GünAzTv: 1915-ci il hadisələrinin soyqırım kimi tanınmasını nəzərdə tutan qətnamə layihəsi bu gün ABŞ  (Amerika Birləşmiş Ştatları) Konqresinin Nümayəndələr Palatasına göndərilməyib.

Bu barədə Türkiyə KİV-ləri məlumat yayıb. Lakin konqresdə iş günlərinin uzadılması səbəbindən qanun layihəsinin palataya göndərilməsi ehtimalı hələ tam aradan qalxmayıb. Belə ki konqresin 2010-cu il üçün nəzərdə tutulan fəaliyyətinin bu gün başa çatacağı gözlənilsə də, Senat və Nümayəndələr Palatasında bəzi qanun layihələrinin hələ səsverməyə çıxarılmaması səbəbindən bu müddət dekabrın 21-dək uzadılıb. Buna görə də palatanın işini davam etdirəcəyi günlərdə qondarma soyqırım qətnaməsinin müzakirəyə çıxarılacağı ehtimalı qalır. Qeyd edək ki, qondarma erməni soyqırımı ilə bağlı qətnamə layihəsinin Nümayəndələr Palatasında səsverməyə çıxarılması təşəbbüsü ilə palatanın Demokrat partiyalı sədri, ermənipərəst Nensi Pelosi çıxş edib. O, ötən gün qətnamənin yaxın 48 saat ərzində müzakirəyə çıxarılacağına çalışacağını deyib. Bundan sonra Türkiyənin Xarici İşlər naziri Əhməd Davudoğlu məsələ ilə ələqadar Birləşmiş Ştatların dövlət katibi Hillari Klintona zəng edib. O, Hillari Klintondan qondarma soyqırıma dair layihənin Nümayəndələr Palatasında müzakirəsinə mane olmasını istəyib. Dövlət katibi isə Birləşmiş Ştatlar administarsiyasının bu məsələdə mövqeyinin dəyişməz olduğunu və sənədin Nümayəndələr Palatasının gündəliyinə salınmaması üçün bütün səylərini səfərbər edəcəklərini bildirib. Dövlət Departamentinin rəsmi nümayəndəsi Filip Krouli isə keçirdiyi brifinqdə təmsil etdiyi qurumun sənədin Nümayəndələr Palatasında müzakirəsinə qəti şəkildə qarşı çıxdığını deyib. Sənədin səsverməyə  çıxarılmasına  mane olmaq üçün Türkiyənin ABŞ-dakı səfirliyi, eləcə də, bu ölkədə fəaliyyət göstərən türk və Azərbaycan diasporası hərəkətə keçib. Hazırda həm səfirlik, həm də diaspora təşkilatları ABŞ rəhbərliyi və Konqreslə bu qətnamənin qəbulunun əngəllənməsi istiqamətində danışıqlar aparır. Xatırladaq ki, qətnamə layihəsi bu ilin martında Nümayəndələr Palatasının Xarici Əlaqələr Komitəsində səsverməyə çıxarılıb və  22-si əleyhinə, 23-ü lehinə olmaqla qəbul edilib.

**

Qondarma erməni soyqırımı qətnamə layihəsinin Amerika Birləşmiş Ştatları Konqresi Nümayəndələr Palatasının Rəyasət Heyətində müzakirəsi  baş tutmayıb. Buna səbəb  48 saat ərzində  Parlamentdə müzakirəyə çıxarılması planlaşdırılan  qondarma erməni soyqırımı qətnamə layihəsinin  hələ də Palataya göndərilməməsidir. «AZƏRTAC»ın yaydığı məlumata görə, Konqresin  2010-cu il üçün nəzərdə tutulan fəaliyyətinin  dekabrın 20-də  başa çatacağı gözlənilsə də, Senat və Nümayəndələr Palatasında  bəzi qanun layihələrinin səsverməyə çıxarılmaması ilə əlaqədar  bu müddət  21 dekabradək uzadılıb. Xatırladaq ki, BŞ Dövlət Departamenti  uydurma erməni soyqırımı layihəsinin Konqresin Nümayəndələr Palatasında müzakirəyə çıxarılmasına  qarşı çıxır. İTV