Britaniyanın İrandakı səfiri səfirliyin internet səhifəsində İranda insan haqlarının vəziyyətini tənqid etdiyinə görə Tehranın sərt tənqidi ilə üzləşib.

İran Milli Məclisinin üzvləri səfiri diplomatik protokolu pozmaqda ittiham ediblər. Millət vəkilləri, həmçinin Britaniyada tələbə etirazçıların hüquqlarının pozulduğunu dilə gətiriblər. Britaniyanın Tehrandakı səfiri Saymon Qas İrandakı bir sıra insan haqları pozuntularını qeyd edib. O deyib ki, insan haqları İranda olduğu qədər heç bir yerdə pozulmur. Səfir bu məqamda İranın təhlükəsizliyinə hədə olmaqda ittiham edilən Nəsrin Sutudenin adını çəkib. Bunun cavabında İran millət vəkillərindən biri deyib ki, səfir diplomatik davranış qaydalarını öyrənməlidir. Başqa bir millət vəkili isə onun sözləri ilə desək Britaniyada universitet tələbələrinin etiraz aksiyalarına təzyiqlərdən söz açıb. Bu millət vəkili deyib ki, "görünür, səfir başqa ölkələrin işlərinə qarışmaqla o qədər məşğuldur ki, öz ölkəsində baş verənlərdən xəbər tuta bilməyib”. Xəbər verildiyinə görə Britaniyanın Tehrandakı səfirliyi qarşısında kiçik bir piket keçirilib. Səfirlik işçiləri isə belə xırda etirazlara öyrəncəlidirlər. Bu arada isə Qərb ölkələrindən olan 80 nəfərdən artıq rəssam, alim və siyasətçi İran hökumətinə açıq məktubla müraciət edərək ərinə xəyanətə görə daşqalaq edilməklə ölümə məhkum olunan qadının azadlığa buraxılmasına çağırıblar. Səkinə Məhəmmədi Aştianiyə kəsilmiş daşqalaq hökmü son altı ay ərzində Qərbdə kəskin etirazlara və İranda insan hüquqlarının vəziyyəti ilə bağlı qızğın müzakirələrə səbəb olub. Qərb mədəniyyət xadimlərinin və siyasətçilərin imzaladıqları məktub yığcam və məzmunludur. Müəlliflər qeyd edirlər ki, Səkinə Aştianı həbsxanada olduğu beş il ərzində kifayət qədər əzab-əziyyət çəkib. Məktuba imza atanlar arasında Fransanın xarici işlər naziri Bernar Kuşner, aktyorlar Robert De Niro və Robert Redford, habelə Nobel mükafatı laureatı VS Naypol var. Onlar İran hökumətini Səkinə Aştianini, onun oğlunu və vəkilini dərhal azad etməyə çağırıblar. 2006-cı ildə Səkinə Aştiani ərinə xəyanətdə günahlandırılmış və 99 şallağa məhkum edilmişdi. Lakin o, həmin il bir qədər sonra ərinin ölümü ilə bağlı istintaqa cəlb edilmiş, artıq xəyanət və qətl ittihamları ilə məhkəməyə çıxarılmışdı. Məhkəmə ona ölüm hökmü kəsmişdi. 2007-ci ildə İran Ali Məhkəməsi bu hökmü qüvvədə saxladı. Bu ilin əvvəllərində bu məsələ beynəlxalq birliyin diqqətinə səbəb oldu. Bir çox ölkə və təşkilat, ona sığınacaq təklifi ilə çıxış edən Vatikan və Braziliya hökuməti daxil, İran hökumətini onu əfv etməyə çağırmışlar. Nəticə etibarı ilə Tehran ədliyyənin bu məsələni yenidən nəzərdən keçirməsinə istinadən daşqalaq hökmünü təxirə saldı. Lakin eyni zamanda onun cəzalandırılası cinayətkar olduğunda təkid edir. Bunu təsdiqləmək üçün İranın dövlət televiziyası ötən həftə Səkinə Aştianinin etirafı adlandırdığı bir veriliş yayımladı. Həmin proqramda Aştiani günahını etiraf edir və ərini necə qətlə yetirdiyini təsvir edir. Keçən həftə İran rəsmiləri bu qadının həyatının xilas edilməsi üçün nikbin şanslardan danışsalar da, belə görünür ki, məsələnin həlli arxasında hakimiyyət davasının əlamətləri duyulur. Və Səkinə Məhəmmədi Aştianinin məsələsi bu oyunun bir hissəsidir.