GünAzTv: 2010-cu ilin may ayının 25-26-da Güney Azərbaycanın Ərdəbil şəhərində “Azərbaycan və Aranın tədqiqat xarakterli ədəbiyyatlarının tənqidi və təhlili” adlı “elmi” konfrans keçirilmişdir.

İran İslam Respublikasinin (İİR) Ali Dini Liderinin Ərdəbil Universitetindəki nümayəndəliyi və Çağdaş İran Tədqiqatlar İnstitutu tərəfindən keçirilən bu konfransda Azərbaycan Respublikasının tarixinin təhrif olunmasına, milli zəmində gərginlik yaradılmasına xidmət edən tarixi uydurmalar müzakirə mövzusuna çevrilmişdir. Qeyd etmək lazımdır ki, konfransın təşkilatçıları Azərbaycanın tarixi İran əraziləri olmasına dair saxta faktlar barədə yalnız bu sahədən xəbəri olmayanlarla gizli şəkildə müzakirə apara biləcəkrlərini dərk edərək Azərbaycan Respublikasındakı nüfuzlu elmi dairələrə dəvət göndərməkdən belə çəkinmişlər. Eyni zamanda hətta təşəbbüskarın İranda çox mötəbər bir qurum olan Ali Dini Liderinin dəftərxanasına bağlı bir təşkilatın adını məntiqsiz müzakirələrin aparıldığı və elmi cəhətdən aşağı səviyyəli bir konfransın təşkilatçıları sırasına daxil etməklə tədbirin əhəmiyyətini artırmaq cəhdləri dəvət olunan digər nüfuzlu qurumların müzakirələrdə iştirakını təmin etməmişdir. Dəvət olunan əksər əhəmiyyətli qurum və alimlər isə belə məkrli oyunların iştirakçısı olaraq öz adını tarixi ləkələyənlərin siyahısına salmaq istəməmişdir.

Tədbirin mötəbərliyinə inanıb konfransa qatılan bir neçə elm xadimi isə müzakirələrin düzgün istiqamətdə getmədiyini görərək təşkilatçıların əsl məqsədlərini anlamış və peşmançılıq hissləri ilə öz ölkələrinə qayıtmışlar. Bəlkə də, belə ucuz tədbir sözügedən mötəbər qurumun adı ilə deyil, sıradan bir təşkilatın adıyla bağlansaydı konfrans diqqətdən kənar qalar və təmiz niyyətli yerli əhalinin müdaxiləsi ilə öz işini yarımçıq qoymaq məcburiyyətində qalmazdı. Əgər bu cür tədbirlərin keçirilməsində məqsəd elmi həqiqtələrin ortaya çıxarılmasıdırsa, Ali Dini Liderə bağlı bir qurumun adı ilə bağlı olan bu qurum tərəfindən əsl həqiqəti üzə çıxarmaq üçün yaxşı niyyətə, ölkədə demokratiyanın inkişafına, etnik azlıqların hüquqlarının bərpasına, Fars şovinizminin tənqidinə xidmət edən tədbirlərin keçirilməsi həm İİR daxilində, həm də beynəlxalq aləmdə təşkilatçıların nüfuzunu artırardı. Bu İİR tərəfindən rəsmi səviyyədə dəstəklənən və qonşularının daxili işlərinə müdaxilə edən, tarixini, əhəmiyyətli məlumatlarını saxtalaşdıran ilk fakt deyil. Çox güman ki, bu gedişlə sonuncu da olmayacaq. İİR eyni zamanda, mütəmadi olaraq qonşularını uzaqdakı düşmanları ilə əməkdaşlıq etməkdə günahlandırır. Amma, ilk növbədə həqiqətin qəbul edilməsindən qorxmayaraq öz səhvlərindən imtina etməyi bacarmaq lazımdır. Əgər regional əməkdaşlıq daha vacibdirsə və öz qonşularının hüquqlarına müdaxilə etməmək vacibdirsə, bunu və milliyyətindən asılı olmayaraq öz vətəndaşlarına eyni gözlə baxmağı, onlara arzu etdikləri kimi yaşamağa şərait yaramağı ilk növbədə İİR öyrənməlidir. Araztm