GünAzTv: Moskvalı şərhçi Aleksey Vlasov  sözlərinə görə, “Əks halda o, Medvedyevin hüzurunda belə sərt şəkildə çıxış edə bilməzdi.”

Ermənistan prezidenti Serj Sərkisyan Moskvada Kollektiv Təhlükəsizlik Müqaviləsi Təşkilatının sammiti zamanı Azərbaycanın hərbi əməliyyatlara başlayacağı halda İrəvanın Dağlıq Qarabağın müstəqilliyini tanıyacağı barədə növbəti bəyanat verib. Sərkisyan əvvəllər də jurnalistlər qarşısında, yaxud hansısa beynəlxalq forumda çıxışında bu cür bəyanatlar verirdi.

Lakin son bəyanatın verilməsi ilə bağlı situasiya fərqlidir. Kollektiv Təhlükəsizlik Müqaviləsi Təşkilatının zirvə görüşü bu gün Kremldə keçib və Ermənistan prezidenti öz bəyanatını məhz bu görüşün açıq hissəsində səsləndirib. Serj Sərkisyanın dediyinə görə, əgər Azərbaycan növbəti “hərbi avantüraya” getsə, Ermənistanın Dağlıq Qarabağı de-yure tanımaqdan başqa yolu qalmayacaq. S.Sərkisyan bildirib ki, Ermənistan həmçinin bölgə əhalisinin təhlükəsizliyini əlində olan bütün vasitələrlə qoruyacaq, Ermənistan Dağlıq Qarabağı işğal edib və Azərbaycanın bu torpaqları o cümlədən hərb yolu ilə azad etməsinə bütün hüquqları var. Rusiyalı şərhçilər bildirir ki, Ermənistanın separatçı Dağlıq Qarabağı de-yure tanıyacağı haqda bəyanatları əvvəllər də səslənib. Düzdür, bu dəfə belə bəyanatın Kremldə bir neçə prezidentin, o cümlədən münaqişənin həllində aparıcı vasitəçilərdən olan Rusiya prezidenti Dmitri Medvedyevin gözü qarşısında edilməsini bir sıra müşahidəçilər bir qədər qeyri-adi sayırlar. Moskvalı şərhçi Aleksey Vlasov da bu məqamı dilə gətirir, eyni zamanda, ekspert hesab edir ki, bəyanatın əvvəlcədən Rusiya rəhbərliyi ilə uzlaşdırılmasını iddia etmək mümkün deyil: “İnanmıram ki, Sərkisyan belə şeyləri bir ekspromt kimi səsləndirə bilsin. Rusiya rəhbərliyi işlə bağlı məlumatlandırılmasaydı, belə əhəmiyyətə malik bəyanatların səsləndirilməsi çox sərt görünərdi. Ancaq məlumatlandırılmaqla uzlaşdırılmaq arasında fərq var. Kremlin şərhləri olmadan burada mövqelərin məhz uzlaşdırılması haqda bir şey söyləmək mümkün deyil”. Başqa ekspert Aleksandr Krılovun sözlərinə görə, belə bəyanat bir elə uğurlu olmayan Astana sammitindən sonra baş verir və İrəvan sanki öz mövqeyini bir daha vurğulamağa cəhd edir: “Bütün bunlar ATƏT-in Astanadakı sammitindən sonra edilir. Burada Qarabağ nizamlanması ilə bağlı böyük ümidlər var idi, ancaq növbəti dəfə bu ümidlər doğrulmadı. İndi, görünür, Ermənistan rəhbərliyi hesab edir ki, Kollektiv Təhlükəsizlik Müqaviləsi Təşkilatının iclasında mümkün tanınma ilə bağlı bəyanatı bir daha səsləndirmək lazımdır. Amma təşkilatın mövqeyi məlumdur və mən hesab etmirəm ki, bu bəyanat təşkilatın mövqeyini prinsipial dəyişsin”. Şərhçinin sözlərinə görə, təşkilatın qarantiyaları ancaq Ermənistanın tanınmış ərazilərinə şamil edilir, bununla belə təşkilat rəhbərliyi bildirir ki, o bölgədə hərbi münaqişənin başlanmasına qarşıdır. Xatırladaq ki, Sərkisyan son vaxtlar Azərbaycana qarşı hədələyici bəyanatları Moskvadan vermək praktikası seçib və belə görünür ki, arxasında hansı gücün dayandığını nümayiş etdirmək istəyir. Eyni zamanda o, hər dəfə Moskvaya baş çəkib qayıdanda Azərbaycanın işğal edilmiş ərazilərində erməni qüvvələri hərbi təlimlər keçirir. Ermənistan prezidenti Kollektiv Təhlükəsizlik Müqaviləsi Təşkilatının sammitində həm də ona nail olmağa çalışıb ki, bu hərbi blokun Qarabağda başlaya biləcək mümkün müharibə zamanı müdaxiləsinə imkan verən hüquqi mexanizmlər yaradılsın. Sərkisyan Qarabağa dair çıxışının ardınca deyib ki, Kollektiv Təhlükəsizlik Müqaviləsi Təşkilatının bu və ya digər böhranlı situasiyaya çevik müdaxiləsinə imkan verən mexanizmlər olmalıdır. Lakin Kollektiv Təhlükəsizlik Müqaviləsi Təşkilatına daxil olan Özbəkistanın prezidenti İslam Kərimov bu təşəbbüsə qarşı çıxıb və blokun ona üzv olan ölkələri xarici təhdidlərdən qorumaq üçün yaradıldığını deyib. Yeni musavat