GünAzTv: Gücləndirilmiş iş rejiminə keçən milis (Polis) 150-dən çox adamı saxlayıb; OMON Qırmızı meydanı mühasirəyə alıb.

Dünən Moskvanın Kiyev vağzalı və “Yevropeysk” ticarət mərkəzi arasındakı meydanda slavyan mənşəli bir neçə nəfər və iki Şimali Qafqaz əsilli şəxs arasında dava-dalaş baş verib  vv . Lent.az-ın “RİA Novosti” agentliyinə istinadən verdiyi məlumata görə, davanın bütün iştirakçıları saxlanılıb. 

Moskva Daxili İşlər İdarəsi mətbuat xidmətinin rəhbəri Viktor Biryukov deyib ki, milis dünən Kiyev vağzalında 150 nəfərdən çox adamı saxlayıb. Onların çoxunun üzərindən travmatik tapança, soyuq silah, qaz balonları, elektroşok çubuğu çıxıb. Milis “Yevroreysk” ticarət mərkəzində 15 gənci saxlayıb. İlkin hesablamalara görə, meydanın ətrafına 300-dək şəxs toplaşıb. Onlar futbol azarkeşlərinə və Qafqaz əsillilərə bənzəyib. Meydanı mühafizə etmək üçün 3000 milis göndərilib. “Kommersant FM” dünən ərazidə vaxtaşırı toqquşmaların qeydə alındığını, vəziyyətin getdikcə gərginləşdiyini xəbər verib. Milis daha aqressiv gəncləri saxlayıb. Tutulanların çoxu slavyanlardır. Ərazidə üzlərini maska ilə gizlədən gənclər peyda olub. Qeyd edək ki, Rusiya mətbuatı dekabrın 11-də Manej meydanında rus futbol azarkeşlərinin qanunsuz keçirdiyi aksiya və Qafqaz və Orta Asiya əsilli insanlara hücumlara cavab olaraq Şimali Qafqaz əsilli şəxslərin dünən Kiyev vağzalı qarşısındakı meydana toplaşacağı barədə məlumat yayıb. Dünən Kiyev vağzalı və “Yevropeysk” ticarət kompleksi arasındakı meydana xüsusi təyinatlı milis bölmələri (OMON) aparılıb. Buna baxmayaraq, Moskvada bir necə gündür qafqazlılarla millətçi ruslar arasında gözlənilən kütləvi dava təhlükəsi hələ də sovuşmayıb. Moskva milisi dünən səhər saatlarından paytaxtın mərkəzinə nəzarəti gücləndirsə də yeni iğtişaşların qarşısını almaq mümkün olmayıb. Axşam saatlarından Kiyev vağzalı ətrafına toplaşan və armaturlarla silahlanan gənclər milisin və Daxili Qoşun hissələrinin yaratdığı mühafizə zəncirini qismən yara bilib. Millətçilərlə bu ərazidə toplaşan qafqazlılar arasında toqquşma baş verib. Nəticədə 5 nəfər xəsarət alıb, milis xeyli adamı saxlayıb. V.Biryukovun sözlərinə görə, saxlanılanların hamısı ayrı-ayrı diasporların və radikal rus millətçi qruplarının üzvləridir. O, kiçik toqquşmaların baş verdiyini desə də genişmiqyaslı qarşıdurmanın olmadığını və milisin vəziyyəti nəzarətdə saxladığını bildirib. Kiyev vağzalı ətrafına Daxili Qoşunların, çevik alayın əlavə qüvvələri yerləşdirilib. Rusiya OMON-u “Kiyev” metrosuna girişini və Qırmızı meydana gedən yolları bağlayıb. 600-ə yaxın aksiya iştirakçısı Kiyev vağzalı ətrafından müxtəlif küçələrlə hərəkət edərək yolu bağlamağa çalışıb. Qafqaz Hüquq Mərkəzinin rəhbəri Şamil Osmanov da dünən Kiyev vağzalına gedib. O, aksiyaçıları sakitləşdirməyə çalışıb, qafqazlıları təxribata uymamağa çağırıb. Bu çağırışla ötən gün Moskva və bütün Rusiyanın patriarxı Kiril, Dağıstanın dini liderləri də çıxış ediblər. Moskvadakı Azərbaycan diasporunun rəhbərlərindən olan Söyün Sadıxov deyib ki, belə aksiyalar yalnız xalqlar arasında nifrəti artıra bilər və bu səbəbdən onlar paytaxtdakı azərbaycanlı diasporu arasında iş apararaq bu cür aksiyalardan uzaq durmağa çağırır. Amma Rusiya paytaxtında vəziyyət gərgin olaraq qalır, dünən gecə saatlarında yeni qarşıdurmaların baş verəcəyi gözlənilirdi. BBC-nin yaydığı son məlumatda isə aksiya iştirakçılarının Bolşaya Doroqomilovskaya küçəsinə daxil olaraq yolları bağladığı bildirilir. Milis küçəni boşaltmağa çalışıb. Dünən Sankt-Peterburqda da milli zəmində gərginlik olub. Milis şəhərin Sennaya meydanında keçirilməsi planlaşdırılan aksiyanın qarşısını alıb, 60 nəfər tutulub. Onların üzərindən küt alətlər və soyuq silah tapılıb. Qeyd edək ki, Sennaya meydanında keçiriləcək aksiyada millətçi ruslarla qafqazlılar arasında toqquşma olacağı barədə məlumatlar yayılmışdı. Xatırladaq ki, dekabrın 11-də Moskvanın Manej meydanında kütləvi qarşıdurma olub. Bir müddət əvvəl Kabardin-Balkar əsilli şəxs tərəfindən öldürüldüyü deyilən “Spartak” futbol klubunun azarkeşi Yeqor Sviridovun xatirəsinə həsr olunmuş aksiya etnik konflikt xarakteri alıb. Aksiya iştirakçıları millətçi şüarlar səsləndirib, hüquq-mühafizə orqanları ilə qarşıdurmaya gedib. 40 nəfər, o cümlədən milis əməkdaşları yaralanıb. 7 nəfər xəstəxanaya yerləşdirilib. 80 nəfər saxlanılıb, 10-dan çox cinayət işi açılıb. Yeni musavat