GünAzTv: Dünya mətbuatı növbəti dəfə İsrailin İrana zərbə endirəcəyi tarixi açıqlayıb.

“The Washington Times” qəzetinin ehtimalına görə, İran məhz bu gün (20 avqust) zərbələrə tuş gələ bilər. Buna səbəb avqustun 21-də İranın Buşəhrdə tikilmiş AES-i açmağa hazırlaşmasıdır.

ABŞ-ın (Amerika Birləşmiş Ştatları) BMT-dəki keçmiş səfiri Con Boltonun fikrincə, əgər İsrail Buşəhr AES-in işə salınmasına imkan versə, İranın nüvə obyektlərini bombalamaq imkanlarını əldən buraxacaq. 

Irana zərbə endiriləcəyi halda Azərbaycan da kənarda qalmayacaq. Son iki ayda ABŞ Konqresinin analitik xidməti Iranın qonşuları, o cümlədən Azərbaycana təhlükə ilə bağlı məruzə hazırlayıb. Məruzədə bildirilir ki, Iran ABŞ-ın regiondakı müttəfiqləri, o cümlədən Azərbaycana qarşı qüvvə tətbiq edə bilər.

Qərb mətbuatının ehtimalları özünü doğruldacaqmı? Bu baş verəcəyi halda Azərbaycanı hansı təhlükə gözləyir?

Politoloq Vəfa Quluzadə hücumun tarixinin açıqlanmasını Irana psixoloji təsir kimi qiymətləndirir: “Inanmıram ki, Israil Irana zərbə endirəcəyi ilə bağlı bir gün əvvəl məlumat versin. Belə olan halda Iranın bütün imkanları tuşlanacaq Israilə. Bir tərəfdən də ”Hizbullah" Livanın sərhədindən hücuma hazırlaşacaq. Bu baxımdan düşünürəm ki, deyilənlərin hamısı boş söhbətdir".

Eyni zamanda ekspert müharibə ehtimalı reallaşacağı təqdirdə Iranın ABŞ-ın Azərbaycandakı obyektlərini vurmasını real sayır. Çünki məhv olacağını görən Iran ABŞ və Israilə qarşı bütün mümkün variantlara əl atacaq: “Əgər Amerika və Israil Irana zərbə endirsə, bu, ölüm-dirim müharibəsi olacaq. Iran rejimi başa düşəcək ki, məhv olur. Məhv edilən rejim də əli nəyə çatsa, onu vuracaq. Ona görə bunu nəzərə almaq lazımdır”.

Con Boltonun kifayət qədər məlumatlı adam olduğunu deyən  təhlükəsizlik məsələləri üzrə ekspert Sülhəddin Əkbər onun yetərincə iddialı proqnoz verdiyini qeyd etdi. Lakin ekspert ABŞ-ın Israili bu addımı atmaqdan çəkindirə biləcəyini də istisna etmir: “Con Bolton Irana qarşı sərt xətt tərəfdarlarından biridir. Bundan əvvəl də açıqlama verdi ki, Israilin bir həftə vaxtı var. Çünki Buşəhr atom stansiyası işə salınandan sonra oradakı radiasiya ətrafa yayıla bilər. Digər tərəfdən, Obama administrasiyası Israilin Irana qarşı bu cür hərəkətlərinin əleyhinədir. Düşünürəm ki, Obama hərəkətə keçəcək və Israilin bu hərəkətinə yol verməyəcək. Amma istənilən halda Con Bolton informasiyalı şəxsdir. Gözləyək görək nə baş verir”.

S.Əkbərin fikrincə, Irana zərbə endiriləcəyi təqdirdə ABŞ-ın Azərbaycandakı bəzi obyektləri hədəfə çevriləcək: “Əgər Irana zərbə vurularsa, Iran ABŞ-ın yaxınlıqda yerləşən hərbi bazalarına, digər obyektlərinə zərbə vuracaq. O cümlədən Azərbaycandakı siyasi diplomatik korpusdan tutmuş, enerji infrastrukturuna qədər bütün obyektlər potensial hədəflərdir. Azərbaycan da bunu nəzərə almalıdır”. Azadlıq