GünAzTv: Rəsmi məlumata görə Azərbaycanda internet istifadəçilərinin sayı gündən-günə artır. Hazırda əhalinin 10 nəfərindən 5-i internet istifadəçisidir.

İndi internet dünya əhalisinin əksəriyyətinin həyatında böyük önəm daşıyır. Onun  vasitəsilə informasiya alırıq, alış-veriş edirik, dünyanın dörd bir tərəfi ilə problemsiz rabitə yaradırıq, öyrənirik və sairə. Rəsmi məlumata görə Azərbaycanda da internet istifadəçilərinin sayı gündən-günə artır. Əgər 3 il öncə ölkəmizdə barmaqla sayıla biləcək internet istifadəçisi var idisə, hazırda 10 nəfərdən 5-i bu texnologiyanın imkanlarından istifadə edir. Mütəxəssislər bildirir ki, bu artıma əsas səbəb son 2 ildə internetin qiymətinin təxminən 10 dəfə ucuzlaşmasıdır. Bəs qiymətlərin necə, yenədəmi ucuzlaşma ehtimalı var? Və ya tariflərə uyğun olaraq internetin keyfiyyətindən bu gün istifadəçilər razıdırmı? 3 il əvvəl əgər ölkədə bir meqabit sürət internetin qiyməti 200-250 manat arasında dəyişirdisə, indi bu qiymət 20-25 manat arasında dəyişir. Və buna uyğun olaraq internetdən istifadə edənlərin sayı da son 2 ildə sürətlə artıb. Qiymətlərin yenə də endiriləcəyi gözlənilir.  Rabitə və informasiya texnologiyalari nazirliynin İnformasiya Cəmiyyətinin İnkişafı şöbəsinin müdiri İsfəndiyar Əliyev:“Sentyabr ayında 1-ci səviyyəli provayder Deltatelekom böyük həcmli internet tutumu götürən provayderlər üçün qiyməti 50 manata endirib. Bu davam etməlidir. Təbii ki, qiymətləri aşağı salan zaman qiymət siyasətinin düzgün aparılması vacibdir. 1-ci səviyyəli provayderlərlə vətəndaşlara internet çatdıran 2-ci səviyyəli provayderlərin qiymət balansı siyasəti gözlənilməlidir”. Ekspertlər də internetin qiymətini münasib hesab edir. «Multimedia» Mərkəzinin Rəhbəri Osman Gündüzov: “Azərbaycan internet ictimaiyyətinin qiymətlə bağlı elə bir problemi yoxdur. internetin ciddi problemi keyfiyyət problemidir. Qiymətlə keyfiyyəti müqayisə etsək bu qiymətə uyğun deyil.” Rabitə və informasiya texnologiyları nazirliyindən də təsdiqləyirlər ki, internetin sürəti ilə bağlı bir çox problemlər mövcuddur. Bunlardan birincisi əhalinin genişzolaqlı internetdən yox, daha çox kiçik sürətli internetidən istifadə etməsidir. Rabitə və informasiya texnologiyalari nazirliynin İnformasiya Cəmiyyətinin İnkişafı şöbəsinin müdiri İsfəndiyar Əliyev:“İstifadəçilər arasında daylapdan istifadə edənlər çoxdur. Bunlar kiçik sürətli internetdən istifadə edirlər. Təbii ki, yüksək sürət tələb edən xidməti ala bilmirlər. Çoxları gileylənir ki, internetin sürəti çox aşağıdır. Əslində bu internetin bağlanma sürəti ilə bağlıdır. Vətəndaşlar daylapdan yüksək sürətli internetə keçsinlər“. Bir çox hallarda isə istifadəçi ilə provayder arasında bağlanan müqavilədə nəzərdə tutulan sürəti əldə etmək mümkün olmur. Belə halda internet nisbətən baha başa gəlir. Burda sürətə təsir edən səbəblər arasında əhalinin interneti əsasən telefon xəttinin üzərindən almasıdır. Belə ki, evdə və ya ofisdə telefon xəttində calaqlar, kəsintilər varsa, o zaman bir meqabit sürət ən azı 30-40 faiz azalır.  Ona görə də inkişaf etmiş ölkələrdə əhali interneti əsasən başqa texnologiyların üzərindən alır. Nazirlikdən deyirlər ki,  internetlə bağlı mövcud problemlərin həlli məqsədilə hazırda strategiya hazırlayırlar. Rəsmi məlumata görə ölkədə əhalinin təxminən 10 faizi genişzolaqlı, yəni sürətli internet istifadəçisidir. Burda  əsas problem texnoloji məsələlərlə bağlıdır. Məhz hazırlanan strategiya həyata keçiriləndən sonra bu və digər məsələlər öz həllini tapa biləcək. itv