GünAzTv: Azərbaycan Silahlı Qüvvələrinin Naxçıvan Muxtar Respublikası ərazisində yerləşən birləşmə və hissələrinin birgə taktiki təlimi keçirilib."AzərTAc" dövlət agentliyinin verdiyi xəbərə görə, Sərhəd Qoşunlarının bölmələrində istifadə edilən atıcı silahlar, optik və gecəgörmə cihazları, Azərbaycanın hərbi sənaye müəssisələrində modernləşdirilmiş silahlar və beş min metrədək gecə və gündüz düşmənin zirehli texnikasını məhv etmək qabiliyyətinə malik olan "Kornet" tipli idarə olunan raket kompleksi nümayiş etdirilib. Naxçıvan Ali Məclisin sədri Vasif Talıbov xüsusi təyinatlı bölmələrin şəxsi heyətinin döyüş hazırlığı ilə maraqlanıb, səfərbərlik dövrü üçün nəzərdə tutulan şəxsi heyətin qəbul məntəqəsinə baxıb.Təlimdə Naxçıvan Muxtar Respublikası Fövqəladə Hallar Nazirliyinin texnikası və xüsusi vasitələri də nümayiş etdirilib.Ali Məclisin sədri qərargah çadırında Fövqəladə Hallar Nazirliyi ilə Naxçıvan Qarnizonunun hərbi hissələri arasındakı qarşılıqlı əlaqə planı ilə tanış olub, müxtəlif təyinatlı xüsusi texnika və qurğulara baxıb.Təlimdə ordu korpusunun artilleriya qrupunun döyüş imkanları nümayiş etdirilib. Daxili Qoşunların tabeliyində olan müasir texnikanın döyüş imkanları nümayiş olunub, müxtəlif çaplı silahlardan atəş açılıb, təyin olunmuş şərti hədəflər məhv edilib.Azərbaycan Silahlı Qüvvələrinin Muxtar Respublikanın ərazisində yerləşən birləşmə və hərbi hissələrinin silahlanmasında mövcud olan döyüş və xüsusi texnikanın taktiki-texniki xüsusiyyətləri barədə məlumat verilib.Xüsusi təyinatlı və kəşfiyyat bölmələri ən müasir lazer, optik gündüz və gecəgörmə cihazları, uzaq və yaxın məsafələrə yüksək dəqiqliklə atəş açmağa imkan verən səssiz silahlarla, dağ şəraitində etibarlı rabitə əlaqəsi yaradan fərdi rabitə vasitələri, müxtəlif iqlim şəraitində istifadə olunan geyim formaları ilə təchiz edilib. Sonra motoatıcı briqada ilə keçirilən döyüş atışlı taktiki təlimin əsas mərhələsinə başlanıb.Xüsusi təyinatlı bölmələrin taktiki hava desantının paraşütlə atılması və qarşıya qoyulan tapşırığın dəqiq yerinə yetirilməsi onların əsl peşəkarlığını göstərmişdir. Artilleriya bölmələrinin şəxsi heyəti təlim sahəsindəki hədəflərə sərrast atəş açmaqla peşəkarlıq nümayiş etdirib. Tank və piyadanın döyüş maşını heyətləri idarə etdikləri texnikanın manevr və atəş gücündən tam istifadə edərək qarşıya qoyulan tapşırıqları müvəffəqiyyətlə yerinə yetirib. Ümumiyyətlə, təlimdə qarşıya qoyulan bütün məqsədlərə nail olunub. Təlim desantın Azərbaycanın dövlət bayrağının rənglərinin əks olunduğu paraşütlə vertolyotdan tullanması ilə başa çatıb.