GünAzTv: Azərbaycan xarici işlər nazirinin müavini Araz Əzimov ixtisasca çilingər olan Ermənistan prezidentinə məsləhət görüb ki, beynəlxalq hüquq barədə oxusun.

Ermənistanda ötən şənbə hakim Respublika Partiyasının 20 illik yubileyi qeyd olunub. Ölkədə siyasi böhranın, hakim komanda daxilində çəkişmələrin, hətta əlbəyaxa davaların baş verdiyi bir vaxta təsadüf edən yubiley prezident Serj Sərkisyan üçün ictimai rəyə hələ də hakimiyyətə nəzarət etmək iqtidarında olduğu barədə mesajlar vermək üçün fürsət yaradıb.

Sərkisyan çıxışını əsasən Ermənistanın problemlərinə, o cümlədən korrupsiya və rüşvətxorluğun baş alıb getməsinə, hakimiyyətdə yer alan “vicdansız kadrlara” və digər məsələlərə həsr edib. Deyib ki, hakimiyyətin yuxarı eşelonunda aparılan son kadr dəyişiklikləri əslində islahatlardır və məqsəd yarıtmaz kadrları təmizləyib ölkənin inkişafına mane olan korrupsiyanı aradan qaldırmaqdır.Xatırladaq ki, Ermənistanda son günlər bir neçə nazir işdən azad edilib. Bu çaxnaşmalar Ermənistan hakimiyyətindəki güclü klanlardan birinə aid olan İrəvan meri Qaqik Bəyləryanın Sərkisyanın köməkçisini döyməsindən sonra başlayıb. Mövqeləri ciddi surətdə laxlayan Sərkisyan Qarabağdan daha bir neçə kadrı bir sıra aparıcı postlarda yerləşdirib.Sərkisyan hakim partiya üzvləri qarşısında Qarabağdan da danışıb və deyib ki, Ermənistanın vəzifəsi Dağlıq Qarabağ probleminin ədalətli həllinin axtarılmasıdır. “Bizim vəzifəmiz müharibədə qalib gəlmək deyil. Biz bunu artıq etmişik”, - deyən Serj Sərkisyanın sözlərinə görə, münaqişənin nizamlanması ilə bağlı bütün tərəflərə Ermənistan üçün vacib olan hədlər açıq şəkildə bildirilib. O bildirib ki, bu hədlərdən kənarda rəsmi İrəvana danışıqlar üçün yer yoxdur. Sərkisyan Dağlıq Qarabağ problemini erməni xalqı üçün “həyati və vacib məsələ” adlandırıb. Onun sözlərinə görə, Azərbaycanın güclü, Ermənistanın isə zəif olması ilə bağlı deyilənlər həqiqətə uyğun deyil: “Allah eləməmiş, müharibə başlasa, bu təbliğat köpüyü yox olacaq”. Azərbaycanla müharibədən qorxduğunu büruzə verən, eyni zamanda özünü qorxmamış kimi göstərməyə çalışan Ermənistan prezidentinə Bakıdan xarici işlər nazirinin müavini Araz Əzimov cavab verib. O, ixtisasca çilingər olan Sərkisyana məsləhət görüb ki, münaqişənin beynəlxalq hüquq prinsipləri əsasında həlli barədə danışmazdan əvvəl bu hüquq prinsiplərinin nədən ibarət olduğunu öyrənsin.“Mən cənab Sərkisyana ekspertlərindən beynəlxalq hüququn sənədələrini tələb etməsini və daha yaxşı öyrənməsini təklif edərdim. Danışıqlarda iştirak edən bir dövlət başçısının bu sənədlərdən xəbərsiz olması yaxşı hal deyil. Belə məsələlərdə heç bir spekulyasiyaya yol verilməməlidir” deyə Azərbaycan prezidentinin Dağlıq Qarabağ münaqişəsi üzrə xüsusi nümayəndəsi Araz Əzimov ANS-ə açıqlamasında bildirib. O, Ermənistan prezidentinə beynəlxalq hüququn norma və prinsiplərini öyrənməyi tövsiyə edir. A.Əzimovun sözlərinə görə, ATƏT-in Minsk qrupuna həmsədrlik edən ölkələrin mövqeləri beynəlxalq hüququn prinsiplərinə əsaslanmalıdır ki, bu dövlətlər indiyə qədər bu prinsiplərdən kənara çıxmayıblar. “Bizə təklif olunan layihələrdə də bu prinsiplərə istinad olunur. Danışıqlarda Helsinki prinsiplərinin əsas götürülməsi heç kəsdə şübhə yaratmır. Nə qədər ki, beynəlxalq hüquq mövcuddur, ərazi bütövlüyünün dövlətlərarası problemlərin həllində bir prinsip olaraq əsas götürülməsi dəyişilməyəcək”. Azərbaycanın əvvəlcədən münaqişənin sülh yolu ilə həllinə tərəfdar olduğunu qeyd edən nazir müavini bununla belə rəsmi Bakının vaxtı öldürməyə qarşı olduğunu bildirib. Onun sözlərinə görə, beynəlxalq vasitəçilər də eyni mövqedən çıxış edir. Yeni musavat