GünAzTv: Son günlər cəmiyyətdə getdikcə daha çox diqqət cəlb etməyə başlayan mövzulardan biri də şagirdlərin orta məktəblərə hicabla gələ bilməməsi ətrafındadır.

Məsələyə mövcud diqqət, səslənən fikirlər bu mövzunun kifayət qədər həssas olduğunu qabarıq büruzə verir. Proseslərin gedişinin təhlili isə hicab məsələsinin mahiyyətinin bir o qədər də sadə olmadığını, hətta müəyyən qüvvələrin burada təsirlərini açıq büruzə verir.    İlk öncə qeyd edək ki, məsələ ilə bağlı Təhsil Nazirliyinin nümayiş etdirdiyi mövqe kifayət qədər aydın, qanuna əsaslanmış bir formada olub, reallığı özündə əks etdirir. Xatırladaq ki, Təhsil Nazirliyi orta məktəblərə hicabla gələn şagirdlərin dərsə buraxılmamasının tərəfdarı kimi çıxış edir. Mövcud qanunvericilik də əslində məhz bu mövqeyin tamamilə düzgün olduğunu təsdiqləyir.    Təhsil Nazirliyi tərəfindən hələ 2007-ci ilin avqust ayında bütün məktəblərdə məktəbli formasına keçilməsilə əlaqədar əmr verilib. Bu əmrə əsasən hər bir məktəbin öz geyimi olur. Bu ildən etibarən ibtidai sinif şagirdləri üçün vahid məktəbli forması tətbiq edilib. Lakin hazırda V-XI sinif şagirdlərinin geyimləri məktəbin özünün qəbul etdiyi formaya uyğundur. Formanı məktəb müəyyənləşdirir və dərs ilinin əvvəlində elan edir. Bu məktəbli formasına kənar element, o cümlədən də hicab daxil edilə bilməz. Bütün bunlardan çıxış edən təhsil naziri Misir Mərdanov da açıq şəkildə bildirir ki, hər şey qanunda göstərildiyi kimidir və uşaqların hicabla dərsə gəlməsi qadağandır. Deməli, nazirin mövqeyinə qanuni baxımdan hər hansı iradın tutulması mümkünsüzdür.    Digər tərəfdən, nəzərə almaq lazımdır ki, Azərbaycan demokratik, dünyəvi və hüquqi dövlətdir. Bu mənada Azərbaycanda dövlət-vətəndaş münasibətləri, xüsusilə dövlətin dinə və təhsilə münasibəti məhz bu prinsiplər əsasında tənzimlənir. Deməli, orta məktəbdə təhsil alan şagirdlərin gələcəyi üçün həm də dövlət məsuliyyət daşıyır. Bu isə o deməkdir ki, dünyəvi dövlətin prinsiplərinin qorunmasına dövlətin nəzarəti vacibdir.    O da nəzərə alınmalıdır ki, Azərbaycan sivil ölkədir və hər bir insanın dini azadlığı təmin olunub. Lakin bu o demək deyil ki, dini azadlıqdan istifadə edərək orta məktəblərə gələn şagirdlər istədiyi dini geyimlərdən, o cümlədən hicabdan istifadə edə bilər. Dərsdən kənarda hər hansı şagirdin hicab geyinməsinə heç bir irad tutulmur və tutula da bilməz. Lakin orta məktəbə gələn şagird üçün qanunla konkret geyim forması müəyyən olunub və hər kəsin bu qanuna riayət etməsi vacibdir.    Qanunun pozulmasının və ya hicab məsələsindən sui-istifadənin hansı fəsadlara gətirib çıxardığını görmək üçün isə Türkiyəyə nəzər salmaq kifayətdir.    Artıq illərdir ki, hicab məsələsi Türkiyəni, belə demək mümkünsə, mənasız mübahisələr meydanına çevirib. Regionda əsas söz sahibi olmaq istəyən bu dövlət terrorizmlə mübarizə, ölkədə savadsızlığın azaldılması, yoxsulluğa qarşı proqramların reallaşdırılması, Avropa Birliyinə üzvlük kimi tale yüklü məsələləri bir kənara buraxıb, türban məsələsinin əlində əsir-yesir olub. İndi qardaş ölkə Atatürkün qoyduğu dövlətçiliyin dayaqlarını itirərək daha çox İrana bənzəməyə başlayır. Belə vəziyyət Türkiyənin Qərblə münasibətlərinin də sərinləşməsinə yol açan amillərdən biridir.    