasından, türkdilli jurnalistlərin qarşılıqlı əlaqələrinin inkişaf etdirilməsinin vacibliyindən danışıblar.

Daha sonra xarici işlər naziri Əhməd Davudoğlu Türkcə Danışan Ölkələrin Media Forumun açılışında çıxış edib, foruma öz işində uğurlar arzuladığını bildirib.

Davudoğlu deyib ki, dünyanin 100 ən təsirli media quruluşları arasında türkcə danışan ölkələrdən olan media quruluşlarının da təmsil olunması gələcək hədəflərdən olmalıdır: "Təəssüf ki hələlik bu təmsiliyyət yetərincə deyil".

Tədbirin sonunda Bülənt Arrinç qazax xalatı, Əhməd Davudoğöluna isə türkmən geyimi geyindiriblər. Bunu onlara qazaxlar və türkmənlər hədiyyə edib. (Şəkildə papaqlı Əhməd Davudoğludur).

Tədbirdə iştirak edən Vüsalə Mahirqızının APA-ya verdiyi xəbərə görə, sonra Türkiyə baş nazirinin müavini Bülənt Arınc çıxış edib. B. Arınc tədbirə qatılanları salamlayıb və Türkiyədə medianın inkişafı istiqamətində görülən işlərdən, hazırkı Türkiyə mediasının vəziyyətindən danışıb. B. Arınc deyib ki, hazırda türk ölkələrinin rəsmi mediasının birlikləri var. O, TRT Türk və TRT-Avaz-ın bütün türk dünyasına yayımlandığını bildirib. Eyni zamanda türk dilində danışan ölkələrin xəbər agentlikləri qurumu olduğu, lakin bu qurumun rəsmi xəbər agentliklərini əhatə etdiyini bildirib. B. Arınc deyib ki, bu birliklərin özəl medianı da əhatə etməsinə ehtiyac var. Arınç 250 milyon insanın türk dilinin bu və digər qruplarında danışdığını qeyd edib və bildirib ki, bu da mediamızın gələcəyi ilə bağlı böyük ümidlər vəd edir: "Bu qədər insanın mediası güclü olmalıdır".

Sonra Türkiyə baş naziri Rəcəb Tayyip Ərdoğanın foruma təbrik məktubu oxunub.

Forumun proqramında türk respublikalarından, o cümlədən Azərbaycandan gedən media mənsublarının çıxışları da nəzərdə tutulub.

Qeyd edək ki, tədbirdə Azərbaycandan MTRŞ sədri Nuşirəvan Məhərrəmli, Mətbuat Şurası sədri Əflatun Amaşov, KİV DF-nin icraçı direktoru Vüqar Səfərli, APA-nın baş direktoru Vüsalə Mahirqızı, “Yeni Müsavat” qəzetinin baş redaktoru Rauf Arifoğlu, “525-ci qəzet”in baş redaktoru Rəşad Məcid, Xəzər TV-nin icraçı direktoru Hüseyn Dinləməz, redaktoru Qulu Məhərrəmli, Qafqaz Media Mərkəzinin rəhbəri, jurnalist Sevil Nuriyeva, “Yeni Azərbaycan” qəzetinin baş redaktoru Hikmət Babaoğlu, “Ayna Zerkalo” qəzetinin baş redaktoru Elçin Şıxlı, Dialoq Avrasiya Platformasının Azərbaycan nümayəndəliyinin rəhbəri Mustafa Saatçı, “Yeni Nəsil” JB-nin sədri Arif Əliyev, DJL-nin sədri Yadigar Məmmədli, Qadın Jurnalistlər Assosiasiyasının sədri Sevil Yusifova, “Zaman-Azərbaycan” qəzetinin baş redaktoru Süleyman Ünal, Parlament Jurnalistlər Birliyinin sədri Elşad Eyvazlı və “Türküstan” qəzetinin baş redaktoru Aqil Camal iştirak edirlər.