Vəkil Məhəmməd Mustafai: Səkinə Aştiyani işgəncələr altında etirafa məcbur edilib

SON XƏBƏRLƏR

Vəkil Məhəmməd Mustafai: Səkinə Aştiyani işgəncələr altında etirafa məcbur edilib

2021.10.20, 07:36

Gunaz.tv

GünAzTv: İranda daşqalaqla edama məhkum edilmiş etnik azərbaycanlı qadının vəkili olmuş Məhəmməd Mustafai deyir ki, fars dilini zəif bilməsi səbəbindən o bir çox hüquqi terminləri anlamır.

Beynəlxalq təzyiq altında İran hələki edamın həyata keçirilməsini dayandırıb.

İngiltərədə çıxan Taymz qəzetinə yazdığı məqalədə cənab Mustafai həm də deyir ki, onunla məxfi polisin sərt davranışı İranda geniş yayılmış haldır:

"İranda iki qəbildən olan qanunlar var. Birincisi hamıya aid olan qanunlar. İkincisi məxfi polisin özbaşına müəyyən etdiyi qanunlar.

Xanım Səkinə Aştiyaninin işini çətinləşdirəm odur ki, onun doğma dili Azərbaycan dilidir. Bu səbəbdən o məhkəmədə deyilənlərin əksəriyyətini anlamır. "

GünAzTv mətbuat mərkəzinin BBC-yə istinadən yaydığı məlumata görə, Vəkil yazır ki beynəlxalq kampaniya İranın kəşfiyyat xidmətlərini çox acıqlı edib. İndi onlar siyasi oyun oynamağa başlayıblar:

"Əvvəlcə onlar məni həbs etməyə çalışdılar. Lakin mən evdə deyildim. Sonra arvadım və qaynımı iki həftə əsassız olaraq Evin həbsxanasında saxladılar.

Sonra qaynatamı da həbs etdilər."

Həbsdən yayınmaq üçün Mustafai əvvəl Türkiyəyə, sonra Norveçə qaçıb.

Bundan az sonra xanım Aştiyani telekameralar qarşısına çıxarılaraq, ərinin öldürülməsi planından xəbərdar olduğunu etiraf edib.

"Belə düşünülür ki, bundan əvvəl iki gün ərzində ona işgəncələr verilib. Yalnız bundan sonra o həmin yalanları təkrar etməyə razı olub.", yazır vəkil Mustafai.

Onun sözlərinə görə, İran ədliyyəsinin işinə kəşfiyyat xidmətlərinin təsiri son dərəcə güclüdür.

O xəbərdarlıq edir ki, belə getsə ölkədə artıq adi qanunlar yox, yalnız rejimə əl verən qanunlar işləyəcəklər.

Xatırladaq ki, Səkinə Aştiyani əvvəlcə ərinə xəyanət üstündə 99 şallağa məhkum edilmişdi. Sonra isə onu ərinin qətlinin təşkilində iştiraka görə ölümə məhkum ediblər. Müttəhim isə bu ittihamları hər zaman rədd edib. Ancaq son günlərdə işgəncələr altında televiziya ekranında etiraf etməyə məcbur edilmişdir.

GUNAZ.TV

SON XƏBƏRLƏR