İndi də bəzi qüvvələr Azərbaycanda hicab problemini gündəmə gətirirək, ölkədə həm bir daxili gərginlik, həm də onun modern inkişaf yolunda problem yaratmağa cəhd göstərir. Bu mənada, təhsil naziri Misir Mərdanovun jurnalistlərə açıqlamasında xarici və daxili qüvvələri Azərbaycandakı təhsil müəssisələrində hicabla bağlı vəziyyəti gərginləşdirməkdə günahlandırması təsadüfi sayıla bilməz. Təhsil Nazirliyi qarşısında hicabla bağlı keçirilən aksiyaya münasibət bildirən nazir qeyd edib: "Mənə elə gəlir ki, Təhsil Nazirliyi qarşısında hicabla bağlı keçirilən aksiya müəyyən qüvvələrin, xaricdə və daxildə olan müəyyən fikirli qurumların təşkil etdiyi hadisədir. Başqa cür ola bilməz. Mən o adamlara müraciət edərək deyirəm ki, səhv yoldan çəkinmək, səhv yolun yarısından qayıtmaq yaxşıdır. Elə dinimiz də bunu tələb edir. Biz qaranlıq tərəfə deyil, işıq gələn tərəfə getməliyik".    Həqiqətən də, sözügedən problemin indiyə qədər gündəmdə olmaması, lakin birdən-birə qabarmağa başlaması bu məsələnin kənar qüvvələrin əli ilə idarə olunduğunu göstərir. Problemin "Wikileaks" şokundan sonra meydana çıxması da ayrıca diqqət cəlb edir. Faktdır ki, "Wikileaks" saytının yaydığı materiallar Qərblə münasibətləri yaxşı olan bir çox islam ölkələrinin ABŞ və Avropa ilə əlaqələrini müəyyən dərəcədə pisləşdirib. İndi Qərblə əvvəlki kimi yaxşı əlaqələrə malik çox az sayda İslam dinli ölkə qalıb ki, onlardan biri də Azərbaycandır. Azərbaycanda isə daxili gərginlik yaratmaq, onun Qərblə münasibətlərini pisləşdirmək üçün atıla biləcək addımlardan biri ölkədə dini zəmində qarşıdurmaya yol açacaq hadisələrə rəvac verməkdir. Real şəraitdə bu gərginliyi istəyən qüvvələrin hicab məsələsini qabartdığı aydın görünür. Bəzi daxili qüvvələr isə bu məsələdə kənar qüvvələrin əlində bir vasitəyə çevrilib.    Ekspertlər qeyd edir ki, ölkəmizə qarşı qərəzli mövqe tutanların öz niyyətlərinə çatmasının qarşısını almaq üçün görülən tədbirlər daha da gücləndirilməlidir.    Ən azı ona görə ki, dini sektordakı radikal qüvvələr yaranmış vəziyyətdən sui-istifadə edə bilər. Belə ki, bu gün dini sektorda özünün radikallığı ilə seçilən qüvvələrin illərdən bəri hakimiyyətdən qisas almaq hikkəsi alovlana bilər. Məhz buna görə bir çox analitiklər hesab edir ki, yaşanan gərginlik məhz həmin narazı qüvvənin işinə yaraya bilər. Onlar bundan istifadə edərək, aksiyaların davamlılığını və kütləviliyini təmin etməklə hökumətə əsl qüvvə olduqlarını nümayiş etdirməyə cəhd edə bilərlər. Digər tərəfdən, onların bu mövqeyinin arxasında duran əsas məqsədlərdən birinin Azərbaycanın Qərblə münasibətlərinin soyumasına xidmət etməkdən ibarət olduğu da sirr deyil. Lakin indiyi kimi belə cəhdlərin qarşısı müvafiq dövlət strukturları tərəfindən uğurla alınıb. Bakı xəbər - Tahir TAĞIYEV